ຂ່າວ​ສັ້ນ

140 20 ກ.ຍ. 2018 ຂ່າວຕ່າງປະເທດ
ຂ່າວ​ສັ້ນ

     ຣັດ​ເຊຍ: ກະຊວງ​ປ້ອງ​ກັນ​ປະເທດ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 18 ກັນຍາ​ນີ້​ວ່າ ກອງທັບ​ຣັດ​ເຊຍ ໄດ້​ຄົ້ນ​ພົບ​ຈຸດ​ທີ່ Il-20 ຕົກ​ຢູ່​ໃນ​ເຂດ​ທະເລ​ເມ​ດີ​ເຕ​ຣາ​ເນ ພ້ອມ​ກັນ​ນັ້ນ​ກໍ​ໄດ້​ນຳ​ເອົາ​ສົບ​ທະຫານ​ທີ່​ເສຍ​ຊີວິດ ພ້ອມ​ທັງ​ເຄື່ອງໃຊ້​ຂອງ​ບຸກຄົນ ກໍ​ຄື​ສິ້ນ​ສ່ວນ​ຂອງ​ເຮືອບິນ ຂຶ້ນ​ໄປ​ຍັງ​ກຳປັ່ນ​ສູ້​ຮົບ​ຂອງ​ກອງທັບ​ເຮືອ​ຣັດ​ເຊຍ​ແລ້ວ. ກ່ອນ​ໜ້າ​ນັ້ນ ໂຄສົກ​ກະຊວງ​ປ້ອງ​ກັນ​ປະເທດ​ຣັດ​ເຊຍ ອີ​ກໍ ໂກ​ນາ​ເຊນ​ກອບ ເວົ້າ​ວ່າ​ເຮືອບິນ Il-20 ຂອງ​ຣັດ​ເຊຍ ລຳ​ນັ້ນ​ຖືກ​ຍິງ​ຜິດ​ເປົ້າ​ຈາກ​ລະບົບ​ປ້ອງ​ກັນ ອາກາດ​ຂອງ​ຊີ​ຣີ ຍ້ອນ​ວ່າ​ເຮືອບິນ​ສູ້​ຮົບ F-16 ຂອງ​ອິດ​ສະ​ຣາ​ແອນ ໄດ້​ໃຊ້​ຍຸດທະວິທີ​ຊ່ອນ​ຕົວ ຢູ່​ດ້ານ​ຫຼັງ​ເຮືອບິນ IL-20.

    ຕວກ​ກີ: ມີ​ຜູ້​ເສຍ​ຊີວິດ​ຢ່າງ​ໜ້ອຍ 7 ຄົນ ແລະ ບາດເຈັບ 28 ຄົນ ຢູ່​ໃນ​ເຫດການ​ລົດ​ບັດ ຄັນ​ໜຶ່ງ ເກີດ​ອຸບັດເຫດ​ພິກ​ຂວ້ຳ​ໃນ​ວັນ​ທີ 18 ກັນຍາ​ນີ້ ຢູ່​ໃນ​ບໍລິເວນ​ທາງ​ທິດຕາເວັນຕົກ ປະເທດ​ຕວກ​ກີ. ອຸບັດເຫດ​ດັ່ງກ່າວ​ເກີດ​ຂຶ້ນ ໃນ​ຂະນະ​ທີ່​ລົດ​ບັດ​ໂດຍສານ​ຄັນ​ດັ່ງກ່າວ​ເສຍ​ຫຼັກ ແລະ ແລ່ນ​ໄປ​ຕົກລົງ​ໃນ​ເຫວ.

    ອີ​ຣານ: ມີ​ຜູ້​ເສຍ​ຊີວິດ​ກັບ​ທີ່​ຢ່າງ​ໜ້ອຍ 19 ຄົນ ແລະ ເສຍ​ຊີວິດ​ຢູ່​ໃນ​ໂຮງໝໍ​ອີກ 2 ຄົນ ໃນ​ເຫດການ​ລົດ​ບັດ​ຄັນ​ໜຶ່ງ ຕຳ​ກັບ​ລົດ​ສະແຕກ​ບັນຈຸ​ນ້ຳມັນ​ຄັນ​ໜຶ່ງ ຊຶ່ງ​ເກີດ​ຂຶ້ນ​ຢູ່​ໃນ​ເຂດ​ພາກ​ກາງ ອີ​ຣານ ເມື່ອ​ວັນ​ທີ 17 ກັນຍາ​ນີ້.

   ໂກ​ລົມ​ບີ: ແຈ້ງ​ການ​ຂອງ​ອົງການ​ທີ່​ກ່ຽວຂ້ອງ​ໃນ​ໂກ​ລົມ​ບີ ໃຫ້​ຮູ້​ວ່າ ກອງ​ກຳລັງ​ປ້ອງ​ກັນ ແລະ​ຕ້ານ​ຢາ​ເສບ​ຕິດ​ຂອງ​ປະເທດ​ນີ້ ຈັບ​ເປົ້າ​ໝາຍ​ໄດ້ 10 ຄົນ ດ້ວຍ​ຂໍ້​ກ່າວ​ຫາ​ວ່າ​ສະ​ສົມ ໂຄ​ເຄນ ຈຳນວນ 13,4 ໂຕນ ຊຶ່ງ​ເປັນ​ຂອງ​ອົງການ​ອາ​ຊະ​ຍາ​ກຳ Clan del Golfo ຢູ່​ໃນ​ໂກ​ລົມ​ບີ. ຂ່າວ​ແຈ້ງວ່າ ຢາ​ເສບ​ຕິດ​ດັ່ງກ່າວ​ຖືກ​ຝັງ​ໄວ້​ໃຕ້​ດິນ ໃນ​ບໍລິເວນ​ຟາມ​ປູກ​ກ້ວຍ 4 ແຫ່ງ ຢູ່​ໃນ​ລັດ ອູ​ຣາ​ບາ. ກະຊວງ​ປ້ອງ​ກັນ​ປະເທດ​ໂກ​ລົມ​ບີ ໃຫ້​ຮູ້​ວ່າ ອົງການ​ອາ​ຊະ​ຍາ​ກຳ​ດັ່ງກ່າວ ມີ​ສະມາຊິກ ຢູ່​ປະມານ 1.800 ຄົນ.

ຂ່າວທີ່ກ່ຽວຂ້ອງ