ເບິ່ງບ້ານເຂົາເອົາບົດຮຽນ 25/09/2018

160 25 ກ.ຍ. 2018 ຫົວຂໍ້ຂ່າວອື່ນໆ

    ຂ່າວ​ໃຫຍ່​ໄຟ​ແຮງ​ປະ­ຈຳ​ວັນ​ນີ້ ມີ​ເລື່ອງ​ໂຈນ​ລັກ​ດິນ­ຊາຍ​ຢູ່ ອິ​ຕາ​ລີ ເລື່ອງ​ທາງ​ການ​ຈີນ ມີ​ແຜນ​ຊ່ວຍ​ແມ່­ຍິງ​ໃຫ້​ມີ​ລູກ​ໄດ້​ໂດຍ​ບໍ່​ຈຳ­ເປັນ​ແຕ່ງ­ດອງ ແລະ ເລື່ອງ​ແມ່​ໃຈ​ໂຫດ​ຢູ່ ຍີ່­ປຸ່ນ ທີ່​ຕັ້ງ­ໃຈ​ຂ້າ​ລູກ​ຂອງ​ຕົນ​ເອງ.

    ທີ່ ອິ​ຕາ​ລີ: ມີ​ຂ່າວ​ແປກໆ ແຕ່​ມີ​ຄວາມ​ຈິງ​ທີ່​ໃສ່​ຫົວ­ຂໍ້​ວ່າ: “ໂຈນ​ລັກ​ດິນ­ຊາຍ” ໂຈນ​ທີ່​ວ່າ​ນີ້ ບໍ່​ແມ່ນ​ອື່ນ​ໄກ ແຕ່​ແມ່ນ​ບັນ­ດາ​ນັກ​ທ່ອງ​ທ່ຽວ​ທີ່​ໄປ​ທ່ຽວ​ເກາະ​ສະ­ຫວັນ “ຊາ​ດີ​ເນຍ” (Sardinia) ຢູ່ ອິ​ຕາ​ລີ ເກາະ​ຊາ​ດີ​ເນຍ​ນີ້ ເປັນ​ແຫຼ່ງ​ທ່ອງ​ທ່ຽວ​ລື​ຊື່ ຍ້ອນ​ມີ​ສະ­ຖານ­ທີ່​ອາບ​ແດດ​ງາມ​ທີ່​ສຸດ​ແຫ່ງ​ໜຶ່ງ​ໃນ ເອີ​ຣົບ ຄວາມ​ງາມ​ທີ່​ວ່າ​ນັ້ນ​ແມ່ນ​ຍ້ອນ​ມີ​ດິນ­ຊາຍ​ທີ່​ຂາວ​ງາມ​ເຫຼື້ອມ​ລະ​ຍິບ​ລະ​ຍັບ ປານ​ໂລ­ຫະ​ປະ­ເສີດ ຍ້ອນ​ແນວ​ນີ້​ເອງ ບັນ­ດາ​ນັກ​ທ່ອງ​ທ່ຽວ​ຈາກ​ຕ່າງ​ແດນ ຈຶ່ງ​ພາ­ກັນ​ລັກ​ເອົາ​ດິນ­ຊາຍ​ເມືອ​ໄວ້​ແຍງ​ເປັນ​ສິ່ງ​ລະ​ລຶກ​ຂ່າວ​ບອກ​ວ່າ ບາງ​ຄົນ​ກໍ່​ເອົາ​ໃສ່​ຖົງ​ສະ­ເພາະ​ບາງ​ຄົນ ກໍ່​ລັກ​ເອົາ​ເປັນ​ໄຖ່​ເມືອ​ແຕ່­ລະ­ຄົນ​ລັກ​ເອົາ​ຜູ້​ເລັກ​ຜູ້​ໜ້ອຍ ສຸດ​ທ້າຍ​ຫາດ​ຊາຍ​ບາງ​ແຫ່ງ​ກໍ່​ບົກ​ແຫ້ງ​ໂກນ​ໂຈກ​ໂວກ ຍ້ອນ​ແນວ​ນີ້​ເອງ ເຈົ້າ​ໜ້າ­ທີ່​ພາ­ສີ​ປະ­ຈຳ​ສະ­ໜາມ​ບິນ​ສອງ ແຫ່ງ ຢູ່​ເກາະ ຊາ​ດີ​ເນຍ ຈຶ່ງ​ໄດ້​ຮັບ​ຄຳ​ສັ່ງ​ໃຫ້​ເຂັ້ມ​ງວດ​ກວດ​ຂັນ ເພື່ອ​ປ້ອງ​ກັນ​ການ​ລັກ­ລອບ​ດິນ­ຊາຍ ຂ່າວ​ບອກ​ວ່າ ໃນ​ປີ 2017 ດິນ­ຊາຍ​ທີ່​ຢຶດ​ໄດ້​ຈາກ​ນັກ​ທ່ອງ​ທ່ຽວ​ນັ້ນ ມີ​ປະ­ມານ 5 ໂຕນ ນອກ­ຈາກ​ກວດ​ນັກ​ທ່ອງ​ທ່ຽວ​ຢູ່​ສະ­ໜາມ​ບິນ​ແລ້ວ ກໍ່​ຍັງ​ມີ​ເຈົ້າ​ໜ້າ­ທີ່ ທີ່​ຮັບ­ຜິດ­ຊອບ​ເວນ­ຍາມ​ຕາມ​ຊາຍ​ຫາດ​ເພື່ອ​ຈັບ​ໂຈນ ດິນ­ຊາຍ​ທາງ​ການ​ເກາະ​ຊາ​ດີ​ເນຍ ໄດ້​ອອກ​ຄຳ​ສັ່ງ​ປັບ​ໃໝ​ຜູ້​ລັກ​ດິນ­ຊາຍ ໃນ​ມູນ​ຄ່າ​ສູງ​ສຸດ 3.000 ເອີ​ໂຣ (ປະ­ມານ​ເກືອບ 27 ລ້ານ​ກີບ) ຜູ້​ຕິດ​ຄະ­ດີ​ລັກ​ດິນ­ຊາຍ​ຄົນ​ໜຶ່ງ​ແມ່ນ​ນັກ​ທ່ອງ​ທ່ຽວ​ອັງ­ກິດ ເຊິ່ງ​ຖືກ​ປັບ​ໃໝ​ເປັນ​ເງິນ 1.032 ເອີ​ໂຣ (ເກືອບ 10 ລ້ານ​ກີບ) ຢູ່​ຕາມ​ຫາດ​ຊາຍ​ນັ້ນ ຍັງ​ມີ​ປ້າຍ​ຫ້າມ​ເອົາ​ດິນ­ຊາຍ​ປັກ​ໄປ​ທົ່ວ ແຕ່​ປານ​ນັ້ນ ພວກ​ນັກ​ທ່ອງ​ທ່ຽວ​ຍັງ​ດື້ ເຮັດ​ໂດຍ​ລັກ​ເອົາ​ບັນ­ຈຸ​ໃສ່​ຕຸກ​ເປົາ ແລະ ອື່ນໆ.

