ຂ່າວຫຼ້າສຸດ

ບໍ່ແກ້ວ ໄດ້ຮັບຄວາມເສຍຫາຍຈາກໄພພິບັດຫຼາຍກວ່າ 69 ຕື້ກີບ

253 14 ກ.ຍ. 2018 ຂ່າວໜ້າ​ໜຶ່ງ
ບໍ່ແກ້ວ ໄດ້ຮັບຄວາມເສຍຫາຍຈາກໄພພິບັດຫຼາຍກວ່າ 69 ຕື້ກີບ

    ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ເຄື່ອນ​ໄຫວ​ກວດ­ກາ​ຜົນ​ເສຍ​ຫາຍ​ຈາກ​ໄພ­ພິ­ບັດ​ທາງ​ທຳ​ມະ​ຊາດ​ຢູ່​ທີ່​ແຂວງ​ບໍ່​ແກ້ວ ວັນ​ທີ 12-13 ກັນ­ຍາ 2018 ໂດຍ​ການ​ຕ້ອນ­ຮັບ​ຂອງ​ທ່ານ ບົວ​ຄົງ ນາມ​ມະ​ວົງ ເຈົ້າ­ແຂວງ​ບໍ່​ແກ້ວ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ບົວ​ຄົງ ນາມ​ມະ​ວົງ ໄດ້​ລາຍ​ງານ​ວ່າ: ໃນ​ໄລ­ຍະ​ຜ່ານ​ມາ​ມີ​ໄຟ​ໄໝ້​ເຮືອນ​ປະ­ຊາ­ຊົນ 7 ຫຼັງ ໃນ 7 ບ້ານ 5 ເມືອງ ມີ​ຜູ້​ຖືກ​ຜົນ​ກະ­ທົບ 47 ຄົນ ມູນ​ຄ່າ​ເສຍ​ຫາຍ 844 ລ້ານ​ກີບ ພາ­ຍຸ​ໝາກ­ເຫັບ​ຕົກ​ໃສ່​ເຮືອນ​ເສຍ​ຫາຍ 1 ຫຼັງ ລົມ­ພາ­ຍຸ​ພັດ​ແຮງ​ກະ­ທົບ​ໃສ່​ເຮືອນ​ເສຍ​ຫາຍ 8 ຫຼັງ ມູນ​ຄ່າ​ເສຍ​ຫາຍ 56 ລ້ານ​ກວ່າ​ກີບ ນັບ​ແຕ່​ທ້າຍ​ເດືອນ​ພຶດ­ສະ­ພາ 2018 ເປັນ­ຕົ້ນ​ມາ ມີ​ພະ­ຍຸ​ພັດ​ຜ່ານ ເກີດ​ມີ​ຝົນ­ຕົກ​ໜັກ​ຕິດ­ຕໍ່​ກັນ​ເຮັດ​ໃຫ້​ເກີດ​ມີ​ນ້ຳ​ໄຫຼ­ຊຸ ແລະ ດິນ​ເຊາະ​ເຈື່ອນ​ໃສ່​ເຮືອນ​ເປ່​ເພ 4 ຫຼັງ ເຮືອນ­ຄົວ​ເປ່​ເພ 3 ຫຼັງ ເລົ້າ​ເຂົ້າ​ເສຍ​ຫາຍ 5 ຫຼັງ ເຂົ້າ­ເປືອກ​ເສຍ​ຫາຍ 9 ໂຕນ ມູນ​ຄ່າ​ຜົນ​ເສຍ​ຫາຍ 273 ລ້ານ​ກີບ ເນື້ອ­ທີ່​ນາ­ປີ​ໄດ້​ຮັບ​ຜົນ​ກະ­ທົບ 418 ກວ່າ​ເຮັກ­ຕາ ເສຍ​ຫາຍ 287 ກວ່າ​ເຮັກ­ຕາ ໄຮ່ 48 ກວ່າ​ເຮັກ­ຕາ ສວນ​ໝາກ­ເດືອຍ 13 ກວ່າ​ເຮັກ­ຕາ ຊົນ­ລະ­ປະ­ທານ​ເປ່​ເພ 4 ແຫ່ງ ໜອງ​ປາ 22 ໜອງ ມູນ​ຄ່າ​ເສຍ​ຫາຍ 2,56 ຕື້​ກີບ ເສັ້ນ­ທາງ​ຫຼວງ​ແຫ່ງ​ຊາດ R3 ເປ່​ເພ 22 ຈຸດ ເສັ້ນ­ທາງ​ຫຼວງ​ຂອງ​ແຂວງ 5 ເສັ້ນ ທາງ​ຫຼວງ​ຂອງ​ເມືອງ 10 ເສັ້ນ ເສັ້ນ­ທາງ​ຊົນ­ນະ­ບົດ 11 ເສັ້ນ ເສັ້ນ­ທາງ​ເທ­ສະ​ບານ 7 ເສັ້ນ ມູນ​ຄ່າ​ເສຍ​ຫາຍ 63 ຕື້​ກວ່າ​ກີບ ລະ­ບົບ​ຕາ​ຂ່າຍ​ໄຟ­ຟ້າ 22 ກິ​ໂລ​ໂວນ ເສົາ​ໄຟ­ຟ້າ​ຫັກ ໝໍ້​ແປງ​ໄຟ­ຟ້າ​ເສຍ​ຫາຍ 450 ລ້ານ​ກວ່າ​ກີບ ລະ­ບົບ​ນ້ຳ​ລິນ ເມືອງ​ຫ້ວຍ​ຊາຍ ເມືອງ​ຕົ້ນ​ເຜີ້ງ ແລະ ເມືອງ​ຜາ​ອຸ­ດົມ ເສຍ​ຫາຍ​ມູນ​ຄ່າ 970 ລ້ານ​ກີບ.

