ຂ່າວຫຼ້າສຸດ

ໄຟຟ້ານ້ຳເທີນ 2 ສະໜັບສະໜູນທຶນການສຶກສາ

468 21 ກ.ຍ. 2018 ຂ່າວໜ້າ​ໜຶ່ງ
ໄຟຟ້ານ້ຳເທີນ 2 ສະໜັບສະໜູນທຶນການສຶກສາ

    ວິ­ທະ­ຍາ­ໄລ​ເຕັກ­ນິກ​ລາວ-ເຢຍ​ລະ​ມັນ ແລະ ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ສືບ­ຕໍ່​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ຮ່ວມ​ກັນ ຄັ້ງ​ທີ 2 ເພື່ອ​ຂະ­ຫຍາຍ​ການ​ຮ່ວມ​ມື ແລະ ເປັນ​ຄູ່​ຮ່ວມ​ງານ ເພື່ອ​ສ້າງ​ບຸ​ຄະ­ລາ​ກອນ​ໃຫ້​ມີ​ຄວາມ​ຮູ້ ຄວາມ​ສາ­ມາດ​ແກ່​ຂະ­ແໜງ​ໄຟ­ຟ້າ​ພະ­ລັງ­ງານ​ນ້ຳ​ໃນ​ໄລ­ຍະ​ຍາວ ເຊິ່ງ​ທັງ​ສອງ​ຝ່າຍ​ຈະ​ໄດ້​ຮ່ວມ​ມື​ກັນ​ສ້າງ​ແຜນ​ປະ­ຕິ­ບັດ​ການ ເພື່ອ​ໃຫ້​ບັນ­ລຸ​ຕາມ​ຄວາມ​ຕ້ອງ­ການ​ຂອງ​ຕະ­ຫຼາດ​ແຮງ​ງານ​ງານ ສຳ­ລັບ​ຂະ­ແໜງ​ໄຟ­ຟ້າ​ພະ­ລັງ­ງານ​ນ້ຳ.

    ພິ­ທີ​ເຊັນ​ບົດ​ບັນ­ທຶກ ເພື່ອ​ການ​ຮ່ວມ​ມື​ດ້ານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ໃນ​ຂະ­ແໜງ​ໄຟ­ຟ້າ​ພະ­ລັງ­ງານ​ນ້ຳ ລະ­ຫວ່າງ​ວິ­ທະ­ຍາ­ໄລ​ເຕັກ­ນິກ​ລາວ-ເຢຍ​ລະ​ມັນ ແລະ ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ໄລ­ຍະ 3 ປີ (3/9/2018-3/9/2021) ຈັດ​ຂຶ້ນ​ວັນ​ທີ 19 ກັນ­ຍາ 2018 ທີ່​ວິ­ທະ­ຍາ­ໄລ​ເຕັກ­ນິກ​ລາວ-ເຢຍ​ລະ​ມັນ ຮ່ວມ​ລົງ​ນາມ​ລະ­ຫວ່າງ​ທ່ານ ຄຳ​ສະ­ໄຫວ ຍ່ອມ​ມີ​ລາ​ວົງ ວ່າ­ການ​ຜູ້­ອຳ­ນວຍ­ການ​ວິ­ທະ­ຍາ­ໄລ​ເຕັກ­ນິກ​ລາວ-ເຢຍ​ລະ​ມັນ ແລະ ທ່ານ ໂອ​ລີ​ວີ​ເອ ດີ​ດຼີ ຫົວ­ໜ້າ​ບໍ­ລິ­ຫານ​ໃຫຍ່​ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ມີ​ຄະ­ນະ​ອຳ­ນວຍ​ການ ຜູ້­ຕາງ­ໜ້າ​ຈາກ​ກະ­ຊວງ ພະ­ນັກ­ງານ​ຄູ-ອາ­ຈານ ແລະ ນັກ​ສຶກ​ສາ​ເຂົ້າ​ຮ່ວມ.

    ທ່ານ ໂອ​ລີ​ວີ​ເອ ດີ​ດຼີ ກ່າວ​ວ່າ: ເພື່ອ​ສະ­ໜັບ­ສະ­ໜູນ​ການ​ປັບ­ປຸງ ແລະ ພັດ­ທະ­ນາ​ຄູ່​ມື​ອຸ­ປະ­ກອນ​ການ​ສິດ­ສອນ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ​ການ​ຮຽນ-ການ​ສອນ​ຫຼັກ­ສູດ​ໃໝ່​ຂອງ​ສາ­ຂາ​ໄຟ­ຟ້າ ແລະ ວິ­ຊາ​ກົນ​ຈັກ​ໃຫ້​ມີ​ປະ­ສິດ­ທິ­ພາບ ສະ­ໜັບ­ສະ­ໜູນ​ທຶນ​ການ​ສຶກ​ສາ​ໄລ­ຍະ​ຍາວ ໃນ​ລະ­ດັບ​ຊັ້ນ​ສູງ ໃຫ້​ແກ່​ນັກ­ຮຽນ​ທີ່​ມາ​ຈາກ​ແຂວງ​ຄຳ​ມ່ວນ ທີ່​ສົນ­ໃຈ​ຮຽນ​ສາ­ຂາ​ວິ­ຊາ​ໄຟ­ຟ້າ​ພະ­ລັງ­ງານ​ນ້ຳ ແລະ ວິ­ຊາ​ກົນ​ຈັກ 7 ທຶນ​ໃນ​ໄລ­ຍະ 3 ປີ ແລະ ສະ­ໜອງ​ການ​ເຝິກ­ອົບ­ຮົມ​ດ້ານ​ວິ­ຊາ​ການ​ທີ່​ເໝາະ​ສົມ ໃຫ້​ແກ່​ພະ­ນັກ­ງານ​ບໍ­ລິ­ສັດ​ນ້ຳ​ເທີນ 2 ແລກ­ປ່ຽນ​ໃນ​ການ​ເຝິກ­ອົບ­ຮົມ​ນັກ​ສຶກ​ສາ 3 ຄົນ​ຕໍ່​ປີ ແລະ ເຝິກ­ອົບ­ຮົມ​ໃຫ້​ຄູ​ອາ­ຈານ 2 ຄົນ​ຕໍ່​ປີ ແລະ ແລກ­ປ່ຽນ​ຄວາມ​ຮູ້​ທາງ​ດ້ານ​ວິ­ຊາ​ການ ແລະ ປະ­ສົບ​ການ​ຕົວ​ຈິງ​ລະ­ຫວ່າງ​ພະ­ນັກ­ງານ​ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ກັບ​ຄູ-ອາ­ຈານ ແລະ ນັກ​ສຶກ​ສາ​ວິ­ທະ­ຍາ­ໄລ​ເຕັກ­ນິກ​ລາວ​ເຢຍ​ລະ​ມັນ ໂດຍ​ຜ່ານ​ກິດ­ຈະ­ກຳ​ວັນ​ໄຟ­ຟ້າ​ພະ­ລັງ­ງານ​ນ້ຳ​ທີ່​ໄດ້​ຈັດ​ຂຶ້ນ​ທຸກ​ປີ.

ຂ່າວທີ່ກ່ຽວຂ້ອງ