ຂ່າວຫຼ້າສຸດ

ມອບເຄື່ອງຊ່ວຍເຫຼືອ ແລະ ໃຫ້ກຳລັງໃຈ ຜູ້ໄດ້ຮັບຜົນກະທົບນ້ຳຖ້ວມ

313 20 ກ.ຍ. 2018 ຂ່າວໜ້າ​ໜຶ່ງ
ມອບເຄື່ອງຊ່ວຍເຫຼືອ ແລະ ໃຫ້ກຳລັງໃຈ ຜູ້ໄດ້ຮັບຜົນກະທົບນ້ຳຖ້ວມ

    ເລີ່ມ​ແຕ່​ວັນ​ທີ 23 ສິງ­ຫາ 2018 ເປັນ­ຕົ້ນ​ມາ​ ນ້ຳ​ໄດ້​ລົ້ນ​ອອກ​ຈາກ​ຝັ່ງ​ແຄມ​ນ້ຳ​ງື່ມ​ໄຫຼ​ເຂົ້າ​ສູ່​ພື້ນ​ທີ່​ທຳ​ການ​ຜະ­ລິດ ໄຮ່­ນາ ແລະ ຮົ້ວ​ສວນ​ຂອງ​ປະ­ຊາ­ຊົນ ເຮັດ​ໃຫ້​ມີ​ຄວາມ​ເສຍ​ຫາຍ​ຢ່າງ​ໜັກ­ໜ່ວງ ເຊິ່ງ​ມີ​ຈຳ­ນວນ​ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ​ທັງ​ໝົດ 342 ຄອບ­ຄົວ 2.371 ຄົນ ຍິງ 1.251 ຄົນ ເນື້ອ­ທີ່​ດິນ​ນາ​ເສຍ​ຫາຍ​ທັງ​ໝົດ 180 ເຮັກ­ຕາ ໃນ​ນີ້​ຂຶ້ນ​ກັບ​ເຂດ​ບ້ານ​ແສນ​ດິນ ເມືອງ​ນາ​ຊາຍ​ທອງ 98 ເຮັກ­ຕາ ເສຍ​ຫາຍ 100% ເນື້ອ­ທີ່​ສວນ​ມັນ­ຕົ້ນ 250 ເຮັກ­ຕາ ສວນ​ອ້ອຍ 25 ເຮັກ­ຕາ ສວນ​ສາ­ລີ 42 ເຮັກ­ຕາ ແລະ ໜອງ​ປາ 21 ໜອງ ມີ​ເນື້ອ­ທີ່ 9 ເຮັກ­ຕາ ພາຍ­ຫຼັງ​ທີ່​ນ້ຳ​ໄດ້​ເລີ່ມ​ບົກ​ແຫ້ງ​ລົງ ປັດ­ຈຸ­ບັນ​ ປະ­ຊາ­ຊົນ​ທີ່​ຍົກ­ຍ້າຍ​ໄດ້​ກັບ​ຄືນ​ມາ​ຢູ່​ເຮືອນ​ຊານ​ຂອງ​ຕົນ​ເອງ​ໝົດ​ທຸກ​ຄອບ­ຄົວ.

    ວັນ​ທີ 19 ກັນ­ຍາ 2018 ຫ້ອງ​ວ່າ­ການ​ປົກ­ຄອງ ແລະ ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ໄດ້​ນຳ​ເອົາ​ເຄື່ອງ​ອຸ­ປະ­ໂພກ-ບໍ­ລິ­ໂພກ ໄປ​ຊ່ວຍ­ເຫຼືອ​ປະ­ຊາ­ຊົນ​ບ້ານ​ໂພນ​ໄຊ ຈຳ­ນວນ 342 ຄອບ­ຄົວ ກ່າວ​ມອບ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ແລະ ກ່າວ​ຮັບ​ໂດຍ​ທ່ານ ເຈີ່ ປາວ ມົວ ນາຍ­ບ້ານ​ໂພນ​ໄຊ ມີ​ທ່ານນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ທ່ານ ວັນ­ເພັງ ອິນ​ທະ​ວົງ ຮອງ​ເຈົ້າ­ເມືອງ​ໄຊ​ທາ­ນີ ຕະ­ຫຼອດ​ຮອດ​ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ເຂົ້າ​ຮ່ວມ.

    ສຳ­ລັບ​ເຄື່ອງ​ທີ່​ນຳ​ມາ​ມອບ​ໃຫ້​ປະ­ຊາ­ຊົນ​ຄັ້ງ​ນີ້ ປະ­ກອບ​ມີ​ເຂົ້າ­ສານ 1.750 ກິ​ໂລ ນ້ຳ​ດື່ມ 250 ແພັກ ເຂົ້າ­ໜົມ 20 ແກັດ ປ໋ອງ​ປາ 8 ແກັດ ນົມ 20 ແກັດ ເຄື່ອງ​ຢັ່ງ​ຊີບ 13 ເປົາ ເຄື່ອງ​ຊູ​ກຳ­ລັງ 10 ແກັດ ເຄື່ອງ­ນຸ່ງ​ຫົ່ມ 10 ເປົາ ເຄື່ອງ​ກອງ​ນ້ຳ 1 ເຄື່ອງ ແລະ ເງິນ­ສົດ 5 ລ້ານ​ກີບ ເພື່ອ​ເປັນ​ການ​ບັນ­ເທົາ​ທຸກ​ເບື້ອງ​ຕົ້ນ ແລະ ເປັນ​ການ​ໃຫ້​ກຳ­ລັງ​ໃຈ​ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ.

ຂ່າວທີ່ກ່ຽວຂ້ອງ