ຂ່າວຫຼ້າສຸດ

ສ ອາ​ເມ​ຣິ​ກາ ແລະ​ເມັກ​ຊິກ ບັນລຸ​ຂໍ້​ຕົກລົງ​ກ່ຽວ​ກັບ NAFTA

177 14 ກ.ຍ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ແລະ​ເມັກ​ຊິກ ບັນລຸ​ຂໍ້​ຕົກລົງ​ກ່ຽວ​ກັບ NAFTA

     ປະ​ທາ​ນາ​ທິ​ບໍ​ດີ​​ສ ອາ​ເມ​ຣິ​ກາ ໂດ​ນາ​​ລ ທຣຳ ຖະແຫຼງ​ຢູ່​ທີ່​ລັດ​ມອນ​ຕານາ (ສ ອາ​ເມ​ຣິ​ກາ) ເມື່ອ​ວັນ​ທີ 7 ກັນຍາ​ທີ່​ຜ່ານ​ມາ​ວ່າ ສັນຍາ​ການ​ຄ້າ​ເສລີ​ອາ​ເມ​ຣິ​ກາ​ເໜືອ (NAFTA) ໄດ້​ຖືກ​ແທນ​ທີ່​ໂດຍ​ສັນຍາ​ການ​ຄ້າ ສ ອາ​ເມ​ຣິ​ກາ - ເມັກ​ຊິກ ແຕ່​ທ່ານ​ກໍ​ໃຫ້​ຮູ້​ວ່າ ສ ອາ​ເມ​ຣິ​ກາ ພວມ​ສັນ​ຫາ​ຂໍ້​ຕົກລົງ​ສະບັບ​ໜຶ່ງ​ທີ່​ມີ​ຄວາມ​ຍຸຕິ​ທຳ​ກັບ​ກາ​ນາ​ດາ.

    ທ່ານ ທຣຳ ເວົ້າ​ວ່າ​ອຳນາດ​ການ​ປົກຄອງ​ຂອງ​ເຂົາ ຕ້ອງການ​ນຳ​ມາ​ຊຶ່ງ​ສະພາບ​ແວດ​ລ້ອມ​ທີ່​ມີ​ຄວາມ​ສະເໝີພາບ ໃຫ້​ແກ່​ຜູ້​ອອກແຮງ​ງານ ແລະ​ວິ​ສາ​ຫະ​ກິດ​ຂອງ ສ ອາ​ເມ​ຣິ​ກາ; ແລະ​ວ່າ​ອາດ​ຈະ​ກ້າວ​ໄປ​ສູ່​ຂໍ້​ຕົກລົງ NAFTA ສະບັບ​ໜຶ່ງ​ໂດຍ​ປາສະຈາກ​ກາ​ນາ​ດາ ເຖິງ​ວ່າ​ທ່ານ​ກໍ​ຍັງ​ຕ້ອງການ​ໄຊຊະນະ​ດ້ານ​ການ​ຄ້າ ກ່ອນ​ດຳເນີນ​ການ​ເລືອກ​ຕັ້ງ​ໃນຕໍ່ໜ້າ​ນີ້​ກໍ​ຕາມ.

    ລັດຖະມົນຕີ​ການ​ຕ່າງປະເທດ​ກາ​ນາ​ດາ ຄຣິ​​ສ​ເຕຍ ຟຣີ​ແລນ ກ່າວ​ຕໍ່​ສື່​ມວນ​ຊົນ ໃນ​ວັນ​ດຽວ​ກັນ​ວ່າ ການ​ເຈລະຈາ​ການ​ຄ້າ ລະຫວ່າງ ສ ອາ​ເມ​ຣິ​ກາ ກັບ​ກາ​ນາ​ດາ ພວມ​ມີ​ຂຶ້ນ​ຢ່າງ​ບໍ່​ຢຸດ​ຢັ້ງ ແລະ ບັນລຸ​ຄວາມ​ຄືບ​ໜ້າທີ່​ດີ. ນາງ ຄຣິ​​ສ​ເຕຍ ຟຣີ​ແລນ  ຊີ້​ແຈງ​ວ່າ NAFTA ເປັນ​ຂໍ້​ຕົກລົງ​ໃຫຍ່ ແລະ ສັບສົນ ດັ່ງນັ້ນ ເຈົ້າ​ໜ້າທີ່​ຂອງ​ສອງ​ປະເທດ ຈຶ່ງ​ພວມ​ພະຍາຍາມ​ແກ້​ໄຂ​ໃນ​ຫຼາຍ​ບັນຫາ.

