ຂ່າວຫຼ້າສຸດ

ຜູ້ນຳ​ຂອງ ​ສປປ ເກົາຫຼີ ແລະ ສ ເກົາຫຼີ ຮ່ວມ​ກັນ​ລົງ​ນາມ​ຂໍ້​ຕົກລົງ

171 20 ກ.ຍ. 2018 ຂ່າວຕ່າງປະເທດ
ຜູ້ນຳ​ຂອງ ​ສປປ ເກົາຫຼີ ແລະ ສ ເກົາຫຼີ ຮ່ວມ​ກັນ​ລົງ​ນາມ​ຂໍ້​ຕົກລົງ

    ຕາມ​ຂ່າວ​ຕ່າງປະເທດ ວັນ​ທີ 19 ກັນຍາ​ນີ້ ທ່ານ ກິມ​ເຈິງ​ອູນ ຜູ້ນຳ​ຂອງ ​ສປປ ເກົາຫຼີ ແລະ​ທ່ານ ມູນ​ເຈ​ອິນ ປະທານາທິບໍດີ​ຂອງ ສ ເກົາຫຼີ ໄດ້​ຮ່ວມ​ກັນ​ລົງ​ນາມ​ໃນ​ຂໍ້​ຕົກລົງ ທີ່​ອອກ​ເປັນ​ເອກະສານ​ທີ່​ໃສ່​ຊື່ວ່າ  “ຖະແຫຼງການ​ຮ່ວມ​ພຽງ​ຢາງ ເດືອນ​ກັນຍາ”. ເອກະສານ​ດັ່ງກ່າວ ໄດ້​ຮັບ​ການ​ລົງ​ນາມ​ຢູ່​ທີ່​ນະຄອນຫຼວງ​ພຽງ​ຢາງ ຂອງ ​ສປປ ເກົາຫຼີ ຫຼັງ​ຈາກ​ຈາກ​ທີ່​ໄດ້​ສິ້ນ​ສຸດ ການ​ພົບ​ປະ​ສຸດ​ຍອດ​ເປັນ​ຄັ້ງ​ທີ​ສາມ ລະຫວ່າງ​ຜູ້ນຳ​ທັງ​ສອງ ພາຍ​ໃນ​ປີ​ນີ້.

    ຫຼັງ​ຈາກ​ນັ້ນ ທ່ານ ກິມ​ເຈິງ​ອູນ ແລະ ທ່ານ ມູນ​ເຈ​ອິນ ກໍ​ໄດ້​ເຂົ້າ​ຮ່ວມ​ການ​ປະຊຸມ​ຖະແຫຼງ​ຂ່າວ ໂດຍ​ທ່ານ ກິມ​ເຈິງ​ອູນ ຖະແຫຼງ​ວ່າ ຖະແຫຼງການ​ຮ່ວມ​ຈະ​ເປັນ​ການ​ຊຸກຍູ້​ການ​ພົວພັນ​ແບບ​ສອງ​ຝ່າຍ ໃຫ້​ຫຼາຍ​ຂຶ້ນ ແລະ ​ທ່ານ​ກໍ​ໄດ້​ຢືນຢັນ​ວ່າ ຖະແຫຼງການ​ຮ່ວມ​ຈະ​ເຮັດ​ໃຫ້​ແຫຼມ​ເກົາຫຼີ ໄປ​ໃກ້​ສັນຕິພາບ ຫຼາຍ​ຂຶ້ນ.

   ທາງ​ດ້ານ​ປະທານາທິບໍດີ ມູນ​ເຈ​ອິນ ເວົ້າ​ວ່າ​ສອງ​ຝ່າຍ​ໄດ້​ເຫັນ​ດີ​ສະກັດ​ກັ້ນ​ທຸກໆ​ຄວາມ​ສ່ຽງ ອັນຕະລາຍ ທີ່​ອາດ​ເຮັດ​ໃຫ້​ເກີດ​ສົງຄາມ​ຢູ່​ເທິງ​ແຫຼມ​ເກົາຫຼີ.

 

ຂ່າວທີ່ກ່ຽວຂ້ອງ