ຂ່າວຫຼ້າສຸດ

​ສປຊ ຈັດ​ໃຫ້ ​ສປປ ເກົາຫຼີ ຢູ່​ໃນ​ບັນຊີ​ປະເທດ​ຂາດແຄນ​ສະບຽງ​ອາຫານ

161 25 ກ.ຍ. 2018 ຂ່າວຕ່າງປະເທດ
​ສປຊ ຈັດ​ໃຫ້ ​ສປປ ເກົາຫຼີ ຢູ່​ໃນ​ບັນຊີ​ປະເທດ​ຂາດແຄນ​ສະບຽງ​ອາຫານ

     ໃນ​ບົດ​ລາຍ​ງານ​ໃໝ່​ຫຼ້າ​ສຸດ​ນັ້ນ ອົງການ​ອາການ ແລະ​ ການ​ກະເສດ​ຂອງ​ສະຫະ​ປະຊາ​ຊາດ (FAO) ໄດ້​ຈັດ​ໃຫ້ ​ສປປ ເກົາຫຼີ ເຂົ້າ​ໄປ​ໃນ​ບັນຊີ​ບັນດາ​ປະເທດ​ຂາດແຄນ​ສະບຽງ​ອາຫານ ແລະ ຕ້ອງ ການ​ຄວາມ​ຊ່ວຍເຫຼືອ​ຈາກ​ພາຍ​ນອກ.

   FAO ໃຫ້​ຮູ້​ວ່າ ​ສປປ ເກົາຫຼີ ໄດ້​ນອນ​ຢູ່​ໃນ​ບັນຊີ​ທີ່​ປະກອບ​ມີ 39 ປະເທດ ຊຶ່ງ​ຕ້ອງການ​ຄວາມ​ຊ່ວຍເຫຼືອ​ຈາກ​ພາຍ​ນອກ ພ້ອມ​ກັນ​ນັ້ນ​ກໍ​ຮຽກຮ້ອງ​ນຳ​ເຂົ້າ​ສະບຽງ​ອາຫານ 641.000 ໂຕນ ໄປ​ຍັງ​ປະເທດ​ດັ່ງກ່າວ​ເພື່ອ​ຊ່ວຍເຫຼືອ​ປະຊາຊົນ​ໃຫ້​ພົ້ນ​ຈາກ​ຄວາມ​ອຶດ​ຫີວ. FAO ໃຫ້​ຮູ້​ຕື່ມ​ວ່າ ສະພາບ​ຂາດແຄນ​ສະບຽງ​ອາຫານ​ຢູ່​ໃນ ​ສປປ ເກົາຫຼີ ໃນ​ປີ​ນີ້ ຮ້າຍ​ແຮງ​ກວ່າ​ປີ​ກາຍ ໂດຍ​ທີ່​ສະບຽງ​ອາຫານ​ຂາດແຄນ​ຫຼາຍ​ກວ່າ 130.000 ໂຕນ ທຽບໃສ່​ປີ​ກາຍ.

   FAO ຊີ້​ໃຫ້​ເຫັນ​ວ່າ ປະລິມານ​ນ້ຳ​ຝົນ​ຕ່ຳ​ກວ່າ​ລະດັບ​ສະເລ່ຍ ແລະ ອຸ່ນ​ຫະ​ພູມ​ສູງ​ຢູ່​ເທິງ​ແຫຼມ​ເກົາຫຼີ ໃນ​ເດືອນ​ກໍລະກົດ ແລະ​ເດືອນ​ສິງຫາ​ທີ່​ຜ່ານ​ມາ ໄດ້​ເຮັດ​ໃຫ້​ປະລິມານ​ການ​ຜະລິດ​ຂອງ​ລະດູ​ການ​ຜະລິດ​ຫຼຸດ​ລົງ.

    ໃນ​ຈຳນວນ 39 ປະເທດ ທີ່​ພວມ​ຕ້ອງການ​ຄວາມ​ຊ່ວຍເຫຼືອ​ຈາກ​ພາຍ​ນອກ​ນັ້ນ ມີ 31 ປະເທດ​ຢູ່​ໃນ​ທະວີບ​ອາ​ຟະ​ຣິກ​ກາ ແລະ 7 ປະເທດ​ໃນ​ອາຊີ ໃນ​ນັ້ນ​ມີ ​ສປປ ເກົາຫຼີ ລວມ​ຢູ່​ນຳ.

    ໃນ​ຂະນະ​ດຽວ​ກັນ ຂ່າວສານ​ຢອນ​ຮັບ ຂອງ ສ ເກົາຫຼີ ລາຍ​ງານ ວ່າ ທ່ານ ກິມ​ຮຸນ​ຈູນ ທີ່​ປຶກສາ​ພິເສດ​ທາງ​ດ້ານ​ເສດຖະກິດ ຂອງ​ປະທານາທິບໍດີ ສ ເກົາຫຼີ ມູນ​ເຈ​ອິນ ກ່າວ​ເມື່ອ​ວັນ​ທີ 21 ກັນຍາ ວ່າ​ທ່ານ ຣີ ຣີ​ຢົງ​ນາມ (Ri Ryong-nam) ຮອງ​ນາຍົກລັດຖະມົນຕີ ​ສປປ ເກົາຫຼີ ໄດ້​ກ່າວ​ຍອມຮັບ​ວ່າ ພື້ນຖານ​ເສດຖະກິດ​ຂອງ ​ສປປ ເກົາຫຼີ ພວມ​ພົບ​ກັບ​ຄວາມ​ຫຍຸ້ງຍາກ ແລະ​ ສະເໜີ​ໃຫ້    ສ ເກົາຫຼີ ເປັນ​ແຮງ​ຊ່ວຍ.

    ທ່ານ ກິມ​ຮຸນ​ຈູນ ກ່າວ​ຕໍ່​ສື່​ມວນ​ຊົນ​ວ່າ ທ່ານ ຣີ ຣີ​ຢົງ​ນາມ  ກ່າວ​ຄື​ດັ່ງກ່າວ ໃນ​ເວລາ​ພົບ​ປະ​ກັບ​ບັນດາ​ຜູ້ອຳນວຍການ​ຝ່າຍ​ບໍລິຫານ ຂອງ​ບັນດາ​ກຸ່ມ​ບໍລິສັດ​ລະດັບ​ແຖວ​ໜ້າ ຂອງ ສ ເກົາຫຼີ ເມື່ອ​ຕົ້ນ​ອາທິດ​ທີ່​ຜ່ານ​ມາ ໃນ​ນັ້ນ​ມີ​ທ່ານ ລີ​ເຈ​ຢົງ ຮອງ​ປະທານ​ກຸ່ມ​ບໍລິສັດ​ຊຳ​ຊຸງ ທີ່​ເດີນທາງ​ຮ່ວມ​ກັບ​ປະທານາທິບໍດີ ມູນ​ເຈ​ອິນ ໃນ​ການ​ຢ້ຽມຢາມ​ພຽງ​ຢາງ  ເພື່ອ​ພົບ​ປະ​ສຸດ​ຍອດ​ເທື່ອ​ທີ​ສາມ​ກັບ​ຜູ້ນຳ​ຂອງ ​ສປປ ເກົາຫຼີ.

 

ຂ່າວທີ່ກ່ຽວຂ້ອງ