ຂ່າວຫຼ້າສຸດ

ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ ເປັນ​ໄພ​ຄຸກ​ຄາມ​ຕໍ່​ຄວາມ​ເຕີບ​ໂຕ​ຂອງ​ເສດຖະກິດ​ໂລກ

140 24 ກ.ຍ. 2018 ຂ່າວຕ່າງປະເທດ
ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ ເປັນ​ໄພ​ຄຸກ​ຄາມ​ຕໍ່​ຄວາມ​ເຕີບ​ໂຕ​ຂອງ​ເສດຖະກິດ​ໂລກ

     ໃນ​ບົດ​ລາຍ​ງານ​ພາຍ​ໃຕ້​ຫົວຂໍ້​ວ່າ “ຄວາມ​ບໍ່​ສະຫງົບ​ເພີ່ມ​ຂຶ້ນ ເປັນ​ຜົນ​ກະທົບ​ຕໍ່​ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ” ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 20 ກັນຍາ​ນີ້​ນັ້ນ ອົງການ​ຮ່ວມ​ມື ແລະ ພັດທະນາ​ເສດຖະກິດ (OECD) ມີ​ຄຳ​ແຈ້ງ​ເຕືອນ​ອອກ​ມາ​ວ່າ ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ ມີ​ຄວາມ​ສ່ຽງ​ຫຼຸດ​ຖອຍ​ລົງ ທ່າມກາງ​ຄວາມ​ຂັດ​ແຍ່ງ​ທາງ​ດ້ານ​ການ​ຄ້າ​ເພີ່ມ​ຂຶ້ນ ໂດຍ​ເລີ່ມ​ມາ​ຈາກ ນະໂຍບາຍ​ປົກ​ປ້ອງ​ການ​ຄ້າ​ຂອງ ສ ອາ​ເມ​ຣິ​ກາ ເປັນ​ຜົນ​ກະທົບ​ຕໍ່​ການ​ຄ້າ​ຂອງ​ໂລກ.

    OECD ຢັ້ງຢືນ​ວ່າ ໃນ​ເຄິ່ງ​ຕົ້ນ​ປີ​ນີ້ ຄວາມ​ເຕີບ​ໂຂ​ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ໃນ​ທົ່ວ​ໂລກ​ສືບຕໍ່​ຮັກສາ​ໄວ້​ຢ່າງ​ໝັ້ນ​ທ່ຽງ ທີ່​ປະມານ  3,75% ແຕ່​ວ່າ​ໄດ້​ປະກົດ​ມີ​ສິ່ງ​ບົ່ງ​ບອກ ບາງ​ຢ່າງ ທີ່​ສະແດງ​ໃຫ້​ເຫັນ​ວ່າຄວາມ​ເຕີບ​ໂຕ​ໃນ​ປັດຈຸບັນ ໄດ້​ບັນລຸ​ລະດັບ​ຈອມ​ສູງ​ແລ້ວ.

    OECD ໃຫ້ການ​ຄາດ​ຄະເນ​ວ່າ ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ ຈະ​ບັນລຸ​ລະດັບ 3,7% ໃນ​ປີ 2018 ແລະ 2019 ເປັນ​ການ​ຫຼຸດ​ລົງ 0,1 ແລະ 0,2% ຕາມ​ລຳດັບ ເມື່ອ​​ທຽບ​ໃສ່​ການ ຄາດ​ຄະເນ​ໄວ້​ໃນ​ເດືອນ​ພຶດສະພາ​ທີ່​ຜ່ານ​ມາ.

    ບົດ​ລາຍ​ງານ​ຂອງ OECD ໃຫ້​ຮູ້​ວ່າ ໜຶ່ງ​ໃນ​ບັນດາ​ປັດ​ໄຈ​ທີ່​ກະທົບ​ຕໍ່​ຄວາມ​ເຕີບ​ໂຕ ຂອງ​ເສດຖະກິດ ກໍ​ແມ່ນ​ການເຄື່ອນໄຫວ​ການ​ຄ້າ​ມີ​ຄວາມ​ເຕີບ​ໂຕ​ຊັກ​ຊ້າ​ລົງ ໂດຍ​ຫຼຸດ​ຈາກ 5% ໃນ​ປີ​ກາຍ ລົງ​ມາ​ຍັງ​ເຫຼືອ​ປະມານ 3% ໃນ​ເຄິ່ງ​ຕົ້ນ​ປີ​ນີ້. ການ​ຫຼຸດ​ຖອຍ​ລົງ​ນັ້ນ​ມີ​ຂຶ້ນ ທ່າມກາງ​ນະໂຍບາຍ “ສ ອາ​ເມ​ຣິ​ກາ ມາ​ກ່ອນ” ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ນຳໄປ​ສູ່​ຄວາມ​ຂັດ​ແຍ່ງ​ກັບ​ຈີນ ທີ່​ເປັນ​ພື້ນຖານ​ເສດຖະກິດ​ໃຫຍ່​ອັນ​ດັບ​ສອງ​ຂອງ​ໂລກ ໃນ​ຂະນະ​ທີ່ ສ ອາ​ເມ​ຣິ​ກາ ກໍ​ເພີ່ມ​ທະວີ​ຄວາມ​ກົດ​ດັນ​ຕໍ່​ບັນດາ​ຄູ່​ຮ່ວມ​ທາງ​ດ້ານ​ການ​ຄ້າ​ຢູ່​ໃນ​ທະວີບ​ເອີ​ຣົບ.

