ຂ່າວຫຼ້າສຸດ

ໄພພິບັດທຳມະຊາດອາດ ສົ່ງຜົນກະທົບໃຫ້ຕົວເລກນັກທ່ອງທ່ຽວບໍ່ບັນລຸ

188 25 ກ.ຍ. 2018 ຂ່າວໜ້າ​ໜຶ່ງ
ໄພພິບັດທຳມະຊາດອາດ ສົ່ງຜົນກະທົບໃຫ້ຕົວເລກນັກທ່ອງທ່ຽວບໍ່ບັນລຸ

    ນັບ​ແຕ່​ເດືອນ​ກໍ­ລະ­ກົດ​ເປັນ­ຕົ້ນ​ມາ ໄດ້​ມີ​ພາ­ຍຸ​ຫຼາຍ​ຫົວ​ພັດ​ຜ່ານ​ເຂົ້າ​ມາ​ລາວ ສົ່ງ​ຜົນ​ໃຫ້​ທຸກ​ແຂວງ​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ ລວມ​ເຖິງ​ພື້ນ­ຖານ​ໂຄງ​ລ່າງ​ສະ­ຖານ­ທີ່​ທ່ອງ​ທ່ຽວ​ຈຳ­ນວນ​ໜຶ່ງ​ໄດ້​ເປ່​ເພ​ເສຍ​ຫາຍ ສະ­ນັ້ນ ຕໍ່​ກັບ​ຜົນ​ກະ­ທົບ​ດັ່ງ­ກ່າວ​ອາດ​ເຮັດ​ໃຫ້​ທ້າຍ​ປີ 2018 ຕົວ​ເລກ​ນັກ​ທ່ອງ​ທ່ຽວ​ອາດ​ບໍ່​ບັນ­ລຸ 5 ລ້ານ​ເທື່ອ​ຄົນ ຕາມ​ທີ່​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ວາງ​ຄາດ­ໝາຍ​ໄວ້.

    ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ​ວັດ­ທະ­ນະ­ທຳ ແລະ ທ່ອງ​ທ່ຽວ ໄດ້​ໃຫ້​ສຳ­ພາດ​ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ບານ​ເປີດ​ກວ້າງ​ຄັ້ງ II ວ່າ: ຂະ­ແໜງ​ການ­ທ່ອງ­ທ່ຽວ​ໃນ 6 ເດືອນ​ຕົ້ນ​ປີ­ຜ່ານ­ມາ ໄດ້​ພັດ­ທະ­ນາ​ພື້ນ­ຖານ​ໂຄງ​ລ່າງ​ການ­ທ່ອງ­ທ່ຽວ​ໄດ້​ດີ​ສົມ­ຄວນ​ໂດຍ​ອີງ­ໃສ່​ງົບ­ປະ­ມານ​ຂອງ​ລັດ ແລະ ງົບ­ປະ­ມານ​ທີ່​ໄດ້​ຮັບ​ການ​ກູ້​ຢືມ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ງົບ­ປະ­ມານ​ຊ່ວຍ­ເຫຼືອ​ຈາກ​ບັນ­ດາ​ປະ­ເທດ​ອ້າຍ​ນ້ອງ​ຕ່າງໆ ໂດຍ​ໄດ້​ນຳ­ໄປ​ປັບ­ປຸງ​ເສັ້ນ­ທາງ ແລະ ທ່າ­ເຮືອ​ທີ່​ເດີນ­ທາງ​ໄປ​ຫາ​ແຫຼ່ງ​ທ່ອງ​ທ່ຽວ​ໃຫ້​ໄດ້​ຮັບ​ການ​ປັບ­ປຸງ​ດີ​ຂຶ້ນ​ເທື່ອ​ລະ​ກ້າວ ນອກ​ນັ້ນ ພາກ​ເອ­ກະ​ຊົນ​ກໍ່​ໄດ້​ເຂົ້າ​ຮ່ວມ​ເປັນ​ຢ່າງ​ດີ​ໃນ​ການ​ສືບ­ຕໍ່​ສ້າງ​ໂຮງ­ແຮມ ເຮືອນ​ພັກ​ຕ່າງໆ​ໃຫ້​ມີ​ຄຸ­ນະ­ພາບ​ດີ​ຂຶ້ນ​ເຊິ່ງ​ເປັນ​ພື້ນ­ຖານ​ສາ­ມາດ​ຮອງ​ຮັບ​ນັກ​ທ່ອງ​ທ່ຽວ​ທີ່​ອາດ​ຈະ​ເດີນ­ທາງ​ເຂົ້າ​ມາ​ລາວ​ເພີ່ມ​ຂຶ້ນ ແລະ ພາຍ­ຫຼັງ​ປະ­ກາດ​ປີ​ທ່ອງ​ທ່ຽວ​ລາວ 2018 ບັນ­ດາ​ແຂວງ​ຕ່າງໆ ໄດ້​ຈັດ​ຫຼາຍ​ກິດ­ຈະ­ກຳ​ເພື່ອ​ສະ­ຫຼອງ​ປີ​ທ່ອງ​ທ່ຽວ​ລາວ​ຢ່າງ​ຄຶກ­ຄື້ນ ດ້ວຍ​ຈິດ­ໃຈ​ທີ່​ປະ­ຢັດ​ມັດ­ທະ­ຍັດ​ຖືກ​ຕາມ​ສະ­ພາບ​ໃນ​ປັດ­ຈຸ­ບັນ ແຕ່​ກໍ່​ຍັງ​ມີ​ຄວາມ​ຄຶກ­ຄື້ນ​ມ່ວນ­ຊື່ນ​ດີ​ສົມ­ຄວນ​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ລາວ​ໄດ້​ຫຼາຍ​ຂຶ້ນ ໃນ 6 ເດືອນ​ຕົ້ນ​ປີ​ມີ​ນັກ​ທ່ອງ​ທ່ຽວ​ເຂົ້າ​ມາ​ຈຳ­ນວນ 2.100.000 ກວ່າ​ຄົນ ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ­ຜ່ານ­ມາ​ເພີ່ມ​ຂຶ້ນ 6% ແຕ່​ເນື່ອງ​ຈາກ​ໃນ​ໄລ­ຍະ 6 ເດືອນ​ທ້າຍ​ປີ 2018 ບັນ­ດາ​ແຂວງ​ໃນ​ທົ່ວ​ປະ­ເທດ ຕ້ອງ​ປະ­ສົບ​ກັບ​ໄພ​ນ້ຳ​ຖ້ວມ​ຢ່າງ​ໜັກ­ໜ່ວງ ຈຶ່ງ​ອາດ​ຈະ​ສົ່ງ​ຜົນ​ກະ­ທົບ​ຕໍ່​ການ​ດຶງ​ດູດ​ນັກ​ທ່ອງ​ທ່ຽວ​ຕ່າງ­ປະ­ເທດ ເຂົ້າ​ມາ​ລາວ​ໃຫ້​ໄດ້​ຕາມ​ທີ່​ວາງ​ຄາດ­ໝາຍ​ໄວ້​ສຳ­ລັບ​ປີ​ທ່ອງ​ທ່ຽວ​ລາວ 2018 ດ້ວຍ​ເຫດ​ນີ້​ໃນ​ໄລ­ຍະ​ທ້າຍ​ປີ​ນີ້ ກະ­ຊວງ ຖວ​ທ ຈຶ່ງ​ໄດ້​ດຳ­ເນີນ​ຫຼາຍ​ມາດ​ຕະ­ການ ເພື່ອ​ຊ່ວຍ​ກະ​ຕຸ້ນ​ເຮັດ​ໃຫ້​ນັກ​ທ່ອງ​ທ່ຽວ​ຕ່າງ­ປະ­ເທດ​ເຂົ້າ​ມາ​ທ່ອງ​ທ່ຽວ​ລາວ​ໃຫ້​ຫຼາຍ​ຂຶ້ນ ເປັນ­ຕົ້ນ: ສືບ­ຕໍ່​ຈັດ​ຕັ້ງ​ບັນ­ດາ​ກິດ­ຈະ­ກຳ​ສົ່ງ­ເສີມ​ການ­ທ່ອງ­ທ່ຽວ​ຢູ່​ທັງ​ຂັ້ນ​ສູນ​ກາງ ແລະ ທ້ອງ­ຖິ່ນ ຕາມ​ແຜນ­ທີ່​ກຳ­ນົດ​ໄວ້​ໃຫ້​ຄົບ ສືບ­ຕໍ່​ຊຸກ­ຍູ້​ສົ່ງ­ເສີມ​ພາກ​ເອ­ກະ​ຊົນ​ໃຫ້​ປັບ­ປຸງ ແລະ ກໍ່­ສ້າງ​ພື້ນ­ຖານ​ໂຄງ​ລ່າງ​ຮັບ​ໃຊ້​ການ­ທ່ອງ­ທ່ຽວ​ໃຫ້​ຫຼາຍ​ຂຶ້ນ ແລະ ສືບ­ຕໍ່​ໂຄ­ສະ­ນາ​ກ່ຽວ​ກັບ​ການ­ທ່ອງ­ທ່ຽວ​ລາວ​ຜ່ານ​ສື່​ມວນ​ຊົນ​ທັງ​ພາຍ​ໃນ ແລະ ຕ່າງ­ປະ­ເທດ​ໃຫ້​ຫຼາຍ​ຂຶ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