ຂ່າວຫຼ້າສຸດ

ຫາລືການປັບປຸງວຽກງານໂພຊະນາການແບບມີສ່ວນຮ່ວມ

261 21 ກ.ຍ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ປຶກ­ສາ​ຫາ­ລື ກ່ຽວ​ກັບ​ການ​ປັບ­ປຸງ​ວຽກ​ງານ​ໂພ­ຊະ​ນາ​ການ​ແບບ​ມີ​ສ່ວນ​ຮ່ວມ ຈາກ​ທຸກ​ພາກ­ສ່ວນ​ໃນ ສປປ ລາວ ຈັດ​ຂຶ້ນ​ວັນ​ທີ 20 ກັນ­ຍາ 2018 ຢູ່​ໂຮງ­ແຮມ​ລາວ​ພລາ​ຊາ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ແລະ ທ່ານ​ນາງ ນິ​ໂຄ​ລາ ພອນ​ທາ​ຣາ ຫົວ­ໜ້າ​ຫ້ອງ­ການ​ຜູ້­ຕາງ­ໜ້າ​ທະ­ນາ­ຄານ​ໂລກ ປະ­ຈຳ​ລາວ ມີ​ບັນ­ດາ​ພະ­ນັກ­ງານ-ວິ­ຊາ​ການ​ກ່ຽວ­ຂ້ອງ​ທັງ​ສູນ​ກາງ-ທ້ອງ­ຖິ່ນ​ເຂົ້າ​ຮ່ວມ.

    ການ​ປັບ­ປຸງ​ວຽກ​ງານ​ໂພ­ຊະ​ນາ​ການ​ແບບ​ມີ​ສ່ວນ​ຮ່ວມ ລັດ­ຖະ­ບານ​ລາວ​ໄດ້​ກຳ­ນົດ​ເອົາ​ແຂວງ​ຊຽງ​ຂວາງ ແລະ ແຂວງ​ຫົວ­ພັນ ເປັນ​ແຂວງ​ເປົ້າ​ໝາຍ ຍ້ອນ​ເຫັນ​ວ່າ 2 ແຂວງ​ດັ່ງ­ກ່າວ ມີ​ອັດ­ຕາ​ການ​ຂາດ​ສານ​ອາ­ຫານ​ໃນ​ເດັກ­ນ້ອຍ​ສູງ ໂດຍ​ການ­ຈັດ­ຕັ້ງ​ປະ­ຕິ­ບັດ​ມີ​ຈຸດ­ປະ­ສົງ​ສຳ­ຄັນ ໃນ​ການ​ຍົກ​ລະ­ດັບ​ການ​ເຂົ້າ​ເຖິງ ແລະ ນຳ​ໃຊ້​ຜະ­ລິດ​ຕະ​ພັນ​ອາ­ຫານ​ທີ່​ມີ​ຄຸ­ນະ­ພາບ ຕະ­ຫຼອດ​ເຖິງ​ການ​ບໍ­ລິ­ການ​ດ້ານ​ສາ­ທາ­ລະ­ນະ​ສຸກ​ຫຼາຍ​ຂຶ້ນ ເພື່ອ​ໃຫ້​ເດັກ​ມີ​ຄວາມ​ສູງ​ໄດ້​ມາດ­ຕະ­ຖານ ເນື່ອງ​ຈາກ​ປັດ­ຈຸ­ບັນ ສປປ ລາວ ມີ​ເດັກ​ທີ່​ມີ​ສ່ວນ​ສູງ​ຫຼຸດ​ມາດ­ຕະ­ຖານ ກວມ​ເອົາ 40% ຂອງ​ເດັກ​ທີ່​ມີ​ອາ­ຍຸ​ຕ່ຳ​ກວ່າ 5 ປີ.

    ກອງ​ປະ­ຊຸມ​ຄັ້ງ​ນີ້ ໄດ້​ລົງ​ເລິກ​ປຶກ­ສາ​ຫາ­ລື​ຄວາມ​ເປັນ​ໄປ​ໄດ້ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໂພ­ຊະ​ນາ​ການ ໂດຍ​ເນັ້ນ​ໃສ່​ການ​ມີ​ສ່ວນ​ຮ່ວມ​ຂອງ​ທຸກ​ພາກ­ສ່ວນ​ກ່ຽວ­ຂ້ອງ​ທົ່ວ​ສັງ­ຄົມ ເລັ່ງ​ໃສ່​ການ​ແກ້​ໄຂ​ບັນ­ຫາ​ດ້ານ​ໂພ­ຊະ​ນາ​ການ​ໃນ 1.000 ວັນ​ທຳ​ອິດ ພາຍ­ຫຼັງ​ການ​ເກີດ​ຂອງ​ເດັກ ເຊິ່ງ​ບັນ­ຫາ​ດັ່ງ­ກ່າວ ຖື​ເປັນ​ໄລ­ຍະ​ທີ່​ສຳ­ຄັນ​ທີ່​ສຸດ​ຕໍ່​ພັດ­ທະ­ນາ​ການ​ຂອງ​ເຂົາ­ເຈົ້າ.

ຂ່າວທີ່ກ່ຽວຂ້ອງ