ຂ່າວຫຼ້າສຸດ

5 ວິນາທີ​ໃດ​ມີ​ເດັກນ້ອຍ​ເສຍ​ຊີວິດ 1 ຄົນ​ໃນ​ປີ 2017

177 20 ກ.ຍ. 2018 ຂ່າວຕ່າງປະເທດ
5 ວິນາທີ​ໃດ​ມີ​ເດັກນ້ອຍ​ເສຍ​ຊີວິດ 1 ຄົນ​ໃນ​ປີ 2017

    ບົດ​ລາຍ​ງານ​ຂອງ​ກອງ​ທຶນ​ສຳລັບ​ເດັກນ້ອຍ ຂອງ​ສະຫະ​ປະຊາ​ຊາດ (UNICEF) ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 18 ກັນຍາ ລະບຸ​ວ່າ ມີ​ເດັກນ້ອຍ​ເສຍ​ຊີວິດ 6 ລ້ານ​ກວ່າ​ຄົນ ໃນ​ທົ່ວ​ໂລກ ໃນ​ປີ 2017 ຍ້ອນ​ສາເຫດ​ຕ່າງໆ​ທີ່​ສາມາດ​ປ້ອງ​ກັນ​ໄດ້. ນັ້ນ​ເປັນ​ຕົວ​ເລກ​ທີ່​ຫຼຸດ​ລົງ​ປະມານ 50% ເມື່ອ​ທຽບໃສ່​ຕົວ​ເລກ​ທີ່​ອອກ​ມາ​ໃນ​ປີ 2000 ຊຶ່ງ​ເປັນ​ເວລາ​ທີ່​ປະເທດ​ຕ່າງໆ​ເລີ່ມ​ຕົ້ນ ນຳ​ໃຊ້​ບັນດາ​ເປົ້າ​ໝາຍ​ການ​ພັດທະນາ ແຫ່ງ​ສະຫັດ​ສະ​ວັດ (MDG) ຂອງ​ສະຫະ​ປະຊາ​ຊາດ ໃນ​ການ​ມຸ່ງ​ໄປ​ສູ່​ການ​ລຶບລ້າງ​ຄວາມທຸກ​ຍາກ.

    ສະຖິຕິ​ຂອງ UNICEF ໃຫ້​ຮູ້​ວ່າ ມີ​ເດັກນ້ອຍ​ເສຍ​ຊີວິດ 6,3 ລ້ານ​ຄົນ​ໃນ​ປີ 2017 ຍ້ອນ​ພະຍາດ​ຕ່າງໆ​ທີ່​ສາມາດ​ປ້ອງ​ກັນ​ໄດ້ ຊຶ່ງ​ເທົ່າ​ກັບ​ວ່າ​ໃນ​ແຕ່​ລະ 5 ວິນາທີ​ໃດ ແມ່ນ​ມີ​ເດັກນ້ອຍ​ເສຍ​ຊີວິດ  1 ຄົນ. ຕົວ​ເລກ​ດັ່ງກ່າວ​ຫຼຸດ​ລົງ​ຫຼາຍ​ເມື່ອ​ທຽບໃສ່​ປີ  2000 ຊຶ່ງ​ເວລາ​ນັ້ນ ມີ​ເດັກນ້ອຍ​ທີ່​ມີ​ອາຍຸ​ຕ່ຳ​ກວ່າ 5 ປີ ເສຍ​ຊີວິດ 11,2 ລ້ານ​ຄົນ ຍ້ອຍ​ພະຍາດ​ຕ່າງໆ ທີ່​ສາມາດ​ປ້ອງ​ກັນ​ໄດ້ ພ້ອມ​ທັງ​ຍ້ອນ​ຂາດແຄນ​ນ້ຳ​ສະອາດ ແລະ​ຂາດ​ໂພ​ສະ​ນາ​ການ. ສ່ວນ​ຫຼວງຫຼາຍ​ຂອງ​ເດັກນ້ອຍ​ທີ່​ເສຍ​ຊີວິດ​ໃນ​ປີ 2017 ນັ້ນ​ມີ​ປະມານ 5,4 ລ້ານ​ຄົນ ຢູ່​ໃນ​ໄວ​ຕ່ຳ​ກວ່າ 5 ປີ. ນອກຈາກ​ນັ້ນແລ້ວ ເດັກນ້ອຍ​ທີ່​ເກີດ​ຂຶ້ນ​ມາ​ຢູ່​ໃນ​ເຂດ​ຕອນ​ໃຕ້​ຂອງ​ທະເລຊາຍ​ຊາ​ຮາ​ຣາ ທະວີບ​ອາ​ຟະ​ຣິກ​ກາ ແລະ​ອາຊີ​ໃຕ້ ມີ​ຄວາມ​ສ່ຽງ​ເສຍ​ຊີວິດ​ຫຼາຍ​ທົບ 9 ເທື່ອ ເມື່ອ​ທຽບໃສ່​ເດັກນ້ອຍ ຢູ່​ໃນ​ບັນດາ​ປະເທດ​ພັດທະນາ.

    ເມື່ອ​ປີ 2015 ສະຫະ​ປະຊາ​ຊາດ​ໄດ້​ແທນ​ທີ່​ບັນດາ MDG ດ້ວຍ 17 ຄາດໝາຍ ການ​ພັດທະນາ​ແບບ​ຍືນ​ຍົງ ໂດຍ​ກຳນົດ​ເອົາ​ປີ 2030 ເພື່ອ​ໃຫ້​ປະເທດ​ຕ່າງໆ ເຮັດ​ສຳເລັດ​ການ ລຶບລ້າງ​ຄວາມທຸກ​ຍາກ ຄວາມ​ບໍ່​ສະເໝີພາບ ແລະ ວິ​ກິດ​ການ​ທົ່ວ​ໂລກ​ອື່ນໆ ລວມ​ເຖິງ​ການ​ຊຸກຍູ້ ຂໍ້​ລິ​ເລີ່ມ​ຕ່າງໆ ເຊັ່ນ​ວ່າ​ພະລັງງານ​ແບບ​ຍືນ​ຍົງ​ດັ່ງນີ້​ເປັນຕົ້ນ.

ຂ່າວທີ່ກ່ຽວຂ້ອງ