ຂ່າວຫຼ້າສຸດ

ສິນຫ້າ

773 14 ກ.ຍ. 2018 ນານາສາລະ

    ບາງ​ຄົນ​ອາດ​ຄິດ​ວ່າ​ເລື້ອງ​ສິນ​ຫ້າ​ເປັນ​ເລື້ອງ​ຕື້ນໆ ແລະ ເປັນ​ບັນ­ຫາ​ຫຍ້າ​ປາກ​ຄອກ ເພາະ​ເວ­ລາ​ເຮັດ­ບຸນ ສ່ວນ​ໃຫຍ່​ກໍ່​ຈະ​ໄດ້​ຮັບ​ສິນ​ຫ້າ​ຈາກ​ຄູ­ບາ​ອາ­ຈານ ເຊິ່ງ​ຄວາມ​ຈິງ​ກໍ່​ແມ່ນ​ແນວ​ນັ້ນ​ແທ້ ແຕ່​ເລື້ອງ​ສິນ​ຫ້າ​ປະ­ການ ຖ້າ​ບໍ່​ເຂົ້າ­ໃຈ​ແຈ້ງ​ບໍ່​ເຂົ້າ­ໃຈ​ເລິກ​ກໍ່​ຈະ​ເຮັດ​ໃຫ້​ຄົນ​ເຮົາ​ຖື​ເບົາ ເບິ່ງ​ບັນ­ຫາ​ແບບ​ຜີວ​ເຜີນ ເມື່ອ​ບໍ່​ຮູ້​ຄວາມ​ສຳ­ຄັນ​ຈຶ່ງ​ຖື​ການ​ຮັບ​ສິນ​ຫ້າ ເວ­ລາ​ເຮັດ­ບຸນ​ມັນ​ເປັນ​ພຽງ​ພິ­ທີ­ກຳ ໂດຍ​ບໍ່​ເຂົ້າ­ໃຈ​ເລິກ​ວ່າ​ສິນ​ຫ້າ​ປະ­ການ​ເປັນ​ທັງ​ລະ­ບຽບ ແລະ ກົດ­ໝາຍ​ທີ່​ສາ­ມາດ​ຊ່ວຍ​ປົກ​ປ້ອງ​ຄຸ້ມ​ຄອງ​ຊີ­ວິດ ແລະ ຊັບ​ສິນ​ຄົນ​ທັງ​ໂລກ​ໄດ້.

    ຜູ້​ຂຽນ​ເວົ້າ​ວ່າ ສິນ​ຫ້າ​ສາ­ມາດ​ຊ່ວຍ​ປົກ​ປ້ອງ​ຄຸ້ມ​ຄອງ​ຊີ­ວິດ ແລະ ຊັບ​ສິນ​ຄົນ​ທັງ​ໂລກ​ໄດ້​ກໍ່​ຍ້ອນ​ວ່າ ສິນ​ຫ້າ​ປະ­ການ ແມ່ນ​ສັດ­ຈະ­ທຳ​ສາ­ກົນ ທີ່​ຄົນ​ທັງ​ໂລກ​ຕ່າງ​ກໍ່​ປາດ​ຖະ​ໜາ ຄຳ​ຕອບ​ທີ່​ຮູ້​ຢູ່​ແກ່​ໃຈ​ກໍ່​ແມ່ນ ຄົນ​ໝົດ​ໂລກ​ນີ້ ລ້ວນ​ແຕ່​ຮັກ​ຄວາມ­ສຸກ ຊັງ​ຄວາມ­ທຸກ ດັ່ງ­ນັ້ນ ການ​ຮັກ­ສາ​ຄວາມ­ສຸກ ຫຼື ສ້າງ​ຄວາມ­ສຸກ ປາດ​ຖະ​ໜາ​ຄວາມ­ສຸກ ຫຼີກ­ເວັ້ນ​ຈາກ​ການ​ສ້າງ​ບັນ­ຫາ ຄື​ຄວາມ­ທຸກ​ນີ້​ແຫຼະ ສິນ​ຫ້າ​ຄື​ສັດ­ຈະ­ທຳ​ຂອງ​ໂລກ​ຈຶ່ງ​ສຳ­ຄັນ ພະ­ພຸດ­ທະ­ເຈົ້າ​ກໍ່​ໄດ້​ບອກ​ແຈ້ງ​ແລ້ວ​ວ່າ ສັດ­ຈະ­ທຳ​ຂອງ​ໂລກ​ພະ­ພຸດ­ທະ­ເຈົ້າ ເປັນ​ພຽງ​ຜູ້​ຄົ້ນ​ພົບ​ແລ້ວ​ນຳ​ມາ​ສອນ ເຊິ່ງ​ສັດ­ຈະ­ທຳ​ດັ່ງ­ກ່າວ ມັນ​ມີ​ຄູ່​ກັບ​ໂລກ​ຢູ່​ແລ້ວ ເວ­ລາ​ຊາວ­ບ້ານ​ຂໍ​ສິນ​ຫ້າ ຖ້າ​ຈະ​ເວົ້າ​ໃຫ້​ຖືກ​ແທ້ ພະ (ຄູ­ບາ) ບໍ່​ໄດ້​ໃຫ້​ສິນ ແຕ່​ເພີ່ນ​ເປັນ​ພຽງ​ຜູ້​ບອກ​ຂໍ້​ປະ­ຕິ­ບັດ 5 ປະ­ການ ເຊິ່ງ​ພາ­ສາ​ພະ​ແທ້​ເອີ້ນ​ວ່າ ສິກ­ຂາ­ບົດ 5 ປະ­ການ​ຄື: ຂໍ້​ທີ່​ຄວນ​ສຶກ​ສາ​ປະ­ຕິ­ບັດ ດັ່ງ­ນັ້ນ ສິນ​ຂໍ້​ທີ 1 ຈິ່ງ​ບອກ​ວ່າ ປາ​ນາ​ຕິ​ປາ​ຕາ ເວ​ຣະ​ມະ­ນີ ສິກ­ຂາ​ປະ​ທັງ ສະ­ມາ­ທິ​ຍາ​ມິ: 1. ຂ້າ­ພະ­ເຈົ້າ​ຂໍ​ຮັບ​ຖື​ປະ­ຕິ­ບັດ ຂໍ້​ສຶກ​ສາ​ໃນ​ການ​ງົດ​ເວັ້ນ​ຈາກ​ການ​ຂ້າ​ສັດ 2. ຂ້າ­ພະ­ເຈົ້າ​ຂໍ​ຮັບ​ຖື​ປະ­ຕິ­ບັດ​ຂໍ້​ສຶກ​ສາ​ໃນ​ການ​ງົດ​ເວັ້ນ​ຈາກ​ການ​ລັກ ໂກງ ລະ­ເມີດ​ທຳ­ລາຍ​ຊັບ​ສິນ 3. ເວັ້ນ​ຈາກ​ການ​ປະ­ພຶດ​ຜິດ​ໃນ​ກາມ ລ່ວງ​ລະ­ເມີດ​ສິ່ງ​ທີ່​ຄົນ​ອື່ນ​ຮັກ​ຫວງ​ແຫນ 4. ເວັ້ນ​ຈາກ​ການ​ເວົ້າ​ຂີ້​ຕົວະ​ຫຼອກ​ລວງ 5. ເວັ້ນ​ຈາກ​ນ້ຳ​ເມົາ​ຄື ສຸ­ລາ​ເມ​ໄລ ເວັ້ນ​ຈາກ​ສິ່ງ​ເສບ​ຕິດ...

