ຂ່າວຫຼ້າສຸດ

DMZ ກາຍເປັນ​ສະຖານທີ່​ທ່ອງ​ທ່ຽວ​ແຫ່ງ​ສັນຕິພາບ

483 24 ກ.ຍ. 2018 ຂ່າວຕ່າງປະເທດ
DMZ ກາຍເປັນ​ສະຖານທີ່​ທ່ອງ​ທ່ຽວ​ແຫ່ງ​ສັນຕິພາບ

     ເມື່ອ​ວັນ​ທີ 20 ກັນຍາ​ນີ້ ສ ເກົາຫຼີ ໄດ້​ສ້າງຕັ້ງ​ສະພາ​ໜຶ່ງ​ຂຶ້ນ​ມາ ໂດຍ​ມີໜ້າ​ທີ່​ຫັນ​ເອົາ​ເຂດ​ປອດ​ການ​ທະຫານ (DMZ) ທີ່​ເປັນ​ຈຸດ​ແບ່ງ​ສອງ​ພາກ​ເກົາຫຼີ ນັ້ນ​ໃຫ້​ກາຍເປັນ​ເຂດ​ທ່ອງ​ທ່ຽວ​ແຫ່ງ​ສັນຕິພາບ ໂດຍ​ຜ່ານ​ນັ້ນ​ກໍ​ເປັນ​ການ​ປະຕິບັດ​ຕາມ​ຄຳ​ສັນຍາ ຊຶ່ງ​ທ່ານ ມູນ​ເຈ​ອິນ ປະທານາທິບໍດີ            ສ ເກົາຫຼີ  ແລະ​ທ່ານ ກິມ​ເຈິງ​ອູນ ຜູ້ນຳ​ຂອງ ​ສປປ ເກົາຫຼີ  ນຳ​ອອກ​ມາ​ຢູ່​ໃນ​ການ​ພົບ​ປະ​ສຸດ​ຍອດ​ຄັ້ງ​ທີ​ສາມ ຢູ່​ທີ່​ນະຄອນຫຼວງ​ພຽງ​ຢາງ ຂອງ ​ສປປ ເກົາຫຼີ ຊຶ່ງ​ໄດ້​ດຳເນີນ​ໄປ​ແຕ່​ວັນ​ທີ 18-20 ກັນຍາ​ທີ່​ຜ່ານ​ມາ.

    ກະຊວງ​ວັດທະນະທຳ ກິລາ ແລະ​ທ່ອງ​ທ່ຽວ​ຂອງ ສ ເກົາຫຼີ ແລະ​ອົງ​ການທ່ອງທ່ຽວ​ຂອງ ​ສປປ ເກົາຫຼີ ໄດ້​ລົງ​ນາມ​ຂໍ້​ຕົກລົງ​ກັບ​ທ້ອງຖິ່ນ 13 ແຫ່ງ ທີ່​ຕັ້ງ​ຢູ່​ໃກ້​ກັບ DMZ ເພື່ອ​ຊຸກຍູ້​ການເຄື່ອນໄຫວ​ພັດທະນາ​ເຂດ​ດັ່ງກ່າວ ໃຫ້​ເປັນ​ສະຖານທີ່​ທ່ອງ​ທ່ຽວ​ແຫ່ງ​ສັນຕິພາບ.

    ຕາມ​ຂໍ້​ຕົກລົງ​ດັ່ງກ່າວ​ນັ້ນແລ້ວ ຝ່າຍ​ຕ່າງໆ​ທີ່​ເຂົ້າ​ຮ່ວມ ຊຶ່ງ​ນຳ​ໂດຍ​ທ່ານ ໂຣ​ເຕ​ກາງ ຮອງ​ລັດຖະມົນຕີ​ກະຊວງ ວັດທະນະທຳ ກິລາ ແລະ​ທ່ອງ​ທ່ຽວ​ຂອງ ສ ເກົາຫຼີ ໃຫ້​ສັນຍາ​ວ່າ​ຈະ​ສ້າງ​ລະບົບ​ການ​ຮ່ວມ​ມື​ຂຶ້ນ​ມາ ເພື່ອ​ຫັນ DMZ ໃຫ້​ກາຍເປັນ​ສະຖານທີ່​ທ່ອງ​ທ່ຽວ ແລະ ພ້ອມ​ກັນ​ນຳ​ສະເໜີ​ເນື້ອ​ໃນ​ການ​ພັດທະນາ​ການທ່ອງທ່ຽວ​ໃໝ່ ພ້ອມ​ທັງ​ຊຸກຍູ້​ການ​ພັດທະນາ​ແບບ​ຍືນ​ຍົງ.