     ນອກຈາກ​ນັ້ນແລ້ວ ບົດ​ລາຍ​ງານ​ຂອງ OECD ກໍ​ແຈ້ງ​ເຕືອນ​ວ່າ ຄວາມ​ເຄັ່ງ​ຕຶງ​ທາງ​ດ້ານ ການ​ຄ້າ ພວມ​ເຮັດ​ໃຫ້​ຄວາມ​ບໍ່​​ໍ່​ສະຫງົບ​ເພີ່ມ​ຂຶ້ນ ເປັນ​ການ​ຄຸກ​ຄາມ​ຕໍ່​ບັນດາ​ພື້ນຖານ​ເສດຖະກິດ ພັດທະນາ ແລະ ເສດຖະກິດ​ເກີດ​ໃໝ່  ເມື່ອ​ມັນ​ປະ​ໄວ້​ຊຶ່ງ​ຜົນ​ກະທົບ​ໃນ​ທາງ​ລົບ​ຕໍ່​ການ​ລົງທຶນ ວຽກ​ເຮັດ​ງານ​ທຳ ແລະ ເງື່ອນໄຂ​ການ​ດຳລົງ​ຊີວິດ​ໃນ​ທົ່ວ​ໂລກ. ເຖິງ​ວ່າ​ໄດ້​ຮັບ​ຮູ້​ວ່າ​ມີ​ລະດັບ ຄວາມ​ເຕີບ​ໂຕ​ດ້ານ​ວຽກ​ເຮັດ​ງານ​ທຳ​ທີ່​ເຂັ້ມແຂງ ຢູ່​ໃນ​ບັນດາ​ພື້ນຖານ​ເສດຖະກິດ​ພັດທະນາ​ກໍ​ຕາມ ແຕ່ OECD ກໍ​ໃຫ້​ຄວາມ​ໃສ່ໃຈ​ວ່າ ຄວາມ​ເຕີບ​ໂຕ​ຂອງ​ເງິນເດືອນ​ຍັງ​ຢູ່​ໃນ​ລະດັບ​ທີ່​ຍ່ອມ​ເຍົາ ເຮັດ​ໃຫ້ ບັນດາ​ຄອບຄົວ​ທີ່​ມີ​ລາຍ​ຮັບ​ຕ່ຳ ຍິ່ງ​ໄດ້​ຮັບ​ຄວາມ​ເສຍ​ຫາຍ​ງ່າຍ​ຂຶ້ນ.

    ການ​ແຈ້ງ​ເຕືອນ​ຕ່າງໆ​ດັ່ງກ່າວ​ຂອງ OECD ຖືກ​ນຳ​ອອກ​ມາ​ທ່າມກາງ​ຄວາມ​ເຄັ່ງ​ຕຶງ ທາງ​ດ້ານ​ການ​ຄ້າ ລະຫວ່າງ ສ ອາ​ເມ​ຣິ​ກາ ກັບ​ຈີນ ຖືກ​ຍູ້​ຂຶ້ນ​ສູ່​ຂັ້ນ​ໃໝ່ ເມື່ອ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ສັ່ງ​ໃຫ້​ເກັບ​ພາສີ 10% ກັບ​ສິນຄ້າ​ທີ່​ນຳ​ເຂົ້າ​ຈາກ​ຈີນ ລວມ​ມູນ​ຄ່າ  200 ຕື້​ໂດ​ລາ​ສະຫະລັດ. ຫຼັງ​ຈາກ​ນັ້ນ ຈີນ​ກໍ​ໄດ້​ປະກາດ​ທີ່​ຈະ​ເກັບ​ພາສີ​ກັບ​ສິນຄ້າ​ນຳ​ເຂົ້າ​ຈາກ ສ ອາ​ເມ​ຣິ​ກາ ລວມ​ມູນ​ຄ່າ 60 ຕື້​ໂດ​ລາ​ສະຫະລັດ ພ້ອມ​ທັງ​ຍື່ນ​ຟ້ອງ​ກ່ຽວ​ກັບ​ເລື່ອງ​ດັ່ງກ່າວ ຂຶ້ນ​ໄປ​ຍັງ​ອົງການ​ການ​ຄ້າ​ໂລກ (WTO).

 

ຂ່າວທີ່ກ່ຽວຂ້ອງ