ຂ່າວຫຼ້າສຸດ

ງານກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຖືກເລື່ອນໄປທ້າຍປີ 2019

201 25 ກ.ຍ. 2018 ວົງຈອນກີລາ
ງານກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຖືກເລື່ອນໄປທ້າຍປີ 2019

    ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ ແຂວງ​ຊຽງ​ຂວາງ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ບານ​ເປີດ​ກວ້າງ ຄັ້ງ​ທີ II ປີ 2018 ວ່າ: ເພື່ອ​ຊີ້​ແຈງ​ກ່ຽວ​ກັບ​ກໍ­ລະ­ນີ​ທີ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ອອກ​ແຈ້ງ​ການ​ສະ­ບັບ​ລົງ​ວັນ​ທີ 14 ກັນ­ຍາ 2018 ເຫັນ​ດີ​ໃຫ້​ເລື່ອນ​ການ​ຈັດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ຈະ​ເປັນ​ເຈົ້າ­ພາບ​ໃນ​ວັນ​ທີ 11–21 ພະ­ຈິກ 2018 ອອກ​ໄປ​ເປັນ​ວັນ​ທີ 11–21 ພະ­ຈິກ 2019 ເຊິ່ງ​ເຫດ­ຜົນ​ທີ່​ລັດ­ຖະ­ບານ​ເຫັນ​ດີ​ໃຫ້​ເລື່ອນ​ບໍ່​ແມ່ນ​ຍ້ອນ​ສາ­ເຫດ​ທີ່​ວ່າ​ແຂວງ​ຊຽງ​ຂວາງ​ກະ­ກຽມ ພື້ນ­ຖານ​ໂຄງ​ລ່າງ​ບໍ່​ທັນ​ແຕ່​ຢ່າງ­ໃດ ເພາະ​ລັດ­ຖະ­ບານ​ໄດ້​ສະ­ໜອງ​ງົບ­ປະ­ມານ ເຂົ້າ​ໃນ​ການ​ກະ­ກຽມ​ພື້ນ­ຖານ​ໂຄງ​ລ່າງ​ຢ່າງ​ພຽງ­ພໍ​ກັບ​ຄວາມ​ຕ້ອງ­ການ ເປັນ­ຕົ້ນ ສະ­ໜາມ​ທີ່​ຈະ​ໃຊ້​ເຂົ້າ​ໃນ​ພິ­ທີ​ເປີດ-ປິດ​ສະ­ໜາມ​ແຂ່ງ­ຂັນ​ກີ­ລາ​ແຕ່​ລະ​ປະ­ເພດ ສະ­ຖານ­ທີ່​ພັກ​ເຊົາ​ຂອງ​ຄູ​ເຝິກ ນັກ­ກີ­ລາ ແລະ ອື່ນໆ ເຫດ­ຜົນ​ທີ່­ແທ້​ຈິງ​ກໍ່​ຄື​ເນື່ອງ​ຈາກ​ໃນ​ລະ­ດູ­ຝົນ​ປີ​ນີ້​ຫຼາຍ​ແຂວງ​ທົ່ວ​ປະ­ເທດ ໄດ້​ປະ­ສົບ​ກັບ​ໄພ​ນ້ຳ​ຖ້ວມ​ຢ່າງ​ຮ້າຍ​ແຮງ ເຮັດ​ໃຫ້​ສູນ​ເສຍ​ຊີ­ວິດ ແລະ ຊັບ​ສິນ​ເປັນ​ຈຳ­ນວນ​ຫຼວງ­ຫຼາຍ ໂດຍ​ສະ­ເພາະ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື.

    ງານ​ແຂ່ງ­ຂັນ​ກີ­ລາ​ຖື​ວ່າ​ແມ່ນ​ການ­ເຄື່ອນ­ໄຫວ​ກິດ­ຈະ­ກຳ​ປະ­ເພດ​ໜຶ່ງ ທີ່​ສ້າງ​ຄວາມ​ເບີກ­ບານ​ມ່ວນ­ຊື່ນ ແຕ່​ເມື່ອ​ໄພ​ທຳ​ມະ​ຊາດ​ໄດ້​ເກີດ​ຂຶ້ນ​ຢ່າງ​ຮ້າຍ​ແຮງ​ແບບ​ນີ້ ຈົນ​ເຮັດ​ໃຫ້​ປະ­ຊາ­ຊົນ​ລາວ​ທັງ­ຫຼາຍ​ຕ້ອງ​ຕົກ​ຢູ່​ໃນ​ຄວາມ​ໂສກ­ເສົ້າ ບວກ​ກັບ​ຫຼາຍ​ແຂວງ​ກໍ່​ຍັງ​ຂາດ​ງົບ­ປະ­ມານ​ບໍ່​ພຽງ­ພໍ​ໃນ​ການ​ກະ­ກຽມ​ນັກ­ກີ­ລາ ເຊິ່ງ​ຈະ​ເຮັດ​ໃຫ້​ຫຼາຍ​ແຂວງ​ເຖິງ​ວ່າ​ຈະ​ສາ­ມາດ​ສົ່ງ​ນັກ­ກີ­ລາ​ເຂົ້າ​ຮ່ວມ​ການ​ແຂ່ງ­ຂັນ​ໄດ້ ແຕ່​ກໍ່​ອາດ​ເປັນ​ການ​ເຂົ້າ​ຮ່ວມ​ການ​ແຂ່ງ­ຂັນ​ທີ່​ບໍ່​ເຕັມ​ເມັດ​ເຕັມ​ໜ່ວຍ ຫຼື ເຂົ້າ​ຮ່ວມ​ຕາມ​ຂະ​ບວນ​ການ​ເທົ່າ​ນັ້ນ.

