ບຸນຫໍ່ເຂົ້າສະຫຼາກ

362 24 ກ.ຍ. 2018 ນານາສາລະ

    ບຸນ​ຫໍ່​ເຂົ້າ​ສະ­ຫຼາກ ແມ່ນ​ຖືກ​ເດືອນ 10 ເພັງ ຂຶ້ນ 15 ຄ່ຳ ກົງ​ກັບ​ວັນ​ຈັນ ວັນ​ທີ 24 ເດືອນ 9 ການ​ເຮັດ­ບຸນ​ເຂົ້າ​ສະ­ຫຼາກ ກໍ່​ມີ​ຈຸດ­ປະ­ສົງ​ຫຼັກ ເພື່ອ​ອຸ­ທິດ​ບຸນ​ກຸ­ສົນ​ໃຫ້​ຍາດ​ພີ່­ນ້ອງ​ທີ່​ຕາຍ​ໄປ ສຳ­ລັບ​ທີ່​ມາ​ຂອງ​ບຸນ​ເຂົ້າ​ສະ­ຫຼາກ ທາງ​ພຸດ​ທະ​ສາ­ສະ­ໜາ ແມ່ນ​ກ່ຽວ​ພັນ​ກັບ​ມະ­ຫາ​ເສດ­ຖີ​ລ້ຳ​ລວຍ​ມີ​ເມຍ​ນ້ອຍ ເມຍ​ຫຼວງ ເກີດ​ການ​ອິດ­ສາ​ບັງ​ບຽດ​ກັນ​ຕາຍ​ໄປ ເປັນ​ນາງ​ຍັກ­ຂີ­ນີ ສຸດ​ທ້າຍ​ໄດ້​ໄປ​ເຝົ້າ​ໄຮ່­ນາ​ຕາ­ກ້າ ຄົນ​ລາວ​ປ່ຽນ​ເອີ້ນ​ວ່າ: ຜີ­ຕາ­ແຮກ ກ່ອນ​ລົງ­ມື​ເຮັດ​ນາ​ຈຶ່ງ​ພາ­ກັນ​ລ້ຽງ​ຜີ­ຕາ­ແຮກ ເພາະ­ວ່າ​ຜີ­ຕາ­ແຮກ​ສາ­ມາດ​ອຳ­ນວຍ​ຄວາມ​ສະ­ດວກ​ນ້ຳ­ທ່າ ໃຫ້​ອຸ­ດົມ­ສົມ­ບູນ ຜູ້​ຂຽນ​ພຽງ​ເລົ່າ​ຫຍໍ້​ຄວາມ​ໃຫ້​ສັ້ນ.

    ບຸນ​ຫໍ່​ເຂົ້າ​ສະ­ຫຼາກ ສຳ­ລັບ​ຄົນ​ລາວ​ຊາວ​ພຸດ​ກໍ່​ພາ­ກັນ​ຫ້າງ­ເຄື່ອງ​ຖວາຍ​ທານ ພາ­ກັນ​ເຮັດ​ກວຍ ຫຼື ສານ​ກະ­ທໍ​ດ້ວຍ​ໄມ້­ໄຜ່​ເພື່ອ​ໃສ່​ອາ­ຫານ​ຫວານ ຄາວ ນຳ­ໄປ​ຖວາຍ​ແກ່​ພະ­ສົງ​ໃນ​ກະ­ຕ່າ ຫຼື ກະ­ທໍ ທີ່​ເອີ້ນ​ວ່າ ສະ­ຫຼາກ​ນັ້ນ ຄົນ​ລາວ​ນິ­ຍົມ​ໃສ່​ໝາກ​ໄມ້ ແລະ ຫົວ​ມັນ ກ້ວຍ ໝາກ​ຜິ​ຜ່ວນ ອ້ອຍ ຫໍ່​ເຂົ້າ­ເໝົ້າ ຂີງ ຂ່າ ຫົວ​ສີ​ໄຄ (ເຄື່ອງ­ກິນ​ຂອງ​ຄົນ​ລາວ) ເຊິ່ງ​ຂຶ້ນ​ກັບ​ພືດ​ຜົນ​ຂອງ​ການ​ເຮັດ​ການ​ປູກ­ຝັງ ສິ່ງ​ເຫຼົ່າ​ນີ້​ມັນ​ກໍ່​ສະ­ທ້ອນ​ໃຫ້​ເຫັນ​ສັງ­ຄົມ​ກະ­ເສດ ດັ່ງ​ທີ່​ຂຽນ​ອະ­ທິ­ບາຍ​ໄວ້​ບາງ​ປະ­ການ​ໃນ​ບຸນ​ຫໍ່​ເຂົ້າ­ປະ­ດັບ­ດິນ ຄາວ​ກ່ອນ​ແຕ່​ຄາວ​ນີ້​ກໍ່​ແມ່ນ​ເພື່ອ​ທົດ​ສອບ​ສີ­ມື ການ​ປູກ­ຝັງ ແລະ ຊັ່ງ­ຊາ​ນ້ຳ​ຟ້າ​ນ້ຳ​ຝົນ​ວ່າ ພືດ​ຜົນ​ປີ​ນີ້​ຈະ​ອຸ­ດົມ­ສົມ­ບູນ​ພຽງ​ໃດ ກໍ່​ຂໍ​ໃຫ້​ເບິ່ງ​ທີ່​ຜົນ​ຂອງ​ການ​ກະ­ເສດ ເຊິ່ງ​ນີ້​ແຫຼະ​ເຮັດ​ແນວ­ໃດ​ມັນ​ກໍ່​ຍັງ​ຊີ້​ບອກ​ວ່າ ຄົນ​ລາວ ມີ​ວິ­ຖີ​ຊີ­ວິດ​ຜູກ​ພັນ​ກັບ​ການ​ກະ­ເສດ ລ້ຽງ­ສັດ ແຕ່​ຕ້ອງ​ມີ​ພູມ​ປັນ­ຍາ​ແຫຼມ​ຄົມ ເພື່ອ​ຖ່າຍ​ທອດ​ພູມ​ປັນ­ຍາ​ການ​ລ້ຽງ​ຊີບ​ໃຫ້​ອະ­ນຸ­ຊົນ​ລຸ້ນ​ຫຼັງ​ຮູ້­ຈັກ​ສືບ​ທອດ​ເອົາ​ໄວ້.