    ສະພາ​ດັ່ງກ່າວ​ໄດ້​ເຂົ້າ​ສູ່​ການເຄື່ອນໄຫວ​ໜຶ່ງ​ມື້ ຫຼັງ​ຈາກ​ທີ່​ປະທານາທິບໍດີ ມູນ​ເຈ​ອິນ ແລະ​ທ່ານ​ຜູ້ນຳ ກິມ​ເຈິງ​ອູນ  ລົງ​ນາມ​ຖະແຫຼງການ​ຮ່ວມ ເດືອນ​ກັນຍາ ຊຶ່ງ​ມີ​ຂຶ້ນ​ເມື່ອ​ວັນ​ທີ 19 ກັນຍາ​ທີ່​ຜ່ານ​ມາ ໃນ​ນັ້ນ​ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ຫັນ​ເອົາ​ເຂດ​ຊາຍ​ແດນ​ລະຫວ່າງ​ສອງ​ພາກ​ເກົາຫຼີ ໃຫ້​ກາຍເປັນ​ເຂດ​ແຫ່ງ​ສັນຕິພາບ ຊຶ່ງ​ຕາມ​ນັ້ນແລ້ວ​ກໍ​ແມ່ນ ສ ເກົາຫຼີ ແລະ ​ສປປ ເກົາຫຼີ ຈະ​ຖອນ​ປ້ອມ​ຍາມ​ຊາຍ​ແດນ​ຂອງ​ແຕ່​ລະ​ຝ່າຍ​ອອກ​ໄປ 11 ແຫ່ງ ກ່ອນ​ທ້າຍ​ປີ​ນີ້ ທັ້ງ​ນີ້​ກໍ​ເພື່ອ​ເປັນ​ການ​ຫຼຸດຜ່ອນ​ການ​ກະທຳ​ທີ່​ເປັນ​ປໍ​ລະ​ປັກ​ຕໍ່​ກັນ.

    ສອງ​ຝ່າຍ​ຈະ​ສ້າງ​ເຂດ​ກັນ​ຊົນ​ຂຶ້ນ​ມາ ຢູ່​ໃກ້​ກັບ​ເສັ້ນ​ແດນ​ດ້ານ​ການ​ທະຫານ ທີ່​ເປັນ​ຈຸດ​ແບ່ງ​ຂອງ​ສອງ​ພາກ​ເກົາຫຼີ ຢູ່​ໃນ​ທະເລ​ເຫຼືອງ ກໍ​ຄື​ເທິງ​ບົກ ເພື່ອ​ງົດ​ການ​ຝຶກ​ຊ້ອມ​ຂອງ​ທະຫານ​ປືນ​ໃຫຍ່ ແລະ​ທະຫານ​ເຮືອ. ສ ເກົາຫຼີ ແລະ ​ສປປ ເກົາຫຼີ ກໍ​ຈະ​ສ້າງ​ເຂດ​ຫ້າມ​ບິນ​ຢູ່​ໃນ​ເຂດ​ຊາຍ​ແດນ ເພື່ອ​ຫຼີກເວັ້ນ​ການ​ເກີດ​ອຸບັດເຫດ. ການ​ຊ້ອມ​ຮົບ ຢູ່​ໃກ້​ກັບ​ເສັ້ນ​ແດນ​ການ​ທະຫານ​ຂອງ​ສອງ​ພາກ​ເກົາຫຼີ  ຈະ​ຢຸດຕິ​ລົງ ນັບ​ແຕ່​ວັນ​ທີ 1 ພຶດສະພາ​ໜ້າ​ນີ້​ເປັນຕົ້ນ​ໄປ ພ້ອມ​ກັນ​ນັ້ນ​ກໍ​ຜັນ​ຂະຫຍາຍ​ການ​ເກັບ​ກູ້ໝາກ​ມິ່ນ.

    ສ ເກົາຫຼີ ແລະ ​ສປປ ເກົາຫຼີ ກໍ​ໄດ້​ຊຸກຍູ້​ຄວາມ​ພະຍາຍາມ​ຮ່ວມ​ກັນ​ເປັນ​ເທື່ອ​ທຳ​ອິດ ເພື່ອ​ຄົ້ນ​ຫາ​ອັດຖິ​ຂອງ​ບັນດາ​ພົນທະຫານ​ທີ່​ເສຍ​ຊີວິດ​ຢູ່​ໃນ​ສະໜາມຮົບ ໃນ​ລະຫວ່າງ​ສົງຄາມ​ເກົາຫຼີ ຢູ່​ໃນ​ເຂດ  DMZ ແລະ​ຢູ່​ໃນ​ເຂດ​ການ​ຫາ​ປາ​ຮ່ວມ​ກັນ ຢູ່​ໃນ​ເຂດ​ຊາຍ​ແດນ​ທິດຕາເວັນຕົກ​ອີກ​ດ້ວຍ.

 

ຂ່າວທີ່ກ່ຽວຂ້ອງ