IFC ຈະໃຫ້ຄຳປຶກສາດ້ານວິຊາການ ຂອງໂຄງສ້າງນະໂຍບາຍການລົງທຶນ

94 14 ກ.ຍ. 2018 ຂ່າວໜ້າ​ໜຶ່ງ

    ອົງ­ການ​ການ​ເງິນ​ສາ­ກົນ (IFC) ເປັນ​ສະ­ມາ­ຊິກ​ຂອງ​ກຸ່ມ​ທະ­ນາ­ຄານ​ໂລກ ໄດ້​ເສີມ​ຂະ­ຫຍາຍ​ການ​ສະ­ໜັບ­ສະ­ໜູນ​ລັດ­ຖະ­ບານ​ລາວ ໃນ​ການ​ປັບ­ປຸງ​ສະ­ພາບ​ແວດ​ລ້ອມ​ການ​ລົງ­ທຶນ ແລະ ການ​ດຳ­ເນີນ​ທຸ­ລະ​ກິດ​ຢູ່​ພາຍ​ໃນ​ປະ­ເທດ ສະ­ພາບ​ແວດ​ລ້ອມ​ໃນ​ການ​ດຳ­ເນີນ​ທຸ­ລະ​ກິດ​ທີ່​ສາ­ມາດ​ຄາດ​ຄະ­ເນ​ໄດ້ ແລະ ມີ​ຄວາມ​ປອດ​ໃສ ສ້າງ​ວຽກ​ເຮັດ​ງານ​ທຳ​ຫຼາຍ​ຂຶ້ນ ແລະ ສົ່ງ­ເສີມ​ໃຫ້​ມີ​ການ​ເຕີບ​ໂຕ​ຢ່າງ​ທົ່ວ​ເຖິງ ໄລ­ຍະ 10 ປີ­ຜ່ານ­ມາ ສປປ ລາວ ໄດ້​ບັນ­ລຸ​ການ​ເຕີບ​ໂຕ​ໃນ​ລະ­ດັບ​ສູງ ເຊິ່ງ​ມີ​ອັດ­ຕາ​ການ​ເຕີບ​ໂຕ ສະ­ເລ່ຍ 7% ຕໍ່​ປີ ແຕ່​ຕາມ​ອັດ­ຕາ​ສ່ວນ​ການ​ລົງ­ທຶນ​ຈາກ​ຕ່າງ­ປະ­ເທດ ຕໍ່​ລວມ​ຍອດ​ຜະ­ລິດ​ຕະ​ພັນ​ພາຍ​ໃນ​ຂອງ​ລາວ ຍັງ​ຢູ່​ໃນ​ລະ­ດັບ​ຕ່ຳ ເຫັນ​ວ່າ​ຕ່ຳ​ກວ່າ​ເຄິ່ງ​ໜຶ່ງ​ຂອງ​ອັດ­ຕາ​ສ່ວນ​ດັ່ງ­ກ່າວ ຢູ່​ໃນ​ບັນ­ດາ​ປະ­ເທດ​ໃນ​ພາກ​ພື້ນ​ດຽວ​ກັນ ການ​ລົງ­ທຶນ​ໂດຍ​ກົງ​ຈາກ​ຕ່າງ­ປະ­ເທດ ສ່ວນ​ຫຼາຍ​ແມ່ນ​ການ​ລົງ­ທຶນ​ໃນ​ຂະ­ແໜງ​ຊັບ­ພະ­ຍາ­ກອນ​ທຳ​ມະ​ຊາດ ສະ­ນັ້ນ ສະ­ພາບ​ແວດ​ລ້ອມ​ໃນ​ການ​ດຳ­ເນີນ​ທຸ­ລະ​ກິດ​ທີ່​ມີ​ຄວາມ​ສອດ­ຄ່ອງ ແລະ ປອດ​ໃສ ຈຶ່ງ​ມີ​ຄວາມ​ສຳ­ຄັນ​ຫຼາຍ​ໃນ​ການ​ສ້າງ​ເສດ­ຖະ­ກິດ​ໃຫ້​ມີ​ຫຼາຍ​ຮູບ​ແບບ ໂດຍ​ສົ່ງ­ເສີມ​ຂະ­ແໜງ​ທີ່​ເປັນ​ບ່ອນ​ອີງ­ໃສ່​ຊັບ­ພະ­ຍາ­ກອນ​ທຳ​ມະ​ຊາດ ທີ່​ນຳ​ໃຊ້​ກຳ­ລັງ​ແຮງ​ງານ​ຫຼາຍ​ນັ້ນ​ໃຫ້​ຂະ­ຫຍາຍ­ຕົວ ເພື່ອ​ດຶງ​ດູດ​ການ​ລົງ­ທຶນ​ໃຫ້​ຫຼາຍ​ຂຶ້ນ​ກວ່າ​ເກົ່າ.

