ຂ່າວຫຼ້າສຸດ

ເຈົ້າໜ້າທີ່ຈັບມືຄາຕະກຳ ແລະ ຜູ້ບົງການຂ້ານັກທຸລະກິດຈີນໄດ້ແລ້ວ

279 21 ກ.ຍ. 2018 ຂ່າວໜ້າ​ໜຶ່ງ
ເຈົ້າໜ້າທີ່ຈັບມືຄາຕະກຳ ແລະ ຜູ້ບົງການຂ້ານັກທຸລະກິດຈີນໄດ້ແລ້ວ

    ສາ­ເຫດ ແລະ ແຮງ​ຈູງ​ໃຈ​ໃນ​ການ​ຄາ­ຕະ­ກຳ​ນັກ­ທຸ­ລະ­ກິດ​ເຊື້ອ​ຊາດ​ຈີນ ແມ່ນ​ເກີດ​ຈາກ​ຂໍ້​ຂັດ​ແຍ່ງ​ທາງ​ດ້ານ​ທຸ­ລະ​ກິດ ຕໍ່​ກັບ​ເຫດ­ການ​ທີ່​ເກີດ​ດັ່ງ­ກ່າວ ເຈົ້າ​ໜ້າ­ທີ່​ຕຳ­ຫຼວດ​ລາວ​ໄດ້​ຮ່ວມ​ມື​ກັບ​ເຈົ້າ​ໜ້າ­ທີ່​ຕຳ­ຫຼວດ ສປ ຈີນ ສາ­ມາດ​ກັກ​ຕົວ​ຜູ້​ລົງ­ມື​ຄາ­ຕະ­ກຳ​ໄດ້ 2 ຄົນ ແລະ ຜູ້​ບົງ​ການ 2 ຄົນ.

    ທ່ານ ພັນ​ໂທ ຈັນ​ຫອມ ແກ້ວ​ສຸ­ລະ​ໄຊ ຫົວ­ໜ້າ​ຫ້ອງ​ຕຳ­ຫຼວດ ປກສ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ຮູ້​ວ່າ: ວັນ​ທີ 12 ສິງ­ຫາ 2018 ຫ້ອງ​ຕຳ­ຫຼວດ ປກສ ນວ ໄດ້​ຮັບ​ແຈ້ງ­ວ່າ​ມີ​ເຫດ​ຄາ­ຕະ­ກຳ​ຢູ່​ບ້ານ​ສີ​ໄຄ​ທົ່ງ ເມືອງ​ສີ​ໂຄດ​ຕະ­ບອງ ຈຶ່ງ​ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ລົງ​ສະ­ຖານ­ທີ່​ເກີດ​ເຫດ​ຕົວ​ຈິງ ແລະ ຮູ້​ຜູ້​ເສຍ​ຊີ­ວິດ​ຊື່​ທ້າວ ໄຊ­ຊະ­ນະ ຫຍົດ​ສະ​ຫວັດ ຫຼື ຫຼີ​ຈາວ​ເພີງ ອາ­ຍຸ 42 ປີ ເຊື້ອ​ຊາດ​ຈີນ ສັນ­ຊາດ​ລາວ ອາ­ຊີບ​ນັກ­ທຸ­ລະ­ກິດ ຜ່ານ​ການ​ກວດ­ກາ​ສະ­ຖານ­ທີ່​ເກີດ​ເຫດ ແລະ ສັນ​ນະ​ສູດ​ສົບ​ພົບ​ວ່າ ຢູ່​ຫຼັງ​ມີ​ຮ່ອງ­ຮອຍ​ຖືກ​ແທງ​ຈາກ​ວັດ­ຖຸ​ມີ​ຄົມ 3 ຮ່ອງ­ຮອຍ ເງິນ​ໃນ​ຕູ້​ເຊັບ​ຖືກ​ຄົນ​ຮ້າຍ​ເອົາ​ໜີ​ໄປ.

