ທະວີບ​ອາ​ຟະ​ຣິກ​ກາ ມີ​ມະຫາ​ເສດຖີ 24 ຄົນ

102 20 ກ.ຍ. 2018 ຂ່າວຕ່າງປະເທດ
ທະວີບ​ອາ​ຟະ​ຣິກ​ກາ ມີ​ມະຫາ​ເສດຖີ 24 ຄົນ

     ບົດ​ລາຍ​ງານ​ສະບັບ​ໜຶ່ງ ກ່ຽວ​ກັບ​ຄວາມ​ຈະເລີນ​ຮຸ່ງເຮືອງ​ໃນ​ປີ 2018 ຂອງ​ທະນາຄານ ອາ​ຟຣິກ​ກາ-ອາຊີ (AfrAsia Bank) ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ລະບຸ​ວ່າ ຍອດ​ມູນ​ຄ່າ​ຊັບ​ສິນ​ສ່ວນ​ບຸກຄົນ​ຢູ່​ໃນ​ທະວີບ​ອາ​ຟະ​ຣິກ​ກາ ໃນ​ປັດຈຸບັນ​ນີ້​ບັນລຸ​ປະມານ 2.300 ຕື້​ໂດ​ລາ ສະຫະລັດ ແລະ​ຈະ​ເພີ່ມ​ຂຶ້ນ​ຕື່ມ 34% ພາຍ​ໃນ 10 ປີ​ຕໍ່ໜ້າ ໂດຍ​ຈະ​ບັນລຸ​ທີ່​ປະມານ  3.100 ຕື້​ໂດ​ລາ​ສະຫະລັດ ພາຍ​ໃນ​ປີ 2027.

   ບົດ​ລາຍ​ງານ​ດັ່ງກ່າວ​ໃຫ້​ຮູ້​ວ່າ ໃນ​ປັດຈຸບັນ​ນີ້ ຢູ່​ໃນ​ທະວີບ​ອາ​ຟະ​ຣິກ​ກາ ມີ​ເສດຖີ​ເງິນ​ລ້ານ​ຢູ່ 7.100 ຄົນ ດ້ວຍ​ມູນ​ຄ່າ​ສຸດທິ​ຂອງ​ຊັບ​ສິນ​ແຕ່ 10 ລ້ານ​ໂດ​ລາ​ສະຫະລັດ​ຂຶ້ນ​ໄປ ໃນ​ຂະນະ​ທີ່ ເສດຖີ​ເງິນ​ລ້ານ 320 ກວ່າ​ຄົນ ມີ​ມູນ​ຄ່າ​ສຸດທິ​ຂອງ​ຊັບ​ສິນ​ແຕ່ 100 ລ້ານ ໂດ​ລາ​ສະຫະລັດ​ຂຶ້ນ​ໄປ ແລະ​ມີ​ມະຫາ​ເສດຖີ ຫຼື​ເສດຖີ​ເງິນ​ຕື້ 24 ຄົນ ທີ່​ມູນ​ຄ່າ​ສຸດທິ​ຂອງ​ຊັບ​ສິນ​ແຕ່ 1 ຕື້ ໂດ​ລາ​ສະຫະລັດ​ຂຶ້ນ​ໄປ.