    ທີ່ ສປ ຈີນ: ມີ​ເລື່ອງ​ດີ​ສຳ­ລັບ​ແມ່­ຍິງ​ໂສດ ແຕ່​ຢາກ​ມີ​ລູກ​ໃນ ສປ ຈີນ ຍ້ອນ​ວ່າ ທາງ​ການ​ຈີນ​ມີ​ແຜນ​ປັບ­ປຸງ​ກົດ­ໝາຍ ກໍ່​ຄື ລະ­ບຽບ​ການ​ທີ່​ຮັບ­ປະ­ກັນ​ໃຫ້​ແມ່­ຍິງ​ທີ່​ບໍ່​ແຕ່ງ­ດອງ​ສາ­ມາດ​ມີ​ລູກ​ໄດ້ ນະ­ໂຍ­ບາຍ​ນີ້ ເກີດ​ມາ​ຈາກ​ຄວາມ​ຈຳ­ເປັນ​ໃນ​ການ​ຊ່ວຍ​ໃຫ້​ບັນ­ດາ​ແມ່­ຍິງ​ໂທນ (ບໍ່​ມີ​ຄູ່​ຄອງ) ໃຫ້​ສາ­ມາດ​ເຂົ້າ​ເຖິງ​ເຕັກ​ໂນ​ໂລ​ຊີ ຈະ­ເລີນ​ພັນ​ໄດ້ ກົດ­ໝາຍ​ທີ່​ຈະ​ປັບ­ປຸງ​ນີ້ ຈະ​ບໍ່​ເກືອດ​ຫ້າມ​ແມ່­ຍິງ​ໂສດ​ມີ​ລູກ ແລະ ລູກ​ທີ່​ເກີດ​ມາ (ໂດຍ​ບໍ່​ມີ​ພໍ່) ນັ້ນ ກໍ່​ຈະ​ໄດ້​ຮັບ​ສິດ​ສະ­ເໝີ­ພາບ​ຄື​ກັບ​ລູກ​ທີ່​ເກີດ​ຈາກ​ການ​ແຕ່ງ­ດອງ (ມີ​ທັງ​ພໍ່ ແລະ ແມ່).

