ຂ່າວຫຼ້າສຸດ

ເລັ່ງສ້ອມແປງພື້ນຖານໂຄງລ່າງ ຊຸກຍູ້ການຜະລິດນາແຊງໃຫ້ໄດ້ 100.000 ເຮັກຕາ

243 21 ກ.ຍ. 2018 ຂ່າວໜ້າ​ໜຶ່ງ
ເລັ່ງສ້ອມແປງພື້ນຖານໂຄງລ່າງ ຊຸກຍູ້ການຜະລິດນາແຊງໃຫ້ໄດ້ 100.000 ເຮັກຕາ

    ລັດ­ຖະ­ບານ ໄດ້​ມອບ​ໃຫ້​ກະ­ຊວງ​ກະ­ສິ­ກຳ ແລະ ປ່າ­ໄມ້ ເປັນ​ຂະ­ແໜງ­ການ​ຫຼັກ​ໃນ​ການ​ແກ້​ໄຂ​ເນື້ອ­ທີ່​ການ​ຜະ­ລິດ​ຂອງ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ຂັງ ນ້ຳ​ຊຸ​ທັ່ງ ແລະ ສັດ­ຕູ​ພືດ​ທຳ­ລາຍ ໃນ​ນີ້ ໃຫ້​ຟື້ນ​ຟູ​ເນື້ອ­ທີ່​ການ​ຜະ­ລິດ​ທີ່​ຖືກ​ຜົນ​ກະ­ທົບ​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ ໂດຍ​ສົມ­ທົບ​ກັບ​ທ້ອງ­ຖິ່ນ​ຕ່າງໆ ວາງ​ຄາດ­ໝາຍ​ສູ້​ຊົນ ຂຸດ​ຄົ້ນ​ນຳ​ໃຊ້​ເນື້ອ­ທີ່​ການ​ຜະ­ລິດ​ເພີ່ມ​ຂຶ້ນ ໂດຍ​ອາ­ໄສ​ເນື້ອ­ທີ່ໆ​ຍັງ​ບໍ່​ໄດ້​ນຳ​ໃຊ້​ໝົດ ສ້ອມ­ແປງ-ຟື້ນ​ຟູ​ຊົນ­ລະ­ປະ­ທານ ເພື່ອ​ຮັບ​ໃຊ້​ການ​ຜະ­ລິດ​ລະ­ດູ­ແລ້ງ​ໃຫ້​ໄດ້​ຫຼາຍ​ຂຶ້ນ.

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ໃນ​ພິ­ທີ​ຖະ­ແຫຼງ​ຂ່າວ​ກ່ຽວ​ກັບ​ການ​ຊ່ວຍ­ເຫຼືອ ແລະ ແກ້​ໄຂ​ໄພ­ພິ­ບັດ​ແຫ່ງ​ຊາດ ວັນ​ທີ 19 ກັນ­ຍາ 2018 ວ່າ: ໄພ­ພິ­ບັດ​ທີ່​ເກີດ​ຂຶ້ນ​ໄລ­ຍະ​ຜ່ານ​ມາ ໄດ້​ສ້າງ​ຄວາມ​ເສຍ​ຫາຍ​ຕໍ່​ເນື້ອ­ທີ່​ການ​ຜະ­ລິດ 90.600 ເຮັກ­ຕາ ກວມ 12% ຂອງ​ເນື້ອ­ທີ່​ນາ­ປີ ປະ​ເມີນ​ຜົນ​ເສຍ​ຫາຍ​ເບື້ອງ​ຕົ້ນ​ດ້ານ​ຂະ­ແໜງ​ກະ­ສິ­ກຳ ແລະ ປ່າ­ໄມ້ 1.260 ຕື້​ກວ່າ​ກີບ ເຂົ້າ­ໄຮ່​ຖືກ​ທຳ­ລາຍ 4.000 ກວ່າ​ເຮັກ­ຕາ ນອກ​ນີ້​ຍັງ​ມີ​ສັດ­ຕູ​ພືດ​ທຳ­ລາຍ​ເນື້ອ­ທີ່​ການ​ຜະ­ລິດ 11.700 ກວ່າ​ເຮັກ­ຕາ ຕໍ່​ຜົນ​ກະ­ທົບ​ດັ່ງ­ກ່າວ ໄດ້​ສົ່ງ​ຜົນ​ໃຫ້​ເນື້ອ­ທີ່​ນາ​ບາງ​ພື້ນ​ທີ່​ບໍ່​ສາ­ມາດ​ເຮັດ​ນາ​ຕ່າວ​ໄດ້ ແລະ ຜົນ​ຜະ­ລິດ​ນາ­ປີ​ບໍ່​ໄດ້​ຮັບ​ສະ­ມັດ­ຖະ­ພາບ​ຕາມ​ແຜນ­ການ ໂດຍ​ອີງ­ໃສ່​ການ​ປະ​ເມີນ​ສາ­ມາດ​ຜະ­ລິດ​ໄດ້​ພຽງ 3.200.000 ໂຕນ ໂດຍ​ສະ­ເພາະ ພືດ​ຜັກ ໝາກ​ໄມ້ ແລະ ຊົນ­ລະ­ປະ­ທານ ເສຍ​ຫາຍ 312 ຕື້​ກີບ 650 ຫົວ​ງານ ເປ່​ເພ​ເສຍ​ຫາຍ ນອກ​ນີ້​ຍັງ​ມີ​ສັດ­ລ້ຽງ ເປັນ­ຕົ້ນ ປາ​ກະ­ຊັງ ຟາມ​ໄກ່ ຟາມ​ໝູ ຕື່ມ​ອີກ.