    ຊັບ​ສິນ​ໂດຍ​ຄິດ​ສະເລ່ຍ​ຂອງ​ບຸກຄົນ ຢູ່​ໃນ​ທະວີບ​ອາ​ຟະ​ຣິກ​ກາ ແມ່ນ​ຢູ່​ທີ່ 2.000 ໂດ​ລາ ສະຫະລັດ ໂດຍ​ມີ 148.000 ກວ່າ​ຄົນ ທີ່​ມີ​ມູນ​ຄ່າ​ສຸດທິ​ຂອງ​ຊັບ​ສິນ​ສູງ​ແຕ່ 1 ລ້ານ ໂດ​ລາ​ສະຫະລັດ​ຂຶ້ນ​ໄປ. ທີ່​ໜ້າ​ໃສ່ໃຈ​ກໍ​ຄື​ວ່າ ອາ​ຟະ​ຣິກ​ກາ​ໃຕ້ ເປັນ​ປະເທດ​ຢູ່​ໃນ​ແຖວ​ໜ້າ​ຂອງ​ທະວີບ​ອາ​ຟະ​ຣິກ​ກາ ໃນ​ດ້ານ​ປະລິມານ​ບຸກຄົນ​ທີ່​ລ້ຳ​ລວຍ​ທີ່​ສຸດ ໂດຍ​ມີ​ຍອດ​ມູນ​ຄ່າ​ຊັບ​ສິນ 722 ຕື້​ໂດ​ລາ ສະຫະລັດ ໃນ​ຂະນະ​ທີ່​ອັນ​ດັບ​ຮອງ​ລົງ​ມາ​ກໍ​ແມ່ນ​ເອ​ຢິບ (330 ຕື້​ໂດ​ລາ​ສະຫະລັດ) ແລະ​ນີ​ເຊຣີ  (253 ຕື້​ໂດ​ລາ​ສະຫະລັດ). AfrAsia Bank ກໍ​ໄດ້​ໃຫ້ການ​ຄາດ​ຄະເນ​ວ່າ ຣູ​ອັນ​ດາ ອູ​ກັນ​ດາ ເມົາ​ຣີ​ຕີ​ອຸ​​ສ ແລະ​ກາ​ນາ ຈະ​ມີ​ລະດັບ​ຄວາມ​ເຕີບ​ໃຫຍ່​ດ້ານ​ຄວາມ​ຈະເລີນ​ຮຸ່ງເຮືອງ​ສູງ​ສຸດ ພາຍ​ໃນ 10 ປີ​ຕໍ່ໜ້າ ດ້ວຍ​ອັດຕາ​ສ່ວນ​ແຕ່ 90% ຫາ 150%. ໃນ​ເວລາ​ດຽວ​ກັນ​ນັ້ນ ຄວາມ​ເຕີບ​ໃຫຍ່ ດ້ານ​ຄວາມ​ຈະເລີນ​ຮຸ່ງເຮືອງ ຢູ່​ໃນ​ເອ​ທີ​ໂອ​ປີ ໂມ​ຊຳ​ບິກ ຊຳ​ບີ ເຄນ​ຢາ ບົດ​ສະ​ວາ​ນາ ແລະ ນາ​ມີ​ບີ ກໍ​ມີ​ຄວາມ​ໝັ້ນ​ທ່ຽງ​ພໍ​ສົມຄວນ ດ້ວຍ​ອັດຕາ​ສ່ວນ​ເຕີບ​ໃຫຍ່​ແຕ່ 50% ຫາ 80%.

    ບົດ​ລາຍ​ງານ​ຂອງ AfrAsia Bank ຍັງ​ໃຫ້​ຮູ້​ວ່າ ຄວາມ​ຈະເລີນ​ຮຸ່ງເຮືອງ ຢູ່​ໃນ​ທະວີບ ອາ​ຟະ​ຣິກ​ກາ ໄດ້​ເພີ່ມ​ຂຶ້ນ 13% ໃນ 10 ປີ​ທີ່​ຜ່ານ​ມາ. ສະເພາະ​ໃນ​ປີ 2017 ມູນ​ຄ່າ​ຊັບ​ສິນ​ສຸດທິ ໄດ້​ເພີ່ມ​ຂຶ້ນ 3% ໂດຍ​ທີ່ ເມົາ​ຣີ​ຕີ​ອຸ​​ສ ເປັນ​ປະເທດ​ແຖວ​ໜ້າ ໃນ​ດ້ານ​ລະດັບ​ຄວາມ​ເຕີບ​ໂຕ ດ້ານ​ຄວາມ​ຈະເລີນ​ຮຸ່ງເຮືອງ​ຂອງ​ບຸກຄົນ.

