ຂ່າວຫຼ້າສຸດ

ທະນາຄານ​ກາງ​ຣັດ​ເຊຍ ຂຶ້ນ​ອັດຕາ​ດອກ​ເບ້ຍ​ເປັນ​ເທື່ອ​ທຳ​ອິດ​ໃນ​ຮອບ 4 ປີ

177 20 ກ.ຍ. 2018 ຂ່າວຕ່າງປະເທດ
ທະນາຄານ​ກາງ​ຣັດ​ເຊຍ ຂຶ້ນ​ອັດຕາ​ດອກ​ເບ້ຍ​ເປັນ​ເທື່ອ​ທຳ​ອິດ​ໃນ​ຮອບ 4 ປີ

    ເມື່ອ​ອາທິດ​ທີ່​ຜ່ານ​ມາ ທະນາຄານ​ກາງ​ຣັດ​ເຊຍ ໄດ້​ຂຶ້ນ​ອັດຕາ​ດອກ​ເບ້ຍ​ພື້ນຖານ​ຕື່ມ 0,25% ຂຶ້ນ​ເປັນ 7,5% ໂດຍ​ອ້າງ​ວ່າ​ມີ​ຄວາມ​ສ່ຽງ​ເງິນ​ເຟີ້​ເພີ່ມ​ຂຶ້ນ. ນີ້​ເປັນ​ເທື່ອ​ທຳ​ອິດ ທີ່​ທະນາຄານ​ກາງ​ຣັດ​ເຊຍ ຂຶ້ນ​ອັດຕາ​ດອກ​ເບ້ຍ ນັບ​ແຕ່​ປີ 2014 ເປັນຕົ້ນ​ມາ ເມື່ອ​ເກີດ​ວິ​ກິດ​ການ​ເງິນຕາ​ຢູ່​ໃນ​ປະເທດ​ນີ້ ຍ້ອນ​ຜົນ​ກະທົບ​ຈາກ​ການ​ປິດ​ລ້ອມ​ຂອງ​ຝ່າຍ​ຕາເວັນຕົກ.

    ຖະແຫຼງການ​ຂອງ​ທະນາຄານ​ກາງ​ຣັດ​ເຊຍ ໃຫ້​ຮູ້​ວ່າ ເຫດຜົນ​ຂອງ​ການ​ຂຶ້ນ​ອັດຕາ​ດອກ​ເບ້ຍ ແມ່ນ​ເປັນ​ຍ້ອນ​ວ່າ “ບັນດາ​ຄວາມ​ປ່ຽນແປງ​ກ່ຽວ​ກັບ ເງື່ອນໄຂ​ຕ່າງໆ​ຈາກ​ພາຍ​ນອກ” ໄດ້​ເຮັດ​ໃຫ້​ຄວາມ​ສ່ຽງ​ເງິນ​ເຟີ້​ເພີ່ມ​ຂຶ້ນ​ຫຼາຍ​ພໍ​ສົມຄວນ ນັບ​ແຕ່​ການ​ປະຊຸມ​ເທື່ອ​​ຫຼ້​າສຸດ​ກ່ອນ​ໜ້າ​ນີ້​ຂອງ​ທະນາຄານ​ດັ່ງ​​ກ່າວ.

    ທ່າມກາງ​ສະພາບ​ການ​ຄື​ແນວ​ນັ້ນ ທະນາຄານ​ກາງ​ຣັດ​ເຊຍ ຈະ​ພິຈາລະນາ​ສືບຕໍ່​ຂຶ້ນ​ອັດຕາ​ດອກ​ເບ້ຍ​ພື້ນຖານ ບົນ​ພື້ນຖານ​ຂອງ​ບັນດາ​ປັດ​ໄຈ​ກ່ຽວ​ກັບ​ເສດຖະກິດ ແລະ​ເງິນ​ເຟີ້ ກໍ​ຄື​ຄວາມ​ສ່ຽງ​ຕ່າງໆ ທີ່​ວາງ​ອອກ​ມາ​ໂດຍ​ມີ​ເງື່ອນໄຂ​ຈາກ​ພາຍ​ນອກ ແລະ ປະຕິກິລິຍາ​ຂອງ​ຕະຫຼາດ​ການ​ເງິນ​ຕ່າງໆ.

    ທະນາຄານ​ກາງ​ຣັດ​ເຊຍ ໄດ້​ຕັດ​ຫຼຸດ​ອັດຕາ​ດອກ​ເບ້ຍ​ພື້ນຖານ​ຢ່າງ​ຕໍ່​ເນື່ອງ ຈົນ​ຮອດ​ເດືອນ​ມີນາ ປີ 2017 ແລະ​ ຫຼັງ​ຈາກ​ນັ້ນ​ກໍ​ຮັກສາ​ໄວ້​ທີ່​ລະດັບ​ທີ່​ໝັ້ນຄົງ ນັບ​ແຕ່​ນັ້ນ​ເປັນຕົ້ນ​ມາ. ຄາດ​ວ່າ ການ​ປະຊຸມ​ເທື່ອ​ຕໍ່​ໄປ​ຂອງ​ທະນາຄານ​ກາງ​ຣັດ​ເຊຍ ເພື່ອ​ຫາລື​ກ່ຽວ​ກັບ​ການ​ຂຶ້ນ​ອັດຕາ​ດອກ​ເບ້ຍ ຈະ​ມີ​ຂຶ້ນ​ໃນ​ວັນ​ທີ 26 ຕຸລາ​ໜ້າ​ນີ້.

ຂ່າວທີ່ກ່ຽວຂ້ອງ