    ຜ່ານ​ການ​ເກັບ​ກຳ​ຂໍ້​ມູນ​ຫຼັກ​ຖານ​ຈາກ​ພາກ­ສ່ວນ​ຕ່າງໆ​ຈຶ່ງ​ຮູ້​ວ່າ ເວ­ລາ​ປະ­ມານ 4:23 ໂມງ ວັນ​ທີ 12 ສິງ­ຫາ 2018 ໄດ້​ເຫັນ​ຄົນ​ຮ້າຍ 2 ຄົນ ໃສ່​ຊຸດ​ດຳ​ເຂົ້າ​ໄປ​ໃນ​ເຮືອນ​ຫຼັງ​ເກີດ​ເຫດ ຈົນ​ຮອດ​ເວ­ລາ 7:12 ໂມງ ເຫັນ​ຄົນ​ຮ້າຍ​ທັງ 2 ຄົນ ປີນ​ອອກ​ຈາກ​ກຳ­ແພງ​ເຮືອນ​ຫຼັງ​ເກີດ​ເຫດ ເຊິ່ງ​ເປັນ​ເຮືອນ​ຂອງ​ຜູ້​ເສຍ​ຊີ­ວິດ ໃນ​ມື​ຂອງ​ຄົນ​ຮ້າຍ​ຈັບ​ຖື​ກະ­ເປົາ 3 ໜ່ວຍ (ສີ­ດຳ) ອອກ​ໄປ​ເອົາ​ລົດ­ຈັກ​ສີ­ດຳ ບໍ່​ມີ​ຫາງ​ປາ ບໍ່​ມີ​ປ້າຍ​ທະ­ບຽນ ທີ່​ຈອດ​ໄວ້​ໃກ້​ກັບ​ຮ້ານ​ຂາຍ­ເຄື່ອງ​ຫ່າງ​ຈາກ​ບ່ອນ­ເກີດ​ເຫດ​ປະ­ມານ 100 ແມັດ ແລ້ວ​ຊ້ອນ​ກັນ​ໄປ​ທາງ​ຕະ­ຫຼາດ​ສີ​ໄຄ ແລ້ວ​ລ້ຽວ​ໄປ​ຕາມ​ເສັ້ນ­ທາງ 13 ເໜືອ ເສັ້ນ­ທາງ​ທົ່ງ​ປົ່ງ ແລ້ວ​ລ້ຽວ​ເຂົ້າ​ໄປ​ທາງ​ກອງ​ຄຸ້ມ​ຄອງ​ພາ­ຫະ­ນະ ກາຍ​ບ້ານ​ໂພນ​ສົມ­ບູນ ເມືອງ​ສີ​ໂຄດ​ຕະ­ບອງ ແລ້ວ​ຈອດ​ລົດ­ຈັກ​ໄວ້​ຢູ່​ເດີ່ນ​ໃກ້​ເຮືອນ​ປະ­ຊາ­ຊົນ​ແລ້ວ​ໜີ​ໄປ.