    ເມື່ອ​ເບິ່ງ​ກ່ຽວ​ກັບ 10 ນະຄອນ​ທີ່​ລ້ຳ​ລວຍ​ທີ່​ສຸດ​ໃນ​ທະວີບ​ອາ​ຟະ​ຣິກ​ກາ ກໍ​ແມ່ນ​ນະຄອນ ໂຈ​ຮັນ​ແນ​​ສ​ເບີກ ຂອງ​ອາ​ຟະ​ຣິກ​ກາ​ໃຕ້ ຖືກ​ຈັດ​ຢູ່​ໃນ​ອັນ​ດັບ​ຕົ້ນ ໂດຍ​ມີ​ມູນ​ຄ່າ 276 ຕື້​ໂດ​ລາ ສະຫະລັດ ໃນ​ຂະນະ​ທີ່​ອັນ​ດັບ​ຮອງ​ລົງ​ມາ​ກໍ​ແມ່ນ​ນະຄອນ ເລີ​ແກ ຂອງ​ເອ​ຢິບ ທີ່​ມີ​ມູນ​ຄ່າ 140 ຕື້​ໂດ​ລາ​ສະຫະລັດ. ອີກ 8 ນະຄອນ​ທີ່​ຖືກ​ຈັດ​ຢູ່​ໃນ​ອັນ​ດັບ​ຮອງ​ລົງ​ມາ​ອີກ​ກໍ​ມີ ແຄບ​ທາວ ເດີ​ບານ ເປຣ​ຕໍ​ເຣຍ (ອາ​ຟະ​ຣິກ​ກາ​ໃຕ້) ນະຄອນ ລາກ​​ອສ  (ນີ​ເຊຣີ) ໄນ​ໂຣ​ບີ (ເຄນ​ຢາ) ລູ​ອັນ​ດາ (ອັງ​ໂກ​ລາ) ຄາ​ຊາບ​ລັງກາ (ມາ​ຣົກ) ອັກ​ກຣາ (ກາ​ນາ).

    ອາ​ຟະ​ຣິກ​ກາ​ໃຕ້ ເປັນ​ສະຫວັນ​ແຫ່ງ​ການທ່ອງທ່ຽວ ທີ່​ມີ​ຄວາມ​ປະ​ທັບ​ໃຈ​ທີ່​ສຸດ ສຳລັບ​ຄົນ​ທີ່ ລ້ຳ​ລວຍ ຊຶ່ງ​ຕົ້ນຕໍ​ກໍ​ແມ່ນ​ປາຍທາງ​ທີ່​ສຳຄັນ​ຕ່າງໆ ເຊັ່ນ​ສວນ​ອຸທິຍານ​ແຫ່ງ​ຊາດ ກຣູ​ເກີ ແຄບ​ທາວ ອຸມ​ລັນ​ກາ ແລະ​ຟຣານ​ໂຊ​ເອກ. ນອກຈາກ​ນັ້ນແລ້ວ ກໍ​ຍັງ​ມີ​ສະຖານທີ່​ທ່ອງ​ທ່ຽວ​ອື່ນໆ ຢູ່​ໃນ​ທະວີບ​ອາ​ຟະ​ຣິກ​ກາ ທີ່​ດຶງ​ດູດ​ນັກ​ທ່ອງ​ທ່ຽວ​ຜູ້​ທີ່​ລ້ຳ​ລວຍ ນັ້ນ​ກໍ​ແມ່ນ ມາ​ຣາ​ເກ​​ສ ແລະ​ຄາ​ຊາບ​ລັງກາ (ປະເທດ​ມາ​ຣົກ) ເລີ​ແກ ແລະ​ຊາມ​ແອ​​ລ​ເຊັກ (ປະເທດ​ເອ​ຢິບ) ນ້ຳ​ໂຕນ​ຕາດ ລີ​ວິງ​ສະ​ໂຕນ (ປະເທດ​ຊຳ​ບີ) ແລະ ​ອື່ນໆ.

 

ຂ່າວທີ່ກ່ຽວຂ້ອງ