    ເມື່ອ​ວັນ​ທີ 5 ກັນຍາ​ທີ່​ຜ່ານ​ມາ ກາ​ນາ​ດາ ແລະ ສ ອາ​ເມ​ຣິ​ກາ ໄດ້​ກັບ​ຄືນ​ສູ່​ໂຕະ​ເຈລະຈາ  NAFTA ຫຼັງ​ຈາກ​ທີ່​ໄດ້​ຂາດ​ໄລຍະ​ໄປ 4 ວັນ ຊຶ່ງ​ກ່ອນ​ໜ້າ​ນັ້ນ ເມື່ອ​ວັນ​ທີ 31 ສິງຫາ​ທີ່​ຜ່ານ​ມາ ການ​ເຈລະຈາ​ການ​ຄ້າ​ລະຫວ່າງ ສ ອາ​ເມ​ຣິ​ກາ ກັບ​ກາ​ນາ​ດາ  ເພື່ອ​ການ​ດັດແກ້ NAFTA ໄດ້​ສິ້ນ​ສຸດ​ລົງ ໂດຍ​ທີ່​ບໍ່​ບັນລຸ​ຂໍ້​ຕົກລົງ​ໃດໆ.

    ໃນ​ຂະນະ​ດຽວ​ກັນ ເມື່ອ​ວັນ​ທີ 27 ສິງຫາ​ທີ່​ຜ່ານ​ມາ ສ ອາ​ເມ​ຣິ​ກາ ແລະ ເມັກ​ຊິກ ໄດ້​ບັນລຸ​ຂໍ້​ຕົກລົງ​ທີ່​ເປັນ​ການ​ບຸກ​ທະລຸ ກ່ຽວ​ກັບ NAFTA ແລະ ໄດ້​ປ່ຽນ​ມາ​ເປັນ​ສັນຍາ​ການ​ຄ້າ ສ ອາ​ເມ​ຣິ​ກາ - ເມັກ​ຊິກ ເຮັດ​ໃຫ້​ກາ​ນາ​ດາ ຖືກ​ຍູ້​ເຂົ້າ​ສູ່​ທ່າ​ໂດດດ່ຽວ.

    ຖ້າ​ຫາ​ກວ່າ ທັງ ກາ​ນາ​ດາ ສ ອາ​ເມ​ຣິ​ກາ ແລະ ເມັກ​ຊິກ ຍັງ​ຄົງ​ຢາກ​ລົງ​ນາມ NAFTA ກ່ອນ​ເວລາ​ຖ່າຍ​ໂອນ​ອຳນາດ​ຂອງ​ລັດຖະບານ​ໃໝ່​ຢູ່​ໃນ​ເມັກ​ຊິກ ໃນ​ວັນ​ທີ 1 ທັນວາ​ໜ້າ​ນີ້​ແລ້ວ​ກໍ​ແມ່ນ​ຝ່າຍ​ຕ່າງໆ ຕ້ອງ​ໄດ້​ເຮັດ​ສຳເລັດ​ເອກະສານ​ການ​ເຈລະຈາ​ກ່ອນ​ກຳນົດ​ເວລາ​ເສັ້ນ​ຕາຍ ຄື​ວັນ​ທີ 30 ກັນຍາ.

 

ຂ່າວທີ່ກ່ຽວຂ້ອງ