ຂ່າວຫຼ້າສຸດ

ນ້ຳ ແລະ ການບໍລິຫານຈັດການນ້ຳ

135 13 ກ.ຍ. 2018 ນານາສາລະ

    ມາ​ຮອດ​ປັດ­ຈຸ­ບັນ ຊຸມ​ເຮົາ​ເຈົ້າ​ຂ້ອຍ ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຢ່າງ​ມະ­ຫາ­ສານ ເນື່ອງ​ຈາ​ກວ່າ​ລະ­ດູ­ຝົນ​ປີ​ນີ້ ມາ​ໄວ​ຜິດ​ປົກ­ກະ­ຕິ ແລະ ການ​ຕົກ​ມາ​ຂອງ​ຝົນ​ກໍ​ເປັນ​ໄປ​ທາງ​ປົກ­ກະ­ຕິ​ເຊັ່ນ​ກັນ​ພິ­ເສດ​ປີ​ນີ້ ຜັດ​ຍັງ​ມີ​ເສີມ​ດ້ວຍ​ພາ­ຍຸ​ນາມ​ມະ­ກອນ​ຕ່າງໆ ປະ­ມານ 10 ຫົວ ພັດ​ເຂົ້າ​ມາ​ສົມ­ທົບ​ກັບ​ລະ­ດູ­ຝົນ​ປົກ­ກະ­ຕິ ເລີຍ​ເຮັດ​ໃຫ້​ກາຍ­ເປັນ​ລະ­ດູ­ຝົນ​ທີ່​ຜິດ​ປົກ­ກະ­ຕິ ເກີດ​ມີ​ນ້ຳ​ປ່າ​ໄຫຼ­ຊຸ ນ້ຳ​ຖ້ວມ​ຂັງ​ເປັນ​ບໍ­ລິ­ເວນ​ກວ້າງ​ຕາມ​ແຂວງ​ຕ່າງໆ ໃນ​ທົ່ວ​ປະ­ເທດ ພ້ອມ​ດຽວ​ກັນ​ກໍ່​ເຮັດ​ໃຫ້​ອ່າງ​ນ້ຳ​ໃນ​ເຂື່ອນ​ຕ່າງໆ ຈຳ​ຕ້ອງ​ໄດ້​ປ່ອຍ​ນ້ຳ​ທີ່​ເຫຼືອ​ຄວາມ​ຈຳ­ເປັນ​ອອກ​ຄື ລະ­ບາຍ​ມວນ​ນ້ຳ​ເຫຼົ່າ­ນັ້ນ​ລົງ​ທີ່​ຕ່ຳ ເພາະ​ບໍ່​ມີ​ວິ­ທີ​ການ​ເກັບ​ກັກ​ນ້ຳ​ນັ້ນ​ໄວ້​ໃຊ້​ຕໍ່​ໄປ​ໄດ້ ໃນ​ຂະ­ນະ​ດຽວ​ກັນ ກໍ​ເປັນ​ການ​ທົດ​ສອບ​ຄຸນ​ນະ​ພາບ​ຂອງ​ສັນ​ເຂື່ອນ​ໄປ​ໂດຍ​ປະ­ລິ­ຍາຍ​ອີກ.

