ສາວໂກນບານລາວ ຍາດໄດ້ອັນດັບ 3 ອາຊີ-ປາຊີຟິກ

331 20 ກ.ຍ. 2018 ວົງຈອນກີລາ
ສາວໂກນບານລາວ ຍາດໄດ້ອັນດັບ 3 ອາຊີ-ປາຊີຟິກ

    ທັບ​ນັກ­ກີ­ລາ​ຄົນ​ພິ­ການ​ໂກນ​ບານ​ຍິງ​ທີມ​ຊາດ​ລາວ ສາ­ມາດ​ຍາດ​ໄດ້​ອັນ​ດັບ 3 ມາ​ຄອງ ພາຍ­ຫຼັງ​ຮອງ​ຊີງ​ອັນ​ດັບ​ທີ 3 ສາ­ມາດ​ເອົາ​ຊະ­ນະ​ສາວ​ໂກນ​ບານ​ຍິງ​ທີມ​ຊາດ​ສິງ­ກະ­ໂປ ມາ​ໄດ້ 11-1 ປະ­ຕູ ໃນ​ການ​ແຂ່ງ­ຂັນ​ໂກນ​ບານ​ລາຍ­ການ​ອາ­ຊີ-ປາ​ຊິ​ຟິກ 2018 (2018 ASIA & PACIFIC INVITATIONAL GOALBALL TOURNAMENT) ທີ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ເປັນ​ເຈົ້າ­ພາບ ໃນ​ວັນ​ທີ 11-14 ກັນ­ຍາ 2018 ຂະ­ນະ​ທີ່​ແຊັມ​ຕົກ​ເປັນ​ຂອງ​ທີມ​ຊາດ​ໄທ ເອົາ​ຊະ­ນະ​ທີມ​ຊາດ ສ ເກົາ­ຫຼີ ໄປ 8-1 ປະ­ຕູ ສ່ວນ​ປະ­ເພດ​ທີມ​ຊາຍ ທີມ​ຊາດ​ລາວ​ກັບ​ບ້ານ​ມື​ເປົ່າ ຈົບ​ອັນ​ດັບ​ທ້າຍ​ຕາ­ຕະ­ລາງ.

    ສຳ­ລັບ​ຜົນ­ງານ​ຂອງ​ທີມ​ໂກນ​ບານ​ສາວ​ລາວ​ເຮົາ ໃນ​ຮອບ​ທຳ​ອິດ ສາ­ມາດ​ເອົາ​ຊະ­ນະ 2 ນັດ ແລະ ເສຍ 2 ນັດ ມີ 6 ຄະ­ແນນ ປະ­ກອບ​ມີ​ຊະ­ນະ​ທີມ​ຊາດ​ສິງ­ກະ­ໂປ 4-1 ປະ­ຕູ ຊະ­ນະ​ທີມ​ຊາດ​ອິນ​ເດຍ 10-0 ປະ­ຕູ ແລະ ເສຍ​ໃຫ້​ທີມ​ຊາດ ສ ເກົາ­ຫຼີ 1-4 ປະ­ຕູ ແລະ ເສຍ​ໃຫ້​ເຈົ້າ­ພາບ​ທີມ​ຊາດ​ໄທ 1-7 ປະ­ຕູ.

ຂ່າວທີ່ກ່ຽວຂ້ອງ