ຂ່າວຫຼ້າສຸດ

ລາວ-ຫວຽດນາມ ແລກປ່ຽນບົດຮຽນສະພາປະຊາຊົນທ້ອງຖິ່ນ

1.824 24 ກ.ຍ. 2018 ຂ່າວໜ້າ​ໜຶ່ງ
ລາວ-ຫວຽດນາມ ແລກປ່ຽນບົດຮຽນສະພາປະຊາຊົນທ້ອງຖິ່ນ

    ສະ​ຖາ​ບັນ​ຄົ້ນ­ຄວ້າ​ນິ­ຕິ​ກຳ ສະ­ພາ​ແຫ່ງ​ຊາດ ຮ່ວມ​ກັບ​ສະ­ພາ​ປະ­ຊາ­ຊົນ​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ ຈັດ​ສຳ​ມະ​ນາ​ແລກ­ປ່ຽນ​ບົດ­ຮຽນ ລະ­ຫວ່າງ​ສະ­ພາ​ປະ­ຊາ­ຊົນ ນະ­ຄອນ​ໂຮ່​ຈີ​ມິງ ແລະ ສະ­ພາ​ປະ­ຊາ­ຊົນ ບັນ­ດາ​ແຂວງ​ພາກ​ກາງ ແລະ ພາກ​ໃຕ້​ຂອງ ສປປ ລາວ ຂຶ້ນ​ວັນ​ທີ 20 ກັນ­ຍາ 2018 ຢູ່​ໂຮງ­ແຮມ​ຈຳ­ປາ​ສັກ​ແກຣນ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ຄຳ​ເຜີຍ ປານ​ມະ​ໄລ​ທອງ ຫົວ­ໜ້າ​ສະ​ຖາ​ບັນ​ນິ­ຕິ​ກຳ ສະ­ພາ​ແຫ່ງ​ຊາດ ທ່ານ ເມກ​ສະ­ຫວັນ ພົມ​ພິ​ທັກ ປະ­ທານ​ສະ­ພາ​ປະ­ຊາ­ຊົນ​ແຂວງ​ຈຳ­ປາ​ສັກ ແລະ ທ່ານ​ນາງ ຫງວ​ຽນ ທິ ກວຽດ ເຕິມ ປະ­ທານ​ສະ­ພາ​ປະ­ຊາ­ຊົນ​ນະ­ຄອນ​ໂຮ່​ຈີ​ມິງ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ​ມະ​ນາ​ຄັ້ງ​ນີ້ ໄດ້​ຮັບ​ຟັງ​ບົດ­ຮຽນ​ຂອງ​ສະ­ພາ​ປະ­ຊາ­ຊົນ​ນະ­ຄອນ​ໂຮ່​ຈີ​ມິງ ກ່ຽວ​ກັບ​ປະ­ສົບ​ການ​ໃນ​ການ​ຄົ້ນ­ຄວ້າ ແລະ ພິ­ຈາ­ລະ­ນາ​ຮັບ­ຮອງ​ເອົາ​ແຜນ​ງົບ­ປະ­ມານ​ຂອງ​ທ້ອງ­ຖິ່ນ ການ​ນຳ​ໃຊ້​ຜົນ​ຂອງ​ການ​ກວດ​ສອບ​ແຫ່ງ​ລັດ ການ​ຄົ້ນ­ຄວ້າ ແລະ ຮັບ­ຮອງ​ເອົາ​ຕົວ​ເລກ GDP ການ​ພິ­ຈາ­ລະ­ນາ​ຄົ້ນ­ຄວ້າ ແລະ ຮັບ­ຮອງ​ເອົາ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ພ້ອມ​ນີ້ ຍັງ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ​ກ່ຽວ​ກັບ​ວຽກ​ງານ​ດັ່ງ­ກ່າວ ຢ່າງ​ກົງ​ໄປ​ກົງ​ມາ ແລະ ສາ­ມາດ​ໄດ້​ຮັບ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ ສຳ​ມະ​ນາ​ຄັ້ງ​ນີ້ ເປັນ​ການ​ປະ­ກອບ­ສ່ວນ​ສຳ­ຄັນ​ຂອງ​ຫວຽດ­ນາມ ເພື່ອ​ແບ່ງ­ປັນ​ຄວາມ​ຮູ້​ກ່ຽວ​ກັບ​ການ­ເຄື່ອນ­ໄຫວ​ວຽກ​ງານ​ສະ­ພາ​ປະ­ຊາ­ຊົນ​ທ້ອງ­ຖິ່ນ​ຂອງ ສສ ຫວຽດ­ນາມ ເຊິ່ງ​ໄດ້​ປະ­ກອບ­ສ່ວນ​ດ້ານ​ເນື້ອ​ໃນ ວິ­ທະ­ຍາ­ກອນ ງົບ­ປະ­ມານ ແລະ ອື່ນໆ.