    ທີ່ ຍີ່­ປຸ່ນ: ມີ​ຂ່າວ​ເສົ້າ​ເລື່ອງ​ແມ່​ໃຈ​ໂຫດ​ທໍ­ລະ­ມານ​ລູກ​ຍິງ ອາ­ຍຸ 8 ເດືອນ​ຂອງ​ຕົນ​ເອງ ໃຫ້​ຢູ່​ກັບ​ສະ­ພາບ​ອາ­ກາດ​ໜາວ​ສະ­ບັ້ນ ເປັນ​ເວ­ລາ 20 ຊົ່ວ­ໂມງ ແຕ່​ໂຊກ​ດີ​ເດັກ​ສາ­ມາດ​ລອດ​ຊີ­ວິດ ແຕ່​ກໍ່​ຢູ່​ໃນ​ອາ­ການ​ອ່ອນ­ເພຍ ແລະ ມີ​ຄວາມ​ສ່ຽງ​ເຖິງ​ແກ່​ຊີ­ວິດ​ໃນ­ຕໍ່­ໜ້າ ແມ່​ໃຈ­ດຳ​ຄົນ​ນີ້ ຊື່­ວ່າ​ນາງ ອາ​ຊຸ​ກະ ກາ​ມິ ກູ​ໂບະ ນີ້​ອາ­ໄສ​ຢູ່​ຕົວ​ເມືອງ​ໂຊະ​ກະ ເທ­ສະ​ບານ​ເມືອງ​ໄຊ​ຕາ​ມະ ນາງ​ມີ​ລູກ​ຊາຍ​ອາ­ຍຸ 2 ປີ 1 ຄົນ ແລະ ລູກ​ສາວ​ຜູ້​ເຄາະ​ຮ້າຍ​ອາ­ຍຸ 8 ເດືອນ ເຫດ​ຮ້າຍ​ເກີດ​ຂຶ້ນ​ເວ­ລາ​ນາງ ກາ​ມິ ກູ​ໂບະ ພາ​ລູກ​ໄປ​ຢາມ​ເຮືອນ​ຜູ້​ເປັນ​ແມ່​ຢູ່​ໂຕ​ກຽວ ບ່ອນ​ທີ່​ນາງ​ໄດ້​ຕັ້ງ­ໃຈ​ປະ​ລູກ​ສາວ​ໃຫ້​ຕາຍ​ໜາວ​ຢູ່​ຫ້ອງ​ນ້ຳ ກ່ອນ​ຈະ​ປົບ​ກັບ​ຄືນ​ເຮືອນ ພາຍ­ຫຼັງ​ຖືກ​ຈັບ​ກຸມ ແລະ ຕິດ​ຂໍ້​ຫາ​ປ່ອຍ­ປະ ແລະ ເຮັດ​ໃຫ້​ຜູ້​ອື່ນ​ບາດ­ເຈັບ ນາງ ກາ​ມິ ກູ​ໂບະ ສາ­ລະ­ພາບ​ວ່າ ນາງ​ພົບ​ຄວາມ​ຫຍຸ້ງ­ຍາກ​ໃນ​ການ​ລ້ຽງ​ລູກ ແລະ ບໍ່​ມີ​ຄວາມ​ຮັກ​ຕໍ່​ລູກ​ສາວ​ຄົນ​ນີ້ ໂຊກ​ດີ​ທີ່​ຜູ້​ເປັນ​ແມ່​ໄດ້​ພົບ​ຫຼານ​ສາວ​ໃນ​ຫ້ອງ​ນ້ຳ ແລ້ວ​ຮີບ​ຮ້ອນ​ນຳ​ສົ່ງ​ໂຮງ­ໝໍ.

ຂ່າວທີ່ກ່ຽວຂ້ອງ