ປັບປຸງການຈັດຕັ້ງລັດວິສາຫະກິດການບິນລາວ

172 25 ກ.ຍ. 2018 ຂ່າວໜ້າ​ໜຶ່ງ
ປັບປຸງການຈັດຕັ້ງລັດວິສາຫະກິດການບິນລາວ

    ລັດ​ວິ​ສາ​ຫະ​ກິດ​ການ­ບິນ​ລາວ ຈັດ​ພິ­ທີ​ປະ­ກາດ​ມອບ-ຮັບ​ໜ້າ­ທີ່​ລະ­ຫວ່າງ​ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ການ­ບິນ​ລາວ​ຜູ້​ເກົ່າ ແລະ ຜູ້​ໃໝ່ ຂຶ້ນ​ວັນ​ທີ 24 ກັນ­ຍາ 2018 ຢູ່​ລັດ​ວິ​ສາ​ຫະ​ກິດ​ດັ່ງ­ກ່າວ ໂດຍ​ມີ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ທ່ານ ສຸກ​ຄຳ​ເພັດ ເຮືອງ​ບຸດ​ສີ ຮອງ​ປະ­ທານ​ອົງ­ການ​ກວດ­ກາ​ລັດ­ຖະ­ບານ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ລັນ ແສງ​ອາ­ພອນ ຫົວ­ໜ້າ​ກົມ​ຈັດ​ຕັ້ງ-ພະ­ນັກ­ງານ ກະ­ຊວງ ຍທຂ ໄດ້​ຜ່ານ​ຂໍ້​ຕົກ­ລົງ​ຂອງ​ກະ­ຊວງ ຍທຂ ວ່າ​ດ້ວຍ​ການ​ຍົກ­ຍ້າຍ​ທ່ານ ສົມ​ພອນ ດວງ​ດາ­ລາ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ການ­ບິນ​ລາວ (ຜູ້​ເກົ່າ) ໄປ​ສັງ­ກັດ​ຢູ່​ຫ້ອງ­ການ​ກະ­ຊວງ ຍທຂ ແລະ ຜ່ານ​ດຳ­ລັດ​ວ່າ​ດ້ວຍ​ການ​ແຕ່ງ­ຕັ້ງ​ທ່ານ ບຸນ​ມາ ຈັນ­ທະ​ວົງ­ສາ ເປັນ​ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ການ­ບິນ​ລາວ (ຜູ້​ໃໝ່).

    ໂອ­ກາດ​ນີ້ ທ່ານ ບຸນ​ຈັນ ສິນ​ທະ​ວົງ ກໍ່​ໄດ້​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ທ່ານ​ທີ່​ໄດ້​ຮັບ​ການ​ແຕ່ງ­ຕັ້ງ ແລະ ຮັບ​ໜ້າ­ທີ່​ໃໝ່​ຄັ້ງ​ນີ້ ພ້ອມ​ທັງ​ຮຽກ­ຮ້ອງ​ໃຫ້​ບັນ­ດາ​ຄະ­ນະ​ພັກ ຄະ­ນະ​ອຳ­ນວຍ​ການ ພະ­ນັກ­ງານ ສະ­ມາ­ຊິກ​ພັກ​ໃນ​ລັດ​ວິ​ສາ​ຫະ​ກິດ​ການ­ບິນ​ລາວ ຈົ່ງ​ພ້ອມ​ກັນ​ໃຫ້­ການ​ຮ່ວມ​ມື ສະ­ໜັບ­ສະ­ໜູນ​ຊ່ວຍ­ເຫຼືອ​ສະ­ຫາຍ​ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ການ­ບິນ​ລາວ​ຜູ້​ໃໝ່ ເພື່ອ​ໃຫ້​ສາ­ມາດ​ປະ­ຕິ­ບັດ​ໜ້າ­ທີ່​ວຽກ​ງານ​ຕ່າງໆ​ໃຫ້​ສຳ­ເລັດ​ຕາມ​ການ​ມອບ​ໝາຍ ແລະ ຮຽກ­ຮ້ອງ​ໃຫ້​ສະ­ຫາຍ​ທີ່​ຖືກ​ແຕ່ງ­ຕັ້ງ​ຈົ່ງ​ບຸກ​ບືນ​ສູ້​ຊົນ ຍົກ​ສູງ​ຄວາມ​ຮັບ­ຜິດ­ຊອບ​ຂອງ​ຕົນ ເສີມ​ຂະ­ຫຍາຍ​ສະ­ຕິ​ປັນ­ຍາ ຄວາມ​ຮູ້-ຄວາມ​ສາ­ມາດ​ຂອງ​ຕົນ ສູ້​ຊົນ​ປະ­ຕິ­ບັດ​ໜ້າ­ທີ່​ຂອງ​ຕົນ​ໃຫ້​ສຳ­ເລັດ​ຜົນ.

ຂ່າວທີ່ກ່ຽວຂ້ອງ