    ທ່ານ ຄຳ​ເຜີຍ ປານ​ມະ​ໄລ​ທອງ ກ່າວ​ວ່າ: ໂດຍ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ອັນ​ເປັນ​ມູນ­ເຊື້ອ​ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຫວຽດ­ນາມ ໂດຍ​ສະ­ເພາະ ສະ­ພາ​ແຫ່ງ​ຊາດ​ ລາວ-ຫວຽດ­ນາມ ເຊິ່ງ​ການ​ຈັດ​ສຳ​ມະ​ນາ​ຮ່ວມ​ກັບ​ບັນ­ດາ​ສະ­ຫາຍ ທີ່​ເປັນ​ເສ­ນາ​ທິ​ການ​ໃຫ້​ສະ­ພາ​ປະ­ຊາ­ຊົນ​ຂັ້ນ​ແຂວງ ໃນ 8 ແຂວງ​ຂອງ​ລາວ ສະ­ພາ​ປະ­ຊາ­ຊົນ​ຂັ້ນ​ແຂວງ​ຂອງ​ລາວ ສ້າງ­ຕັ້ງ​ຂຶ້ນ​ກາງ​ປີ 2016 ແລະ ໄດ້​ເອົາ­ໃຈ­ໃສ່​ປະ­ຕິ­ບັດ​ພາ­ລະ​ບົດ­ບາດ ສິດ ແລະ ໜ້າ­ທີ່ ທີ່​ໄດ້​ກຳ­ນົດ​ໄວ້​ໃນ​ລັດ​ຖະ​ທຳ​ມະ­ນູນ ກົດ­ໝາຍ ເຊິ່ງ​ໄດ້​ມີ​ຜົນ­ງານ ແລະ ຜົນ­ສຳ­ເລັດ​ຫຼາຍ​ດ້ານ ແຕ່​ການ​ປະ­ຕິ­ບັດ​ໜ້າ­ທີ່​ດັ່ງ­ກ່າວ ຍັງ​ມີ​ບາງ​ດ້ານ​ບໍ່​ທັນ​ມີ​ປະ​ສິດ­ທິ​ຜົນ​ສູງ ແລະ ຕ້ອງ​ໄດ້​ປັບ­ປຸງ​ໃຫ້​ດີ​ຂຶ້ນ ໂດຍ​ສຳ​ມະ​ນາ​ຄັ້ງ​ນີ້ ຈະ​ເປັນ​ໂອ­ກາດ​ດີ​ເພື່ອ​ມີ​ຂໍ້​ມູນ​ທາງ​ທິດ​ສະ​ດີ ແລະ ພຶດ­ຕິ​ກຳ ໃນ​ການ​ປັບ­ປຸງ​ວຽກ​ງານ​ໃນ­ຕໍ່­ໜ້າ.

    ໂອ­ກາດ​ນີ້ ປະ­ທານ​ສະ­ພາ​ປະ­ຊາ­ຊົນ ນະ­ຄອນ​ໂຮ່​ຈີ​ມິງ ພ້ອມ​ຄະ­ນະ​ຍັງ​ໄດ້​ໄປ​ຢ້ຽມ­ຢາມ ແລະ ມອບ​ຂອງ­ຂວັນ​ໃຫ້​ໂຮງ­ຮຽນ​ມິດ­ຕະ­ພາບ ລາວ-ຫວຽດ­ນາມ ມອບ​ເງິນ​ຊ່ວຍ­ເຫຼືອ​ໃຫ້​ຄອບ­ຄົວ​ທຸກ​ຍາກ​ແຂວງ​ຈຳ­ປາ​ສັກ 21 ຄອບ­ຄົວ ແລະ ຜູ້​ຖືກ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