ການລົງທຶນພາກເອກະຊົນ ສືບຕໍ່ຂະຫຍາຍຕົວໃນຈັງຫວະດີ

218 20 ກ.ຍ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ສະ­ຫຼຸບ ແລະ ຖອດ​ຖອນ​ບົດ­ຮຽນ​ຂອງ​ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ຂັ້ນ​ສູນ​ກາງ ແລະ ທ້ອງ­ຖິ່ນ ປະ­ຈຳ​ປີ 2018 ຈັດ​ຂຶ້ນ​ວັນ​ທີ 19 ກັນ­ຍາ 2018 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ຂັ້ນ​ສູນ​ກາງ (ຄລທສ) ມີ​ລັດ­ຖະ­ມົນ­ຕີ ເຈົ້າ​ຄອງ ເຈົ້າ­ແຂວງ ແລະ ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ປຶກ­ສາ​ຫາ­ລື​ແລກ­ປ່ຽນ​ບົດ­ຮຽນ ແລະ ປະ­ກອບ​ຄຳ​ເຫັນ​ທາງ​ດ້ານ​ນະ­ໂຍ­ບາຍ​ດ້ານ​ວິ­ຊາ​ການ ແລະ ການ​ຄຸ້ມ​ຄອງ​ປະ­ສານ​ງານ​ກ່ຽວ​ກັບ​ວຽກ​ງານ​ສົ່ງ­ເສີມ​ການ​ລົງ­ທຶນ​ຜ່ານ​ກົນ​ໄກ​ປະ­ຕູ​ດຽວ​ຂອງ ຄລທ ແຕ່​ລະ​ຂັ້ນ​ພາຍ­ຫຼັງ​ທີ່​ໄດ້​ມີ​ກົດ­ໝາຍ ນິ­ຕິ​ກຳ ແລະ ລະ­ບຽບ​ການ​ໃນ​ການ­ຈັດ­ຕັ້ງ​ປະ­ຕິ­ບັດ ແລະ ເຄື່ອນ​ໄຫວ​ຕາມ​ພາ­ລະ​ບົດ­ບາດ ແລະ ໜ້າ­ທີ່​ຄວາມ​ຮັບ­ຜິດ­ຊອບ​ຂອງ​ຕົນ​ໃນ​ໄລ­ຍະ 1 ປີ­ຜ່ານ­ມາ ແລະ ໃນ​ໄລ­ຍະ​ຜ່ານ​ມາ ຄະ­ນະ​ກຳ­ມະ­ການ​ໄດ້​ມີ​ການ­ເຄື່ອນ­ໄຫວ​ເປັນ​ຮູບ​ປະ​ທຳ​ຢ່າງ​ຕັ້ງ­ໜ້າ ໃນ​ການ​ຊຸກ­ຍູ້​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ໃນ​ຂອບ​ເຂດ​ທົ່ວ​ປະ­ເທດ ເຊິ່ງ​ເປັນ​ປັດ​ໄຈ​ສຳ­ຄັນ​ທີ່​ເຮັດ​ໃຫ້­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໂດຍ​ລວມ ໄດ້​ມີ​ຈັງ­ຫວະ​ຂະ­ຫຍາຍ­ຕົວ​ໃນ​ໄລ­ຍະ 8 ເດືອນ​ຜ່ານ​ມາ ເຫັນ​ວ່າ­ການ​ລົງ­ທຶນ​ຂອງ​ພາກ​ເອ­ກະ​ຊົນ ຍັງ​ສືບ­ຕໍ່​ຂະ­ຫຍາຍ­ຕົວ​ໃນ​ຈັງ­ຫວະ​ດີ ສະ­ແດງ​ອອກ​ຕົວ​ເລກ​ອະ­ນຸ­ມັດ​ການ​ລົງ­ທຶນ ແລະ ທຶນ​ຈົດ​ທະ­ບຽນ​ບັນ­ລຸ​ເຖິງ 3.880 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 33 ພັນ​ຕື້​ກີບ ເກີນ​ຕົວ​ເລກ​ກຳ­ນົດ​ໃນ​ແຜນ​ປີ​ເຖິງ 60% ຕົວ​ເລກ​ທີ່​ວາງ​ໄວ້ 2,4 ຕື້​ໂດ​ລາ​ຕໍ່​ປີ ມູນ​ຄ່າ​ການ​ລົງ­ທຶນ​ດັ່ງ­ກ່າວ​ກວມ​ເອົາ 2.924 ໂຄງ­ການ ພ້ອມ​ນັ້ນ ໃນ​ການ​ອຳ­ນວຍ​ຄວາມ​ດວກ​ດຳ­ເນີນ​ທຸ­ລະ​ກິດ ສປປ ລາວ ຖືກ​ຈັດ​ອັນ​ດັບ​ທີ 141 ແລະ ເພື່ອ​ປຸກ­ລະ­ດົມ​ໃຫ້​ບັນ­ດາ​ຕ່າງ­ປະ­ເທດ​ມີ​ການ​ແຂ່ງ­ຂັນ​ດ້ານ​ລະ­ບຽບ​ການ​ທີ່​ມີ​ປະ­ສິດ­ທິ­ພາບ ເຊິ່ງ​ລາວ​ເຮົາ​ກໍ່​ໄດ້​ອອກ​ຄຳ​ແນະ­ນຳ​ເລກ​ທີ 02/ນຍ ລົງ​ວັນ​ທີ 1 ກຸມ­ພາ 2018 ວ່າ​ດ້ວຍ​ການ​ປັບ­ປຸງ​ບັນ­ດາ​ລະ­ບຽບ​ການ ແລະ ກົນ​ໄກ​ປະ­ສານ​ງານ​ໃນ​ການ​ດຳ­ເນີນ​ທຸ­ລະ​ກິດ ແລະ ການ​ເລີ່ມ​ຕົ້ນ​ທຸ­ລະ​ກິດ​ຢູ່​ລາວ ຈັດ​ຢູ່​ໃນ​ອັນ​ດັບ 164 ໃນ​ຈຳ­ນວນ 190 ປະ­ເທດ​ຂົງ­ເຂດ​ເສດ­ຖະ­ກິດ.

ຂ່າວທີ່ກ່ຽວຂ້ອງ