    ທ່ານ​ກ່າວ​ຕື່ມ​ວ່າ: ລັດ­ຖະ­ບານ​ເຫັນ​ດີ​ໃຫ້​ເລື່ອນ​ຈັດ​ງານ​ອອກ​ໄປ​ຖື​ວ່າ​ເປັນ​ການ​ຕັດ­ສິນ​ໃຈ​ທີ່​ຖືກ­ຕ້ອງ ແລະ ສອດ­ຄ່ອງ​ກັບ​ຄວາມ​ເປັນ​ຈິງ ອົງ­ການ​ປົກ­ຄອງ​ແຂວງ​ຊຽງ​ຂວາງ ຈຶ່ງ​ເຫັນ​ດີ​ນຳ ແລະ ໄດ້​ແຈ້ງ​ຂ່າວ​ໃຫ້​ປະ­ຊາ­ຊົນ​ພາຍ​ໃນ​ແຂວງ​ໄດ້​ຮັບ​ຮູ້ ແລະ ທຸກ​ຄົນ ກໍ່​ເຫັນ​ດີ​ເປັນ​ເອ­ກະ​ພາບ​ນຳ​ເຊັ່ນ​ກັນ ພ້ອມ​ທັງ​ເຂົ້າ­ໃຈ​ກ່ຽວ​ກັບ​ສະ­ຖານ​ນະ​ການ​ທີ່​ເກີດ​ຂຶ້ນ ເຖິງ​ແມ່ນ​ວ່າ​ປະ­ຊາ­ຊົນ ກໍ່​ຄື ຫົວ­ໜ່ວຍ​ທຸ­ລະ​ກິດ​ຈຳ­ນວນ​ໜຶ່ງ​ພາຍ​ໃນ​ແຂວງ ຈະ​ໄດ້​ກະ­ກຽມ​ຕ້ອນ­ຮັບ​ຄະ­ນະ​ນຳ ແລະ ນັກ­ກີ­ລາ ລວມ​ເຖິງ​ນັກ​ທ່ອງ​ທ່ຽວ​ທີ່​ຈະ​ເດີນ­ທາງ​ໄປ​ທ່ອງ​ທ່ຽວ ໃນ​ໂອ­ກາດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ກໍ່​ຕາມ​ຈາກ​ນີ້​ໄປ​ແຂວງ​ຊຽງ​ຂວາງ ກໍ່​ຈະ​ມີ​ເວ­ລາ​ຍາວ​ອອກ​ໄປ​ຕື່ມ ເພື່ອ​ກະ­ກຽມ​ຈັດ​ງານ​ກີ­ລາ​ຄັ້ງ​ນີ້​ຢ່າງ​ເຕັມ­ທີ່ ແລະ ຈະ​ເຮັດ​ໃຫ້­ການ​ເປັນ​ເຈົ້າ­ພາບ​ໃນ​ຄັ້ງ​ນີ້ ບັນ­ລຸ​ຜົນ­ສຳ­ເລັດ​ຕາມ​ຄາດ­ໝາຍ​ທີ່​ວາງ​ໄວ້​ທຸກ​ປະ­ການ.

    ສຳ­ລັບ​ການ​ເລື່ອນ​ຈັດ​ງານ​ກີ­ລາ​ຄັ້ງ​ນີ້ ຖື​ວ່າ​ເປັນ​ຄັ້ງ​ທີ 2 ແລ້ວ ພາຍ­ຫຼັງ​ທີ່​ເຄີຍ​ເລື່ອນ​ມາ​ແລ້ວ​ຄັ້ງ​ໜຶ່ງ​ໃນ​ທ້າຍ​ປີ 2017 ເນື່ອງ​ຈາກ​ການ​ກະ­ກຽມ​ພື້ນ­ຖານ​ໂຄງ​ລ່າງ ໂດຍ​ສະ­ເພາະ ສະ­ໜາມ​ເປີດ-ປິດ​ການ​ແຂ່ງ­ຂັນ​ບໍ່​ສາ­ມາດ​ກໍ່­ສ້າງ​ສຳ­ເລັດ​ແລ້ວ ທັນ​ຕາມ​ເວ­ລາ​ທີ່​ໄດ້​ກຳ­ນົດ​ໄວ້.

ຂ່າວທີ່ກ່ຽວຂ້ອງ