    ໄລ­ຍະ​ຊຸມ​ປີ​ຫຼັງໆ​ມາ​ນີ້ ເປັນ​ຫຍັງ​ຮອດ​ຍາມ​ລະ­ດູ­ຝົນ ຈຶ່ງ​ມັກ​ມີ​ບັນ­ຫາ​ນ້ຳ​ຖ້ວມ​ເປັນ​ສ່ວນ​ໃຫຍ່ ຕໍ່​ບັນ­ຫາ​ນີ້​ກໍ​ບໍ່​ແມ່ນ​ເລື່ອງ​ແປກ ຖ້າ​ເຮົາ​ຕິດ­ຕາມ​ຂ່າວ​ກ່ຽວ​ກັບ​ສິ່ງ­ແວ­ດລ້ອມ ເພາະ​ສິ່ງ​ດັ່ງ­ກ່າວ ແມ່ນ​ຜົນ​ພວງ​ທີ່​ມາ​ຈາກ​ໂລກ​ຮ້ອນ​ນັ້ນ​ເອງ ຄື​ສະ­ພາບ​ໂລກ​ຮ້ອນ​ໄດ້​ດູດ​ເອົາ​ອາຍ​ນ້ຳ​ຈາກ​ແຫຼ່ງ​ນ້ຳ ເປັນ­ຕົ້ນ ຫ້ວຍ ໜອງ ຄອງ ບຶງ ທະ­ເລ ມະ­ຫາ​ສະ­ໝຸດ ໃຫ້​ເປັນ​ເມກ​ເລື່ອນ­ລອຍ​ໃນ​ອາ­ກາດ ເມື່ອ​ກະ­ທົບ​ກັບ​ຄວາມ​ເຢັນ ເມກ​ເຫຼົ່າ­ນັ້ນ​ກໍ່​ກາຍ­ເປັນ​ຝົນ­ຕົກ​ລົງ​ມາ​ນຳ​ລະ­ດູ​ການ​ນ້ອຍ ຫຼື ຫຼາຍ​ກໍ​ຂື້ນ​ກັບ​ປະ­ລິ­ມານ​ທີ່​ດູດ​ຂຶ້ນ​ໄປ.

    ສ່ວນ​ໂລກ​ຮ້ອນ​ເກີດ​ມາ​ຈາກ​ໃສ​ນັ້ນ ກໍ່​ຄົງ​ຮັບ​ຮູ້​ກັນ​ດີ​ຕາມ​ສື່​ຕ່າງໆ ທີ່​ເຜີຍ­ແຜ່​ມາ​ຫຼາຍ​ແລ້ວ​ວ່າ: ມາ​ຈາກ​ມື​ມະ­ນຸດ​ທີ່​ປ່ອຍ​ທາດ​ກາກ​ບອນ​ດາຍ​ອອກ​ໄຊ​ຂຶ້ນ​ໄປ​ໃນ​ອາ­ກາດ ທຳ­ລາຍ​ຊັ້ນ​ໂອ​ໂຊນ ເຮັດ​ໃຫ້​ລັງ­ສີ​ອັນ​ຕຣາ​ວິ​ໂອ​ເລດ​ຮົ່ວ​ໄຫຼ ນຳ​ເອົາ​ຄວາມ​ຮ້ອນ​ລົງ​ມາ ເຫດ​ໃຫຍ່ໆ​ມາ​ຈາກ​ການ​ປ່ອຍ​ທາດ​ກາກ​ບອນ​ໄດ​ອອກ​ໄຊ ຂອງ​ໂຮງ​ຈັກ​ໂຮງ­ງານ​ອຸດ­ສາ­ຫະ­ກຳ​ບັນ­ດາ​ປະ­ເທດ ອຸດ­ສາ­ຫະ­ກຳ​ໜັກ-ເບົາ ການ​ປ່ອຍ​ຈາກ​ຍວດ​ຍານ­ພາ­ຫະ­ນະ ທີ່​ມີ​ການ​ເຜົາ​ໄໝ້​ຈາກ​ນ້ຳ­ມັນ​ຈາກ​ການ​ຈູດ​ໄມ້​ທຳ­ລາຍ​ປ່າ ຈາກ​ການ​ຫາຍ​ໄປ​ຂອງ​ປ່າ ແລະ ອື່ນໆ ຈຶ່ງ​ກໍ່­ໃຫ້­ເກີດ​ຝົນ­ຕົກ​ຫຼາຍ​ຜິດ​ປົກ­ກະ­ຕິ.