    ວັນ​ທີ 21 ສິງ­ຫາ 2018 ເຈົ້າ​ໜ້າ­ທີ່​ພວກ​ເຮົາ​ຈຶ່ງ​ໄດ້​ນຳ​ເອົາ​ລົດ​ຄັນ​ດັ່ງ­ກ່າວ ມາ​ກວດ​ເຊັກ​ເບິ່ງ​ຈຶ່ງ​ຮູ້​ວ່າ​ແມ່ນ​ລົດ​ທີ່​ຊື້​ຈາກ​ຮ້ານ​ຂາຍ​ລົດ​ມື 2 ຢູ່​ບ້ານ​ໜອງ​ແຕ່ງ ວັນ​ທີ 17 ກໍ­ລະ­ກົດ 2018 ໂດຍ​ມີ​ຄົນ​ຈີນ 2 ຄົນ ມາ​ຊື້​ລົດ​ຄັນ​ດັ່ງ­ກ່າວ ຈຶ່ງ​ໄດ້​ສົມ­ທົບ​ກັບ​ເຈົ້າ​ໜ້າ­ທີ່​ຕຳ­ຫຼວດ ສປ ຈີນ ກວດ­ກາ 2 ຄົນ​ດັ່ງ­ກ່າວ ແລ້ວ​ຮູ້​ວ່າ​ໄດ້​ໜີ​ອອກ​ຈາກ​ປະ­ເທດ​ລາວ​ແລ້ວ ຈຶ່ງ​ໄດ້​ປະ­ສານ​ສົມ­ທົບ​ກັບ​ເຈົ້າ​ໜ້າ­ທີ່​ຕຳ­ຫຼວດ​ແຂວງ​ຫູ​ໜານ ກັກ​ຕົວ​ທັງ 2 ຄົນ​ຄື: ທ້າວ ຊິງ​ຢົງ ອາ­ຍຸ 44 ປີ ແລະ ທ້າວ ເຊີນ​ເພິງ​ເພີ້ງ ອາ­ຍຸ 34 ປີ ຜ່ານ​ການ​ສືບ­ສວນ-ສອບ​ສວນ​ຂອງ​ເຈົ້າ​ໜ້າ­ທີ່​ຕຳ­ຫຼວດ​ແຂວງ​ຫູ​ໜານ ວັນ​ທີ 31 ສິງ­ຫາ 2018 ຈຶ່ງ​ຮູ້​ວ່າ: ຄົນ​ຮ້າຍ​ທັງ 2 ໄດ້​ຄາ­ຕະ­ກຳ ທ້າວ ໄຊ­ຊະ­ນະ ໂດຍ​ໃຊ້​ມີດ 2 ດວງ ປືນ​ສັ້ນ 2 ກະ­ບອກ ແລ້ວ​ໄດ້​ເອົາ​ເງິນ​ໃນ​ຕູ້​ເຊັບ​ໜີ​ໄປ ເຊິ່ງ​ເງິນ ມີດ 2 ດວງ ແລະ ປືນ 2 ກະ­ບອກ ໄດ້​ເຊື່ອງ​ໄວ້​ຢູ່​ບ້ານ​ໂພນ​ສົມ­ບູນ ໂດຍ​ເຈົ້າ​ໜ້າ­ທີ່​ໄດ້​ເກັບ​ຮັກ­ສາ​ໄວ້​ເປັນ​ທີ່​ຮຽບ​ຮ້ອຍ ພ້ອມ​ນີ້ ທັງ 2 ຍັງ​ໄດ້​ຊັກ​ທອດ​ເຖິງ​ຜູ້​ບົງ​ການ​ຊື່​ທ້າວ ເຕີງ​ຊື​ຫຼີງ ແລະ ທ້າວ ຖັງ​ອີ້​ຊຸ້ຍ ເຊື້ອ​ຊາດ​ສັນ­ຊາດ​ຈີນ ທີ່​ເປັນ​ຫົວ​ໂປ່​ໂຕ​ການ​ເຮັດ​ທຸ­ລະ​ກິດ​ຢູ່​ປະ­ເທດ​ລາວ ພັກ​ເຊົາ​ຢູ່​ອາ​ພັດ​ເມັ້ນ​ຕະ­ຫຼາດ​ຊັ່ງ​ຈຽງ ວັນ​ທີ 2 ກັນ­ຍາ 2018 ເຈົ້າ​ໜ້າ­ທີ່​ຕຳ­ຫຼວດ​ລາວ ສົມ­ທົບ​ກັບ​ຕຳ­ຫຼວດ​ຈີນ ຈັບ​ພວກ​ກ່ຽວ​ທັງ 2 ຄົນ ພ້ອມ​ທັງ​ໄດ້​ສືບ­ສວນ-ສອບ​ສວນ​ເບື້ອງ​ຕົ້ນ ທັງ 2 ມີ​ການ​ພົວ­ພັນ​ກັບ​ເຫດ­ການ​ຄາ­ຕະ­ກຳ​ຄັ້ງ​ນີ້.

    ເຫດ​ຄາດ​ຕະ​ກຳ​ຄັ້ງ​ນີ້ ເຈົ້າ​ໜ້າ­ທີ່​ຕຳ­ຫຼວດ​ລາວ ແລະ ເຈົ້າ​ໜ້າ­ທີ່​ຕຳ­ຫຼວດ​ຈີນ ສາ­ມາດ​ກັກ​ຕົວ​ຜູ້​ກະ­ທຳ​ຜິດ​ຄື: ຜູ້​ລົງ­ມື​ຄາດ​ຕະ​ກຳ 2 ຄົນ ແລະ ຜູ້​ບົງ​ການ 2 ຄົນ ລວມ 4 ຄົນ ພ້ອມ​ທັງ​ເກັບ​ກູ້​ອາ­ວຸດ​ທີ່​ນຳ​ໃຊ້​ເຂົ້າ​ໃນ​ການ​ຄາ­ຕະ­ກຳ ແລະ ເງິນ​ໃນ​ຕູ້​ເຊັບ​ມາ​ຄືນ​ໄດ້​ທັງ​ໝົດ ຄື: 150 ລ້ານ​ກີບ 560.000 ຢວນ 58.200 ບາດ 5.322.000 ດົງ 47.210 ຮົງ​ກົງ ແລະ ເງິນ​ອື່ນໆ​ຈຳ­ນວນ​ໜຶ່ງ ແມ່ນ​ໄດ້​ມອບ​ຄືນ​ໃຫ້​ຍາດ​ພີ່­ນ້ອງ​ຜູ້​ເຄາະ​ຮ້າຍ​ເປັນ​ທີ່​ຮຽບ​ຮ້ອຍ​ແລ້ວ.

ຂ່າວທີ່ກ່ຽວຂ້ອງ