    ສິກ­ຂາ­ບົດ 5 ຂໍ້ ຫຼື ສິນ​ຫ້າ​ຂໍ້​ນີ້ ຈຶ່ງ​ບໍ່​ຄວນ​ຖື​ເບົາ ຫຼື ຖື​ວ່າ​ເປັນ​ຂອງ​ງ່າຍ ເຊິ່ງ​ຖ້າ​ຄົນ​ເຮົາ​ເອົາ­ໃຈ­ໃສ່​ສຶກ​ສາ​ຢ່າງ​ແທ້​ຈິງ ກໍ່​ຈະ​ເຂົ້າ­ໃຈ​ວ່າ​ມັນ​ແມ່ນ​ຂໍ້​ປະ­ຕິ­ບັດ​ສັດ­ຈະ­ທຳ​ຂອງ​ສາ­ກົນ ຄົນ​ທັງ​ໂລກ​ກໍ່​ຮູ້­ສຶກ​ແບບ​ດຽວ​ກັນ​ຄື: ບໍ່​ມັກ​ໃຜ​ມາ​ຂ້າ ບໍ່​ມັກ​ໃຜ​ມາ​ລັກ​ຕົວະ​ຕົ້ມ​ຫຼອກ​ລວງ​ເອົາ​ຊັບ​ສິນ​ດ້ວຍ​ວິ­ທີ​ການ​ຕ່າງໆ ທັງ​ທຸ­ລະ​ກິດ ແລະ ສັນ­ຍາ​ຫຼອກ​ລວງ ບໍ່​ມັກ​ໃຜ​ມາ​ລວງ​ລະ­ເມີດ​ຊັບ​ສິນ​ຂອງ​ຕົນ ບໍ່​ມັກ​ໃຫ້​ຄົນ​ອື່ນ​ດື່ມ​ສຸ­ລາ​ເສບ​ຢາ ແລ້ວ​ມາ​ບຽດ­ບຽນ​ຂີ້­ລັກ​ຊັບ​ຂອງ​ຕົນ ດັ່ງ­ນັ້ນ ພໍ່​ແມ່​ຜູ້​ປົກ­ຄອງ​ຈຶ່ງ​ຕ້ອງ​ເອົາ­ໃຈ­ໃສ່ ສັ່ງ­ສອນ​ລູກ​ຫຼານ​ຂອງ​ຕົນ ຖ້າ​ຕິດ​ຢາ​ກໍ່​ໄປ​ລັກ​ຊັບ ຫຼື ເວົ້າ​ຕົວະ​ຫຼອກ​ລວງ​ພໍ່​ແມ່​ຕົນ​ເອງ ບາງ​ກໍ­ລະ­ນີ​ຮ້າຍ​ແຮງ​ເຖິງ​ຂັ້ນ​ຂ້າ​ເອົາ​ຊັບ​ເປັນ​ການ​ທຳ­ຮ້າຍ​ຊີ­ວິດ ແລະ ເປັນ​ການ​ບຽດ­ບຽນ... ສິນ​ຫ້າ​ປະ­ການ ຈຶ່ງ​ເປັນ​ສັດ­ຈະ­ທຳ​ຂອງ​ສາ­ກົນ ບໍ່​ຄວນ​ຄິດ​ວ່າ​ມັນ​ແມ່ນ​ຫຍ້າ​ປາກ​ຄອກ ຈະ​ກິນ​ມື້​ໃດ​ກໍ່​ໄດ້.

ດັ້ນກີບເມກ

ຂ່າວທີ່ກ່ຽວຂ້ອງ