    ສະ­ເພາະ​ປີ​ນີ້ ລາວ​ເຮົາ​ຖື​ວ່າ​ມີ​ໄພ­ພິ­ບັດ​ຢ່າງ​ໃຫຍ່​ຫຼວງ​ເປັນ​ວົງ​ກວ້າງ ຈາກ​ບັນ­ຫາ​ນ້ຳ​ຖ້ວມ​ເຂື່ອນ​ແຕກ ອັນ​ສົ່ງ​ຜົນ​ກະ­ທົບ​ເຖິງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ທີ່​ພວມ​ກຳ­ລັງ​ດີ​ວັນ​ດີ​ຄືນ​ກ້າວ​ຂຶ້ນ​ຢ່າງ​ຕໍ່​ເນື່ອງ ຄື​ຕ້ອງ​ລົບ​ລ້າງ​ສະ­ພາບ​ດ້ອຍ​ພັດ­ທະ­ນາ​ໃຫ້​ໄດ້​ຂັ້ນ​ພື້ນ­ຖານ ໃນ​ປີ 2020 ຕ້ອງ​ມີ​ອັນ​ກະ­ທົບ​ບໍ່​ໜ້ອຍ ສ່ວນ​ການ​ບໍ­ລິ­ຫານ​ຈັດ­ການ​ນ້ຳ​ນັ້ນ ກໍ​ເຫັນ​ວ່າ​ເຂື່ອນ​ແຫ່ງ​ຕ່າງໆ ກໍ່​ໃຊ້​ດຸນ​ພິ­ນິດ​ໃນ​ການ​ພິ­ຈາ­ລະ­ນາ ການ​ປ່ອຍ​ນ້ຳ​ຕາມ​ຫຼັກ​ວິ­ຊາ​ການ​ກໍ່​ຄື​ຄວາມ​ສາ­ມາດ​ໃນ​ການ​ເກັບ​ຮັກ­ສາ​ໄວ້ ພາຍ​ໃຕ້​ການ​ຄາດ​ຄະ­ເນ​ສະ­ພາບ​ຟ້າ​ຝົນ​ທີ່​ຈະ​ມີ​ມາ​ຕື່ມ ຈົນ​ກວ່າ​ຈະ​ສິ້ນ​ສຸດ​ລະ­ດູ­ຝົນ​ໃນ​ເດືອນ​ຕຸ­ລາ​ນີ້.

    ໄປ​ຄຽງ​ຄູ່​ກັບ​ບັນ­ຫາ​ດັ່ງ­ກ່າວ ນອກ­ຈາກ​ຜົນ​ກະ­ທົບ​ຈາກ​ເຂື່ອນ​ແຕກ​ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື​ແລ້ວ ຜົນ​ເສຍ​ຫາຍ​ຈາກ​ນ້ຳ​ຖ້ວມ ນ້ຳ​ປ່າ​ໄຫຼ­ຊຸ ຍັງ​ມີ​ຢ່າງ​ມະ­ຫາ­ສານ​ໃນ​ບັນ­ດາ​ແຂວງ​ທົ່ວ​ປະ­ເທດ ແຕ່​ເໜືອ​ເຖິງ​ໃຕ້ ໂດຍ​ສະ­ເພາະ ການ​ເສຍ​ຫາຍ​ທາງ​ດ້ານ​ເນື້ອ­ທີ່​ການ​ຜະ­ລິດ ຊີ­ວິດ ຊັບ​ສິນ​ທີ່​ມາ​ຈາກ​ຄວາມ​ຜິດ​ປົກ­ກະ­ຕິ​ຂອງ​ລະ­ດູ​ການ​ນີ້ ແຕ່​ເຖິງ​ຢ່າງ­ໃດ​ກໍ່​ດີ ຊີ­ວິດ​ຂອງ​ຄົນ​ເຮົາ ເປັນ​ຊີ­ວິດ​ທີ່​ຂາດ​ນ້ຳ​ບໍ່​ໄດ້ ແຕ່​ກົງ­ກັນ­ຂ້າມ ເມື່ອ​ນ້ຳ​ມີ​ຫຼາຍ​ກໍ່​ກາຍ­ເປັນ​ສິ່ງ​ທຳ­ລາຍ​ຊີ­ວິດ ແລະ ຊັບ​ສິນ​ຂອງ​ຄົນ​ເຮົາ​ເຊັ່ນ​ດຽວ​ກັນ ຍ້ອນ​ແນວ​ນັ້ນ ກໍ່​ຈົ່ງ​ຢຶດ​ໝັ້ນ​ໃນ​ການ​ດຳ­ລົງ​ຊີ­ວິດ​ຕໍ່​ໄປ​ຢ່າງ​ມີ​ສະ­ມາ­ທິ ແລະ ມີ​ສະ­ຕິ​ຕໍ່­ໜ້າ​ໄພ­ພິ­ບັດ​ທັງ­ຫຼາຍ​ທັງ​ປວງ.

ຂ່າວທີ່ກ່ຽວຂ້ອງ