ຂ່າວຫຼ້າສຸດ

ຫ້າມຂຶ້ນລາຄາເຂົ້າໂດຍພາລະການ ຫາກພົບເຫັນຈະຢຶດພ້ອມທັງປັບໃໝ

362 20 ກ.ຍ. 2018 ຂ່າວໜ້າ​ໜຶ່ງ
ຫ້າມຂຶ້ນລາຄາເຂົ້າໂດຍພາລະການ ຫາກພົບເຫັນຈະຢຶດພ້ອມທັງປັບໃໝ

    ເພື່ອ​ຮັບ­ປະ­ກັນ​ລາ­ຄາ​ເຂົ້າ­ເປືອກ-ເຂົ້າ­ສານ​ໃນ​ຕະ­ຫຼາດ ບໍ່​ໃຫ້​ມີ​ຜົນ​ກະ­ທົບ​ຕໍ່​ການ​ເປັນ​ຢູ່​ຂອງ​ປະ­ຊາ­ຊົນ​ຜູ້​ບໍ­ລິ­ໂພກ​ໃນ​ສະ­ເພາະ​ໜ້າ ແລະ ຍາວ​ນານ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ (ອຄ) ໄດ້​ອອກ​ແຈ້ງ​ການ​ລົງ​ວັນ​ທີ 17 ກັນ­ຍາ 2018 ເຖິງ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ແຂວງ ນະ­ຄອນ­ຫຼວງ ໃຫ້​ເພີ່ມ​ທະ­ວີ​ການ​ຄຸ້ມ​ຄອງ​ການ​ເກັບ​ຊື້​ເຂົ້າ​ກິນ ແລະ ລາ­ຄາ​ຊື້​ຂາຍ​ເຂົ້າ​ຕາມ​ຕະ­ຫຼາດ.

    ເພື່ອ​ສະ­ກັດ​ກັ້ນ​ການ​ປັ່ນ​ປ່ວນ​ລາ­ຄາ​ເຂົ້າ­ຂອງ​ຊາວ​ຕ່າງ­ປະ­ເທດ ທີ່​ເຂົ້າ​ມາ​ເກັບ​ຊື້​ເຂົ້າ ແລະ ຮັບ­ປະ­ກັນ​ດຸ່ນ​ດ່ຽງ​ເຂົ້າ​ກິນ​ພາຍ​ໃນ​ປະ­ເທດ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຈຶ່ງ​ແຈ້ງ​ການ​ມາ​ຍັງ​ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ແຂວງ ນະ­ຄອນ­ຫຼວງ ປະ­ຕິ­ບັດ​ຄື: ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ໃນ​ການ​ຄຸ້ມ​ຄອງ ແລະ ຕິດ­ຕາມ​ກວດ­ກາ​ຢ່າງ​ເຂັ້ມ​ງວດ ຫ້າມ​ເດັດ­ຂາດ​ບໍ່​ໃຫ້​ພໍ່­ຄ້າ​ຊາວ​ຕ່າງ­ປະ­ເທດ ເຂົ້າ​ມາ​ເກັບ​ຊື້​ເຂົ້າ​ຢູ່​ພາຍ​ໃນ​ແຂວງ ແລະ ປັ່ນ​ປ່ວນ​ລາ­ຄາ​ເຂົ້າ​ໂດຍ​ບໍ່​ມີ​ທະ­ບຽນ​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ຂອງ​ລາວ ຖ້າ​ພົບ​ເຫັນ​ກໍ­ລະ­ນີ​ມີ​ການ​ລະ­ເມີດ​ດັ່ງ­ກ່າວ​ໃຫ້​ຢຶດ ຫຼື ອາ​ຍັດ ພ້ອມ​ປັບ​ໃໝ​ຕາມ​ລະ­ບຽບ​ກົດ­ໝາຍ​ວາງ​ອອກ ນອກ​ນີ້ ໃຫ້​ເອົາ­ໃຈ­ໃສ່​ຄຸ້ມ​ຄອງ​ລາ­ຄາ​ຊື້-ຂາຍ (ປະ­ເພດ​ເຂົ້າ​ກິນ​ທຸກ​ຊະ­ນິດ) ຕາມ​ຕະ­ຫຼາດ​ຢູ່​ພາຍ​ໃນ​ແຂວງ​ຂອງ​ຕົນ ຫຼີກ​ລ່ຽງ​ການ​ສວຍ­ໂອ­ກາດ​ຂຶ້ນ​ລາ­ຄາ​ໂດຍ​ພາ­ລະ​ການ ກ່ອນ​ຈະ​ຂຶ້ນ​ລາ­ຄາ ຕ້ອງ​ໄດ້​ຮັບ​ການ​ອະ­ນຸ­ຍາດ​ຈາກ​ຄະ­ນະ​ຄຸ້ມ​ຄອງ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ​ຂັ້ນ​ແຂວງ ແລະ ຂັ້ນ​ເມືອງ ເນື່ອງ​ຈາກ​ສິນ­ຄ້າ​ປະ­ເພດ​ເຂົ້າ ນອນ​ຢູ່​ໃນ​ລາຍ­ການ​ສິນ­ຄ້າ​ຄວບ​ຄຸມ​ລາ­ຄາ​ຕາມ​ບັນ­ຊີ (ກ) ຂອງ​ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ.

