ທ່ານ​ນາງ ດັ້ງ​ທິ​ຫງອກ​ທິ້ງ ເປັນ​ຜູ້​ຮັກສາ​ການ​ປະທານ​ປະເທດ​ຫວຽດນາມ

107 25 ກ.ຍ. 2018 ຂ່າວຕ່າງປະເທດ
ທ່ານ​ນາງ ດັ້ງ​ທິ​ຫງອກ​ທິ້ງ ເປັນ​ຜູ້​ຮັກສາ​ການ​ປະທານ​ປະເທດ​ຫວຽດນາມ

     ຂ່າວສານ​ຫວຽດນາມ ລາຍ​ງານ​ວ່າ ທ່ານ ເຈິ່ນ​ດ້າຍ​ກວາງ ກຳມະການ​ກົມ​ການເມືອງ ພັກ​ກອມ​ມູ​ນິດ​ຫວຽດນາມ ປະທານ​ປະເທດ​ຫວຽດນາມ ໄດ້​ເຖິງ​ແກ່​ມໍລະນະ​ກຳ​ແລ້ວ ເມື່ອ​ວັນ​ທີ 21 ກັນຍາ​ທີ່​ຜ່ານ​ມາ ລວມ​ອາຍຸ​ໄດ້ 62 ປີ.

   ທ່ານ ເຈິ່ນ​ດ້າຍ​ກວາງ ກຳເນີດ​ເມື່ອ​ປີ 1956 ຢູ່​ທີ່​ແຂວງ ນິງ​ບິ່ງ (ພາກ​ເໜືອ​ຫວຽດນາມ); ແລະ ທ່ານ​ໄດ້​ຮັບ​ເລືອກ​ຕັ້ງ​ເປັນ​ປະທານ​ປະເທດ​ຫວຽດນາມ ໃນ​ວັນ​ທີ 2 ເມສາ ປີ 2016.

    ຂ່າວສານ​ຫວຽດນາມ ໃຫ້​ຮູ້​ອີ​ກວ່າ ໃນ​ວັນ​ທີ 23 ກັນຍາ​ນີ້ ທ່ານ​ນາງ ຫງວ​​ຽນ​ທິ​ກີມ​ເງິນ ປະທານ​ສະພາ​ແຫ່ງ​ຊາດ​ຫວຽດນາມ ໄດ້​ຕາງໜ້າ​ໃຫ້​ຄະນະ​ກຳມະການ​ປະຈຳ​ສະພາ​ແຫ່ງ​ຊາດ​ຫວຽດນາມ ລົງ​ນາມ​ໃນ​ແຈ້ງ​ການ​ສະບັບ​ໜຶ່ງ ກ່ຽວ​ກັບ​ການ​ປະຕິບັດ​ການ​ຮັກສາ​ການ​ປະທານ​ປະເທດ ຕໍ່​ທ່ານ​ນາງ ດັ້ງ​ທິ​ຫງອກ​ທິ້ງ ໂດຍ​ເປັນ​ການ​ອີງ​ຕາມ​ລັດ​ຖະ​ທຳ​ມະນູນ​ແຫ່ງ ສາທາລະນະ​ລັດ ສັງຄົມ​ນິຍົມ​ຫວຽດນາມ; ອີງ​ຕາມ​ກົດໝາຍ​ວ່າ​ດ້ວຍ​ການຈັດຕັ້ງ​ສະພາ​ແຫ່ງ​ຊາດ​ຫວຽດນາມ; ແລະ ​ອີງ​ຕາມ​ການ​ສະຫຼຸບ​ຂອງ​ກົມ​ການເມືອງ ພັກ​ກອມ​ມູ​ນິດ​ຫວຽດນາມ ກ່ຽວ​ກັບ​ການ​ແບ່ງ​ໜ້າທີ່​ກຳມະການ​ສູນ​ກາງ​ພັກ ໃຫ້​ຮັກສາ​ການ​ປະທານ​ປະເທດ ສາທາລະນະ​ລັດ ສັງຄົມ​ນິຍົມ​ຫວຽດນາມ.

    ຂ່າວ​ແຈ້ງວ່າ ທ່ານ​ນາງ ດັ້ງ​ທິ​ຫງອກ​ທິ້ງ ຈະ​ຮັກສາ​ການປະທານ​ປະເທດ ສາທາລະນະ​ລັດ ສັງຄົມ​ນິຍົມ​ຫວຽດນາມ ໄປ​ຈົນ​ກວ່າ​ສະພາ​ແຫ່ງ​ຊາດ​ຫວຽດນາມ ຈະ​ເລືອກ​ຕັ້ງ​ປະທານ​ປະເທດ ຄົນ​ໃໝ່.

 

ຂ່າວທີ່ກ່ຽວຂ້ອງ