    ຜ່ານ​ການ​ລົງ​ເກັບ​ກຳ​ຂໍ້​ມູນ​ຕົວ​ຈິງ ແລະ ປະ​ເມີນ​ຄວາມ​ເສຍ​ຫາຍ​ຈາກ​ໄພ­ພິ­ບັດ​ທີ່​ເກີດ​ຂຶ້ນ​ທົ່ວ​ແຂວງ​ບໍ່​ແກ້ວ ເສຍ​ຫາຍ 69 ຕື້​ກວ່າ​ກີບ ສຳ­ລັບ​ການ​ຊ່ວຍ­ເຫຼືອ​ແກ້​ໄຂ​ເບື້ອງ​ຕົ້ນ​ອຳ­ນາດ​ການ​ປົກ­ຄອງ​ແຂວງ​ບໍ່​ແກ້ວ ໄດ້​ສຸມ​ທຸກ​ກຳ­ລັງ​ເຂົ້າ​ໄປ​ຊ່ວຍ­ເຫຼືອ ແລະ ໄດ້​ມີ​ການ​ລະ­ດົມ​ເຄື່ອງ​ຊ່ວຍ­ເຫຼືອ​ຈາກ​ພາກ­ສ່ວນ​ຕ່າງໆ ໃນ​ນີ້​ມີ​ເງິນ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ ລວມ​ມູນ​ຄ່າ 3 ຕື້​ກວ່າ​ກີບ ແລະ ໄດ້​ນຳ­ໄປ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ ເປັນ­ຕົ້ນ ເງິນ ເຂົ້າ​ກິນ ນ້ຳ​ກິນ-ນ້ຳ​ໃຊ້ ແລະ ເຄື່ອງ­ໃຊ້​ຈຳ­ເປັນ​ຈຳ­ນວນ​ໜຶ່ງ ສຳ­ລັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໄລ­ຍະ 9 ເດືອນ​ຜ່ານ​ມາ ເສດ­ຖະ­ກິດ​ຂອງ​ແຂວງ​ບໍ່​ແກ້ວ ຂະ­ຫຍາຍ­ຕົວ​ໃນ​ລະ­ດັບ 7,5% ລວມ​ຍອດ​ຜະ­ລິດ​ຕະ​ພັນ​ພາຍ​ໃນ​ບັນ­ລຸ 2.663 ຕື້​ກີບ ທຽບ­ໃສ່​ແຜນ­ການ​ປີ​ປະ­ຕິ­ບັດ​ໄດ້ 89,23% ລາຍ​ໄດ້​ສະ­ເລ່ຍ 1.673 ໂດ​ລາ​ສະ­ຫະ­ລັດ​ຕໍ່​ຄົນ​ຕໍ່​ປີ ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ­ຜ່ານ­ມາ​ເພີ່ມ​ຂຶ້ນ 1,24% ຈັດ​ເກັບ​ລາຍ​ຮັບ​ໄດ້ 218.970,95 ລ້ານ​ກີບ ເທົ່າ​ກັບ 66,91%.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ຍັງ​ໄດ້​ມອບ​ເງິນ ຈຳ­ນວນ 50 ລ້ານ​ກີບ ໃຫ້​ອຳ­ນາດ​ການ​ປົກ­ຄອງ​ແຂວງ​ບໍ່​ແກ້ວ ແລະ ມອບ​ເງິນ 10 ລ້ານ​ກີບ ໃຫ້​ອຳ­ນາດ​ການ​ປົກ­ຄອງ​ບ້ານ​ດອນ​ໃຈ ເມືອງ​ຫ້ວຍ​ຊາຍ ເພື່ອ​ນ້ຳ​ໃຊ້​ເຂົ້າ​ໃນ​ການ​ຊ່ວຍ­ເຫຼືອ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ຜູ້​ໄດ້​ຮັບ​ຜົນ​ກະ­ທົບ​ຕື່ມ​ອີກ.

ຂ່າວທີ່ກ່ຽວຂ້ອງ