    ວັນ​ທີ 7 ກັນ­ຍາ 2018 ຜ່ານ​ມາ ທີ່​ໂຮງ­ແຮມ​ລາວ​ພາ​ຊາ ໄດ້​ມີ​ພິ­ທີ​ເຊັນ​ສັນ­ຍາ​ການ​ໃຫ້​ຄຳ​ປຶກ­ສາ​ດ້ານ​ວິ­ຊາ​ການ ລະ­ຫວ່າງ​ກົມ​ສົ່ງ­ເສີມ​ການ​ລົງ­ທຶນ ກະ­ຊວງ​ແຜນ­ການ ແລະ ການ​ລົງ­ທຶນ ແລະ ກົມ​ພາ­ສີ ກະ­ຊວງ​ການ​ເງິນ ແລະ ອົງ­ການ​ການ​ເງິນ​ສາ­ກົນ ໂດຍ​ການ​ລົງ​ນາມ​ຂອງ​ທ່ານ ມະ­ໂນ​ທອງ ວົງ​ໄຊ ຫົວ­ໜ້າ​ກົມ​ສົ່ງ­ເສີມ​ການ​ລົງ­ທຶນ ກະ­ຊວງ​ແຜນ­ການ ແລະ ການ​ລົງ­ທຶນ ກັບ​ທ່ານ ບຸນ​ປະ­ເສີດ ສີ​ກຸນ­ລະ­ບຸດ ຮັກ­ສາ​ການ​ຫົວ­ໜ້າ​ກົມ​ພາ­ສີ ກະ­ຊວງ​ການ​ເງິນ ແລະ ທ່ານ​ນາງ ດາ​ເລຍ ຄາ​ລີ​ຟາ ຫົວ­ໜ້າ​ອາ­ວຸ­ໂສ​ຮັບ­ຜິດ­ຊອບ​ວຽກ​ງານ​ໃຫ້​ຄຳ​ປຶກ­ສາ​ດ້ານ​ສະ­ພາບ​ແວດ​ລ້ອມ​ການ​ລົງ­ທຶນ​ຂອງ IFC ມີ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ ພົງ​ສະ­ຫວັນ ພົມ​ກອງ ຫົວ­ໜ້າ​ຫ້ອງ­ການ IFC ປະ­ຈຳ​ລາວ ພ້ອມ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ດາ​ເລຍ ຄາ​ລີ​ຟາ ກ່າວ​ວ່າ: IFC ພ້ອມ​ຈະ​ໃຫ້­ການ​ສະ­ໜັບ­ສະ­ໜູນ​ແກ່​ລັດ­ຖະ­ບານ​ລາວ ໃນ​ການ​ບັນ­ລຸ​ບັນ­ດາ​ພັນ­ທະ​ທາງ​ດ້ານ​ການ​ປັບ­ປຸງ​ສະ­ພາບ​ແວດ​ລ້ອມ​ການ​ລົງ­ທຶນ ການ​ສ້າງ​ສະ­ພາບ​ແວດ​ລ້ອມ​ເອື້ອ​ອຳ­ນວຍ​ໃຫ້​ແກ່​ການ​ລົງ­ທຶນ ແລະ ດຳ­ເນີນ​ທຸ­ລະ​ກິດ ສປປ ລາວ ຈະ​ສາ­ມາດ​ເພີ່ມ​ຈຳ­ນວນ​ຜູ້​ປະ­ກອບ​ການ​ທຸ­ລະ​ກິດ​ໄດ້​ຫຼາຍ​ຂຶ້ນ ເຊິ່ງ​ເປັນ​ພື້ນ­ຖານ​ອັນ​ແຂງ​ແກ່ນ​ໃຫ້​ພາກ​ເອ­ກະ​ຊົນ​ຂະ­ຫຍາຍ­ຕົວ.

ຂ່າວທີ່ກ່ຽວຂ້ອງ