ຂ່າວຫຼ້າສຸດ

ຜູ້​ສະໝັກ​ຮັບ​ເລືອກ​ຕັ້ງ​ຈາກ​ຝ່າຍ​ຄ້ານ ຊະນະ​ການ​ເລືອກ​ຕັ້ງ​ປະທານາທິບໍດີ​ຢູ່​ໃນ​ມານ​ດິບ

160 25 ກ.ຍ. 2018 ຂ່າວຕ່າງປະເທດ
ຜູ້​ສະໝັກ​ຮັບ​ເລືອກ​ຕັ້ງ​ຈາກ​ຝ່າຍ​ຄ້ານ ຊະນະ​ການ​ເລືອກ​ຕັ້ງ​ປະທານາທິບໍດີ​ຢູ່​ໃນ​ມານ​ດິບ

   ຜົນ​ທີ່​ອອກ​ມາ​ຢ່າງ​ເປັນ​ທາງ​ການ ໃຫ້​ຮູ້​ວ່າ ທ່ານ ອີ​ບຣາ​ຮິມ ມໍ​ຮາ​ເມັດ ໂຊ​ລີ ຜູ້​ສະໝັກ ຮັບ​ເລືອກ​ຕັ້ງ​ຈາກ​ຝ່າຍ​ຄ້ານ​ໃນ​ມານ​ດິບ ໄດ້​ຮັບ​ໄຊຊະນະ​ຝ່າງ​ບໍ່​​ຄາດ​ຝັນ ໃນ​ການ​ເລືອກ​ຕັ້ງ​ປະ​ທາ ນາ​ທິ​ບໍດີ​ຢູ່​ໃນ​ປະເທດ​ດັ່ງກ່າວ ຊຶ່ງ​ຈັດ​ຂຶ້ນ​ໃນ​ວັນ​ທີ 23 ກັນຍາ​ນີ້.

    ຜົນ​ການ​ເລືອກ​ຕັ້ງ​ດັ່ງກ່າວ ຊຶ່ງ​ນຳ​ອອກ​ມາ​ເປີດເຜີຍ​ໂດຍ​ສື່ສານ​ໃນ​ທ້ອງຖິ່ນ​ຜ່ານ​ການ ສັງ​ລວມ​ຈາກ​ສະຖານທີ່​ປ່ອນ​ບັດ​ຕ່າງໆ ໃນ​ຕອນ​ຄ່ຳ​ຂອງ​ວັນ​ທີ 23 ກັນຍາ ໃຫ້​ຮູ້​ວ່າ ທ່ານ ອີ​ບຣາ​ຮິມ ມໍ​ຮາ​ເມັດ ໂຊ​ລີ ມີ​ຄະແນນ​ນຳ ໂດຍ​ຍາດ​ໄດ້​ສຽງ​ສະໜັບສະໜູນ 34.000 ບັດ ໃນ​ຂະນະ​ທີ່ ປະທານາທິບໍດີ​ຄົນ​ປັດຈຸບັນ ຄື​ທ່ານ ອັບ​ດູ​​ລ​ລາ ຢາ​ມິນ ໄດ້​ຮັບ​ສຽງ​ສະໜັບສະໜູນ​ພຽງ 27.000 ບັດ. ຜົນ​ທີ່​ອອກ​ມາ​ຄື​ດັ່ງກ່າວ ເປັນ​ການ​ຮັບປະກັນ​ຢ່າງ​ແນ່ນອນ​ວ່າ​ທ່ານ ອີ​ບຣາ​ຮິມ ມໍ​ຮາ​ເມັດ ໂຊ​ລີ ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ​ດັ່ງກ່າວ.

    ຫຼ້າ​ສຸດ ໃນ​ວັນ​ທີ 24 ກັນຍາ​ນີ້ ຄະນະ​ກຳມະການ​ການ​ເລືອກ​ຕັ້ງ​ຂອງ​ມານ​ດິບ ໄດ້​ລາຍ​ງານ ຜົນ​ການ​ເລືອກ​ຕັ້ງ​ປະທານາທິບໍດີ ນັ້ນ​ຢ່າງ​ເປັນ​ທາງ​ການ ຊຶ່ງ​ຕາມ​ນັ້ນແລ້ວ​ກໍ​ແມ່ນ ທ່ານ ອີ​ບຣາ​ຮິມ ມໍ​ຮາ​ເມັດ ໂຊ​ລີ ໄດ້​ຮັບ​ໄຊຊະນະ ດ້ວຍ​ຄະແນນ​ສຽງ​ສະໜັບ​ສະ​​ໜູນ 58,3% ຂອງ​ຈຳນວນ​ບັດ ເລືອກ​ຕັ້ງ.

    ເມື່ອ​ເດືອນ​ກຸມພາ​ທີ່​ຜ່ານ​ມາ ມານ​ດິບ​ໄດ້​ຕົກ​ຢູ່​ໃນ​ວິ​ກິດ​ການ​ການເມືອງ ຫຼັງ​ຈາກ​ທີ່​ສານ​ສູ​ສຸດ ໃນ​ປະເທດ​ນີ້​ຕັດສິນ​ໃຫ້​ປ່ອຍ​ຕົວ​ບັນດາ​ແກນ​ນຳ​ທາງ​ການເມືອງ​ຝ່າຍ​ຄ້ານ ທີ່​ຖືກ​ຈັບ​ກຸມ​ກ່ອນ​ໜ້າ​ນັ້ນ ໂດຍສານ​ຖື​ວ່າ​ຄວນ​ປ່ອຍ​ຕົວ​ບັນດາ​ອະດີດ​ເຈົ້າ​ໜ້າທີ່​ເຫຼົ່ານັ້ນ ໄປ​ຈົນ​ກວ່າ​ຈະ​ສາມາດ​ດຳເນີນ​ການ ພິຈາລະນາ​ໃນ​ສານ​ຢ່າງ​ມີ​ຄວາມ​ຍຸຕິ​ທຳ. ນອກຈາກ​ນັ້ນແລ້ວ ສານ​ສູງ​ສຸດ​ຂອງ​ມານ​ດິບ ກໍ​ໄດ້​ຕັດສິນ​ອອກ​ມາ ໂດຍ​ສະເໜີ​ໃຫ້​ລັດຖະບານ​ຮື້​ຟື້ນ​ຕຳແໜ່ງ​ໃຫ້​ແກ່​ສະມາຊິກ​ລັດ​ຖະ​ສະພາ 12 ທ່ານ ທີ່​ໄດ້​ຖືກ​ປົດ​ອອກ​ຈາກ​ຕຳແໜ່ງ ຍ້ອນ​ໜີ​ອອກ​ໄປ​ຈາກ​ພັກ​ຂອງ​ປະທານາທິບໍດີ ຢາ​ມິນ. ເຖິງ​ຢ່າງໃດ​ກໍ​ຕາມ ອຳນາດ​ການ​ປົກຄອງ​ຂອງ​ປະທານາທິບໍດີ ຢາ​ມິນ ກໍ​ໄດ້​ປະຕິເສດ​ຕໍ່​​ໍ່​ການ​ປະຕິບັດ ຕາມ​ການ​ຕັດສິນ​ດັ່ງກ່າວ​ຂອງ​ສານ.

 

ຂ່າວທີ່ກ່ຽວຂ້ອງ