ຂ່າວຫຼ້າສຸດ

ຟີ​ລິບ​ປິນ ງົດ​ທຸກໆ​ການເຄື່ອນໄຫວ​ຂຸດ​ຄົ້ນ​ຫີນ

196 25 ກ.ຍ. 2018 ຂ່າວຕ່າງປະເທດ
ຟີ​ລິບ​ປິນ ງົດ​ທຸກໆ​ການເຄື່ອນໄຫວ​ຂຸດ​ຄົ້ນ​ຫີນ

    ວັນ​ທີ 21 ກັນຍາ​ທີ່​ຜ່ານ​ມາ ຟີ​ລິບ​ປິນ​ໄດ້​ໃຫ້​ງົດ​ການເຄື່ອນໄຫວ​ຂຸດ​ຄົ້ນ​ຫີນ ຢູ່​ໃນ​ປະເທດ​ນີ້ ເປັນ​ການ​ຊົ່ວຄາວ ຫຼັງ​ຈາກ​ເກີດ​ເຫດການ​ດິນ​ເຈື່ອນ​ຢູ່​ໃກ້​ກັບ​ບໍ່​ຫີນ​ປູນ​ແຫ່ງ​ໜຶ່ງ ຢູ່​ໃນ​ນະຄອນ ນາ​ກາ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 29 ຄົນ.

   ທ່ານ ຣອຍ ຊີ​ມາ​ຕູ ລັດຖະມົນຕີ ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ  ຂອງ​ຟີ​ລິບ​ປິນ ກ່າວ​ຕໍ່​ຜູ້​ສື່​ຂ່າວ​ຢູ່​ນະຄອນ​ນາ​ກາ ໂດຍ​ປະກາດ​ໃຫ້​ງົດ​ທຸກໆ​ການເຄື່ອນໄຫວ​ຂຸດ​ຄົ້ນ​ເປັນ​ການ​ຊົ່ວຄາວ​ເປັນ​ເວລາ 15 ວັນ ເພື່ອ​ຕີ​ລາຄາ​ເບິ່ງ​ຄວາມ​ປອດ​ໄພ ຢູ່​ໃນ​ເຂດ​ບໍ່​ຫີນ​ແຫ່ງ​ຕ່າງໆ.

    ທ່ານ ຣອຍ ຊີ​ມາ​ຕູ ກໍ​ໄດ້​ສັ່ງ​ໄປ​ຍັງ​ກົມ​ທໍລະນີ​ສາດ ແລະ ຂຸດ​ຄົ້ນ​ບໍ່​ແຮ່ (MGB) ຊຶ່ງ​ເປັນ​ໜ່ວຍ​ງານ​ຊີ້​ນຳ​ການ​ຂຸດ​ຄົ້ນ​ຫີນ ແລະ ຂຸດ​ຄົ້ນ​ແຮ່​ທາດ​ນັ້ນ ໃຫ້​ດຳເນີນ​ການ​ຕີ​ລາຄາ​ເຖິງ​ຄວາມ​ປອດ​ໄພ​ຢູ່​ໃນ 7 ເຂດ ທີ່​ມີ​ບໍ່​ຫີນ​ເຕົ້າໂຮມ​ຢູ່​ຫຼາຍ. ນອກຈາກ​ນັ້ນແລ້ວ ທ່ານ ຣອຍ ຊີ​ມາ​ຕູ ກໍ​ໄດ້​ອອກ​ຄຳ​ສັ່ງ​ໃຫ້​ງົດ​ທຸກໆ​ການເຄື່ອນໄຫວ​ຂຸດ​ຄົ້ນ​ຂະໜາດ​ນ້ອຍ ຢູ່​ໃນ​ສາຍພູ ກອກ​ດີ​ເລ​ຣາ ທີ່​ມີ​ບໍ່​ຄຳ​ຢູ່​ຫຼາຍ​ຈຸດ ພ້ອມ​ກັນ​ນັ້ນ​ກໍ​ສະເໜີ​ໄປ​ຍັງ​ບັນດາ​ອົງການ​ທີ່​ກ່ຽວຂ້ອງ​ພິຈາລະນາ​ຢ່າງ​ຖີ່​ຖ້ວນ​ຕໍ່​ຄຳ​ຮ້ອງ 100 ກວ່າ​ສະບັບ ທີ່​ຂໍອະນຸຍາດ​ເຄື່ອນ​ໄຫວ​ຢູ່​ໃນ​ເຂດ​ບໍ່​ແຮ່​ຂະໜາດ​ນ້ອຍ​ໃນ​ທົ່ວ​ປະເທດ.

    ເຫດການ​ດິນ​ເຈື່ອນ​ດັ່ງກ່າວ​ເກີດ​ຂຶ້ນ ເມື່ອ​ຕອນ​ເຊົ້າ​ວັນ​ທີ 20 ກັນຍາ​ທີ່​ຜ່ານ​ມາ ໂດຍ​ໄດ້​ທັບ​ຖົມ​ເຮືອນ​ຫຼາຍ​ສິບ​ຫຼັງ ພ້ອມ​ດ້ວຍ​ປະຊາຊົນ​ທີ່​ອາໄສ​ຢູ່​ໃນ​ນັ້ນ. ນັບ​ມາ​ຮອດ​ວັນ​ສຸກ​ທີ່​ຜ່ານ​ມາ ອຳນາດ​ການ​ປົກຄອງ​ທ້ອງຖິ່ນ ໄດ້​ປະກາດ​ຕົວ​ເລກ​ຜູ້​ເສຍ​ຊີວິດ ຢູ່​ໃນ​ເຫດການ​ດິນ​ເຈື່ອນ​ດັ່ງກ່າວ​ມີ 29 ຄົນ ແລະ ຍັງ​ມີ​ຜູ້​ຫາຍ​ສາບ​ສູນ​ອີກ 50 ຄົນ.

 

ຂ່າວທີ່ກ່ຽວຂ້ອງ