    ສຳ­ລັບ​ຜູ້​ມີ​ສິດ​ເກັບ​ຊື້​ເຂົ້າ​ຈາກ​ຊາວ­ນາ ຫຼື ກຸ່ມ​ຊາວ­ນາ ໄດ້​ຕ້ອງ​ແມ່ນ​ສະ­ມາ­ຄົມ ແລະ ກຸ່ມ​ໂຮງ­ສີ ຫຼື ທຸ­ລະ​ກິດ​ຊື້-ຂາຍ​ເຂົ້າ​ທີ່​ມີ​ໃບ​ທະ­ບຽນ​ໂດຍ​ຖືກ­ຕ້ອງ​ເທົ່າ​ນັ້ນ ສະ­ນັ້ນ ຖ້າ​ແຂວງ​ໃດ​ບໍ່​ທັນ​ມີ​ກໍ່​ໃຫ້​ເປັນ​ເຈົ້າ​ການ​ຮີບ​ຮ້ອນ​ຈັດ​ຕັ້ງ​ກຸ່ມ ຫຼື ສະ­ມາ­ຄົມ​ດັ່ງ­ກ່າວ​ຂຶ້ນ ສ່ວນ​ການ​ເກັບ​ຊື້​ເຂົ້າ­ຂອງ​ພາກ­ສ່ວນ​ຕ່າງໆ​ເຊັ່ນ: ການ​ເກັບ​ຊື້​ເຂົ້າ­ຂອງ​ສອງ​ກຳ­ລັງ (ປກຊ-ປກສ) ອົງ​ການ­ຈັດ­ຕັ້ງ​ສາ­ກົນ​ຕ່າງໆ ແລະ ທຸກ​ຮູບ​ແບບ​ການ​ເກັບ​ຊື້​ແມ່ນ​ຕ້ອງ​ພົວ­ພັນ​ຊື້​ນຳ​ກຸ່ມ​ໂຮງ­ສີ​ເຂົ້າ ຫຼື ສະ­ມາ­ຄົມ​ໂຮງ­ສີ​ເຂົ້າ­ຂອງ​ແຂວງ​ໂດຍ​ກົງ ບົນ​ພື້ນ­ຖານ​ການ​ຄຸ້ມ​ຄອງ ແລະ ຢັ້ງ­ຢືນ​ຈາກ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ແຂວງ ນະ­ຄອນ­ຫຼວງ ທັງ​ນີ້ ເພື່ອ​ໃຫ້​ຂະ­ແໜງ­ການ​ສາ­ມາດ​ເກັບ​ກຳ​ໄດ້​ສະ­ພາບ​ຄວາມ​ເປັນ​ຈິງ​ຂອງ​ລາ­ຄາ ແລະ ການ​ຊື້-ຂາຍ​ເຂົ້າ​ຢູ່​ພາຍ​ໃນ​ແຂວງ​ຂອງ​ຕົນ.

    ນອກ​ນີ້ ໃຫ້​ທ່ານ​ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ແຂວງ ນະ­ຄອນ­ຫຼວງ​ວຽງ​ຈັນ ຊີ້​ນຳ​ຫ້ອງ­ການ​ອຸດ­ສາ­ຫະ­ກຳ ແລະ ການ​ຄ້າ​ເມືອງ ບົນ​ພື້ນ­ຖານ​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເພື່ອ​ຮັບ­ປະ­ກັນ​ການ​ດຸ່ນ​ດ່ຽງ​ເຂົ້າ​ກິນ​ພາຍ​ໃນ​ທ້ອງ­ຖິ່ນ​ຂອງ​ຕົນ.

ຂ່າວທີ່ກ່ຽວຂ້ອງ