ຮ່ວມກັນສ້າງຄວາມວຸ້ນວາຍ ຖືກດຳເນີນຄະດີຕາມກົດໝາຍ

109 14 ກ.ຍ. 2018 ຂ່າວໜ້າ​ໜຶ່ງ

    ໄລ­ຍະ​ເດືອນ​ກໍ­ລະ­ກົດ-ເດືອນ​ສິງ­ຫາ 2018 ໄດ້​ມີ​ຄົນ​ຮ້າຍ​ຂັບ​ຂີ່​ລົດ­ຈັກ ແລະ ໃຊ້​ອາ­ວຸດ​ປືນ​ສັ້ນ ເຄື່ອນ​ໄຫວ​ກໍ່​ເຫດ​ປຸ້ນ​ຈີ້-ຊີງ​ເອົາ​ລົດ­ຈັກ ແລະ ໂທລະ­ສັບ​ມື​ຖື​ຂອງ​ປະ­ຊາ­ຊົນ​ຢູ່​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ເຫດ­ການ​ດັ່ງ­ກ່າວ ເຈົ້າ​ໜ້າ­ທີ່​ຕຳ­ຫຼວດ ປກສ ເມືອງ​ໄຊ​ທາ­ນີ ສາ­ມາດ​ຕິດ­ຕາມ​ຈັບ​ຜູ້​ກໍ່​ເຫດ​ໄດ້ 2 ຄົນ ຊື່​ທ້າວ ສິງ​ນະ​ລົງ (ດຳ) ອາ­ຍຸ 31 ປີ ຢູ່​ບ້ານ​ໄຊ ແລະ ທ້າວ ອາ​ພະ​ກອນ (ປ໋ອງ) ອາ­ຍຸ 22 ປີ ຢູ່​ບ້ານ​ດອນ​ໜູນ ເມືອງ​ໄຊ​ທາ­ນີ ນວ ວັນ​ທີ 14 ສິງ­ຫາ 2018 ພວກ​ກ່ຽວ​ໄດ້​ຊັດ​ທອດ​ຫາ​ທ້າວ ດາ­ລາ​ວອນ ອາ­ຍຸ 27 ປີ ຢູ່​ບ້ານ​ໄຊ​ສະ­ຫວ່າງ ເຊິ່ງ​ເປັນ​ຜູ້​ຢູ່​ເບື້ອງ​ຫຼັງ​ຮັບ​ຊື້​ລົດ­ຈັກ​ທີ່​ຍາດ​ຊີງ​ມາ​ແຕ່​ລະ​ຄັ້ງ.

    ເບື້ອງ​ຕົ້ນ​ຜູ້​ເສຍ​ຫາຍ ຊື່​ນາງ ວຽງ​ສະ­ຫວັນ ອາ­ຍຸ 25 ປີ ຢູ່​ບ້ານ​ໄຊ​ສົມ­ບູນ ໄດ້​ເຂົ້າ​ແຈ້ງ​ຄວາມ​ຕໍ່​ເຈົ້າ​ໜ້າ­ທີ່ ປກສ ເມືອງ​ໄຊ​ທາ­ນີ ວ່າ: ເວ­ລາ​ປະ­ມານ 22 ໂມງ ວັນ​ທີ 23 ກໍ­ລະ­ກົດ 2018 ໄດ້​ຂັບ​ລົດ­ຈັກ​ເວບ100 ສີ­ດຳ ເລກ​ທະ­ບຽນ ດທ 8883 ກຳ­ແພງ​ນະ­ຄອນ ເພື່ອ​ຈະ​ກັບ​ໄປ​ບ້ານ​ໄຊ​ສົມ­ບູນ ພໍ​ມາ​ຮອດ​ທາງ​ຮ່ອມ​ເຂົ້າ​ບ້ານ ມີ​ຜູ້​ຊາຍ 2 ຄົນ ຂີ່​ລົດ­ຈັກ​ເວບ 100 ບໍ່​ຈື່​ປ້າຍ​ທະ­ບຽນ ຕັດ​ໜ້າ ຈາກ​ນັ້ນ ຜູ້​ຊ້ອນ​ທ້າຍ​ໄດ້​ເອົາ​ປືນ​ສັ້ນ​ອອກ​ມາ​ຈີ້ ແລະ ບອກ​ໃຫ້​ລົງ​ຈາກ​ລົດ ແລ້ວ​ກໍ່​ເອົາ​ລົດ​ໜີ​ໄປ.

    ຜູ້​ເສຍ​ຫາຍ​ອີກ​ຄົນ​ໜຶ່ງ​ຊື່​ນາງ ສຸດ​ສະ​ດີ ອາ­ຍຸ 22 ປີ ພັກ​ເຊົາ​ຢູ່​ບ້ານ​ສີ­ວິ­ໄລ ເຂົ້າ​ແຈ້ງ​ຄວາມ​ຕໍ່​ເຈົ້າ​ໜ້າ­ທີ່​ວ່າ: ເວ­ລາ 15:00 ໂມງ ວັນ​ທີ 3 ສິງ­ຫາ 2018 ມີ​ຄົນ​ຮ້າຍ 2 ຄົນ ຂັບ​ລົດ­ຈັກ​ເວບ 100 ສີ­ດຳ ເລກ​ທະ­ບຽນ ຍສ 6689 ກຳ­ແພງ​ນະ­ຄອນ ຂັບ​ມາ​ທາງ​ຫຼັງ ແລ້ວ​ດຶງ​ເອົາ​ໂທລະ­ສັບ​ຍີ່­ຫໍ້​ໄອ​ໂຟນ 7 ໃນ​ຂະ­ນະ​ທີ່​ກຳ­ລັງ​ລົມ​ໂທລະ­ສັບ​ຢູ່ ເຫດ­ການ​ດັ່ງ­ກ່າວ​ເຈົ້າ​ໜ້າ­ທີ່​ໄດ້​ຈັດ​ກຳ­ລັງ​ເລັ່ງ​ເກັບ​ກຳ​ຂໍ້​ມູນ​ຫຼັກ​ຖານ​ລະ­ອຽດ ເພື່ອ​ຄັດ​ຈ້ອນ​ເປົ້າ​ໝາຍ​ໄດ້ ເຊິ່ງ​ຄົນ​ຮ້າຍ​ໄດ້​ກໍ່​ເຫດ​ຢ່າງ​ອົງ­ອາດ ເຮັດ​ໃຫ້​ສັງ­ຄົມ​ບໍ່​ມີ​ຄວາມ​ສະ­ຫງົບ ສຳ­ລັບ​ລົດ­ຈັກ ແລະ ໂທລະ­ສັບ​ມື​ຖື​ທີ່​ເກັບ​ກູ້​ໄດ້​ຄືນ​ນັ້ນ ທາງ​ເຈົ້າ​ໜ້າ­ທີ່​ຕຳ­ຫຼວດ​ໄດ້​ມອບ​ໃຫ້​ເຈົ້າ​ຂອງ​ເດີມ​ແລ້ວ ເຊິ່ງ​ມອບ​ໂດຍ ພັຕ ຄຳ​ມະ­ນີ ແກ້ວ​ສີ​ຫາ ຮອງ​ຫົວ­ໜ້າ​ພະ​ແນກ​ສືບ­ສວນ-ສອບ​ສວນ ຫົວ­ໜ້າ​ໜ່ວຍ​ງານ​ສືບ­ສວນ-ສອບ​ສວນ​ຄະ­ດີ​ອາ­ຍາ ປກສ ເມືອງ​ໄຊ​ທາ­ນີ.

ຂ່າວທີ່ກ່ຽວຂ້ອງ