    ເພື່ອ​ເຮັດ​ໃຫ້​ມີ​ຄວາມ​ໝັ້ນ­ຄົງ​ດ້ານ​ສະ­ບຽງ​ອາ­ຫານ ການ​ສະ­ໜອງ​ສະ­ບຽງ​ອາ­ຫານ​ໃຫ້​ພຽງ­ພໍ​ໃນ​ທົ່ວ​ປະ­ເທດ ພວກ​ເຮົາ​ຕ້ອງ​ສູ້​ຊົນ​ຜະ­ລິດ​ເຂົ້າ­ນາ­ແຊງ​ປີ​ນີ້ ໃຫ້​ໄດ້​ຢ່າງ​ໜ້ອຍ 100.000 ເຮັກ­ຕາ ເພື່ອ​ແກ້​ໄຂ​ຜົນ​ຜະ­ລິດ ແລະ ຊົດ​ເຊີຍ​ຜົນ​ຜະ­ລິດ​ເຂົ້າ­ນາ​ປີ​ທີ່​ເສຍ​ຫາຍ​ຈາກ​ໄພ​ນ້ຳ​ຖ້ວມ 300.000 ໂຕນ ປັດ­ຈຸ­ບັນ ຫຼາຍ​ທ້ອງ­ຖິ່ນ​ຍັງ​ຂາດ​ແນວ​ພັນ​ເຂົ້າ­ນາ­ແຊງ ຍ້ອນ​ເນື້ອ­ທີ່​ປູກ​ແນວ​ພັນ​ທີ່​ກະ­ກຽມ​ໄວ້ ໄດ້​ຮັບ​ຄວາມ​ເສຍ​ຫາຍ​ຈາກ​ນ້ຳ​ຖ້ວມ ເຊິ່ງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ຄວາມ​ຕ້ອງ­ການ​ແນວ​ພັນ 6.000 ກວ່າ​ໂຕນ ໃນ​ນີ້ ພວກ​ເຮົາ​ມີ​ຄັງ​ແຮ​ແລ້ວ 4.300 ໂຕນ ແລະ ຕ້ອງ​ໄດ້​ຊື້​ນຳ​ປະ­ຊາ­ຊົນ​ອີກ 1.700 ໂຕນ ເພື່ອ​ນຳ​ແນວ​ພັນ​ດັ່ງ­ກ່າວ ໄປ​ແຈກ​ຢາຍ​ໃຫ້​ຜູ້​ໄດ້​ຮັບ​ຜົນ​ກະ­ທົບ ສ່ວນ​ແນວ​ພັນ​ສາ­ລີ​ແຂງ​ມີ​ບໍ­ລິ­ສັດ​ເອ­ກະ​ຊົນ​ສະ­ໜອງ​ໃຫ້​ແລ້ວ ແຕ່​ຍັງ​ຂາດ​ແນວ​ພັນ​ສາ­ລີ​ຫວານ ເພື່ອ​ສະ­ໜອງ​ໃຫ້​ໂຮງ­ງານ​ປຸງ​ແຕ່ງ​ກະ­ສິ­ກຳ ແລະ ໃຫ້​ປະ­ຊາ­ຊົນ​ປູກ​ໃນ​ເຂດ​ທີ່​ຕ້ອງ­ການ ນອກ​ນີ້ ສັດ​ປີກ​ເສຍ​ຫາຍ 70.000 ກວ່າ​ໂຕ ແນວ​ພັນ​ປາ ໜອງ​ປາ ເສຍ​ຫາຍ 5.387 ໜອງ ເຊິ່ງ​ຈະ​ຕ້ອງ​ສືບ­ຕໍ່​ກະ­ກຽມ​ຕອບ​ສະ­ໜອງ​ໃຫ້​ພຽງ­ພໍ.

ຂ່າວທີ່ກ່ຽວຂ້ອງ