    ສຳ­ລັບ​ພະ­ສົງ​ເມື່ອ​ແລ້ວ​ພິ­ທີ​ຕັກ­ບາດ​ຖວາຍ​ທານ​ແລ້ວ ຄະ­ນະ​ສົງ​ຈະ​ມອບ​ໃຫ້​ພະ​ເນນ​ສອງ​ສາມ​ອົງ ເຮັດ​ໜ້າ­ທີ່​ຂຽນ​ເລກ​ສະ­ຫຼາກ​ຂຶ້ນ​ໃສ່​ເຈ້ຍ​ແລ້ວ ມ້ວນ​ພັນ​ລົງ​ໃສ່​ບາດ​ຕາມ​ຈຳ­ນວນ​ພະ­ສົງ​ຈຳ​ພັນ​ສາ​ໃນ​ວັດ​ແຫ່ງ​ນັ້ນ ເພື່ອ​ທຳ​ການ​ຈົກ​ເອົາ​ເລກ​ສະ­ຫຼາກ ຕາມ​ໂຊກ​ໝານ​ຂອງ​ແຕ່​ລະ​ອົງ ເຊິ່ງ​ບາງ​ອົງ​ກໍ່​ຖືກ​ອັນ​ໃຫຍ່ ນ້ອຍ​ຕ່າງ​ກັນ ສິ່ງ​ສຳ­ຄັນ​ມັນ​ບອກ​ເຖິງ​ປະ­ຊາ­ທິ­ປະ­ໄຕ ແລະ ຄວາມ​ສະ­ເໝີ­ພາບ​ຂອງ​ສັງ­ຄົມ​ສົງ ບໍ່​ແມ່ນ​ວ່າ​ເປັນ​ພະ​ຜູ້​ໃຫຍ່​ບວດ​ຫຼາຍ​ພັນ​ສາ​ຈະ​ມີ​ສິດ​ສັ່ງ​ເອົາ​ອັນ​ໃດ​ກໍ່​ໄດ້.

    ສັງ​ລວມ​ແລ້ວ ຜູ້​ຂຽນ​ເຫັນ​ວ່າ ບຸນ​ເຂົ້າ​ສະ­ຫຼາກ ແມ່ນ​ບຸນ​ປະ­ເພ­ນີ-ຮີດ​ສິບ​ສອງ​ຄອງ​ສິບ​ສີ່ ຄົນ​ລາວ​ເຮົາ​ຄວນ​ສຶກ​ສາ​ສືບ​ທອດ​ພູມ​ປັນ­ຍາ​ຄົນ​ບູ­ຮານ ເພາະ­ວ່າ​ແຕ່​ລະ​ປາງ​ບຸນ​ກໍ່​ຈະ​ມີ​ບາງ​ອັນ​ຕ່າງ​ກັນ​ອອກ​ໄປ ແຕ່​ສິ່ງ​ທີ່​ບໍ່​ປ່ຽນ​ຄື​ການ​ໄຫວ້​ພະ​ຮັກ­ສາ​ສິນ ບໍ່​ກິນ​ເຫຼົ້າ​ເມົາ​ສຸ­ລາ ບໍ່​ຫົວ­ລ້ານ​ລື່ນ​ຄູ ເຊິ່ງ​ຖ້າ​ເຮັດ​ແນວ​ນັ້ນ​ຈະ​ເຮັດ​ໃຫ້​ຄົນ​ເຮົາ​ມີ​ນິ­ໄສ​ຫຍາບ​ເວົ້າ​ບໍ່​ຟັງ!

ຂ່າວທີ່ກ່ຽວຂ້ອງ