ເປ້ຍ ເຝິກຊ້ອມໜັກ ຫວັງຍາດຫຼຽນໃດໜຶ່ງໃນເອຊຽນພາຣາເກມ

120 21 ກ.ຍ. 2018 ວົງຈອນກີລາ
ເປ້ຍ ເຝິກຊ້ອມໜັກ ຫວັງຍາດຫຼຽນໃດໜຶ່ງໃນເອຊຽນພາຣາເກມ

    ທ່ານ ສຸກ​ທະ­ວີ​ສອນ ຄູນ​ສີ​ປະ­ເສີດ ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ ທັງ​ເປັນ​ຄູ​ເຝິກ​ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ທີມ​ຊາດ​ລາວ ໃຫ້​ສຳ­ພາດ​ວັນ​ທີ 19 ກັນ­ຍາ 2018 ວ່າ: ປັດ­ຈຸ­ບັນ​ໄດ້​ຂຸ້ນ­ຂ້ຽວ​ເຝິກ­ຊ້ອມ​ຢ່າງ​ໜັກ ແລະ ຢູ່​ໃນ​ໄລ­ຍະ​ຂັ້ນ​ຕອນ​ສຸດ​ທ້າຍ ຄື: ການ​ເກັບ​ສະ­ຖິ­ຕິ​ໃໝ່​ໃຫ້​ທ້າວ ເປ້ຍ ເຫຼົາ​ພັກ­ດີ ນັກ­ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ທີມ​ຊາດ​ໜຶ່ງ​ດຽວ​ຈາກ​ລາວ ຮຸ່ນ​ນ້ຳ­ໜັກ 49 ກິ​ໂລ ທີ່​ສົ່ງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ​ພາ​ຣາ​ເກມ ທີ່​ນະ­ຄອນ­ຫຼວງ​ຈາ​ກາ​ຕາ ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ໃນ​ວັນ​ທີ 6-13 ຕຸ­ລາ 2018 ໃຫ້​ໄດ້​ລະ­ຫວ່າງ 140-145 ກິ​ໂລ ພາຍ­ຫຼັງ​ໄລ­ຍະ​ເກັບ​ຕົວ​ເຝິກ­ຊ້ອມ​ກັນ​ມາ​ເຮັດ​ໄດ້​ພຽງ 137 ກິ​ໂລ ສະ­ນັ້ນ ຖື​ວ່າ​ຕົ້ນ​ເດືອນ​ຕຸ­ລາ​ນີ້ ຈະ​ໃຫ້​ທ້າວ ເປ້ຍ ພະ­ຍາ­ຍາມ​ຍົກ​ໃຫ້​ໄດ້​ຕາມ​ເປົ້າ​ໝາຍ​ທີ່​ວາງ​ໄວ້ ເພາະ​ໃນ​ຮຸ່ນ 49 ກິ​ໂລ ມີ​ຄູ່​ແຂ່ງ­ຂັນ​ພຽງ 2 ປະ­ເທດ ຄື: ປະ­ເທດ​ອີ​ຣານ ແລະ ປະ­ເທດ​ອິນ​ເດຍ ທີ່​ລາວ​ເຮົາ​ຈະ​ຕ້ອງ​ລົງ​ແຂ່ງ­ຂັນ​ນຳ ທັງ​ນີ້​ເພື່ອ​ບັນ­ລຸ​ເປົ້າ​ໝາຍ​ຍາດ​ຫຼຽນ​ໃດ​ຫຼຽນ​ໜຶ່ງ​ກັບ​ມາ​ບ້ານ​ເກີດ.

    ໃນ​ການ​ແຂ່ງ­ຂັນ​ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ລາຍ­ການ​ອາ­ຊີ-ໂອ​ຊີ​ເນຍ​ໂອ​ເພັນ ແຊັມ​ປ້ຽນ​ຊິບ 2018 ທີ່​ເມືອງ​ຄິ​ຕະ​ກີວ​ຊູ ແຂວງ​ຟຸ​ກຸ​ໂອະ​ກະ ປະ­ເທດ​ຍີ່­ປຸ່ນ ເປັນ​ເຈົ້າ­ພາບ ໃນ​ວັນ​ທີ 8-11 ກັນ­ຍາ 2018 ທ້າວ ເປ້ຍ ສາ­ມາດ​ຍາດ​ໄດ້​ອັນ​ດັບ​ທີ 4 ຈາກ​ນັກ­ກີ­ລາ​ເຂົ້າ​ຮ່ວມ​ທັງ​ໝົດ 11 ຄົນ ທີ່​ມາ​ຈາກ 9 ປະ­ເທດ ດ້ວຍ​ສະ­ຖິ­ຕິ 137 ກິ​ໂລ.

    ສຳ­ລັບ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ ພາ​ຣາ​ເກມ ຄັ້ງ​ທີ XII ລາວ​ເຮົາ​ຈະ​ສົ່ງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ​ທັງ​ໝົດ 4 ປະ­ເພດ ຄື: ກີ­ລາ​ລອຍ­ນ້ຳ ກີ­ລາ​ແລ່ນ-ລານ ກີ­ລາ​ຍົກ​ນ້ຳ­ໜັກ ແລະ ກີ­ລາ​ໂກນ​ບານ​ຍິງ.

ຂ່າວທີ່ກ່ຽວຂ້ອງ