ຂ່າວຫຼ້າສຸດ

ການສັງເຄາະແສງທຽນ ຊ່ວຍຜະລິດພະລັງງານສະອາດລາຄາຖືກ

206 13 ກ.ຍ. 2018 ຫົວຂໍ້ຂ່າວອື່ນໆ

    ຜູ້​ຊ່ຽວ­ຊານ​ຊີ້​ວ່າ ແຫຼ່ງ​ພະ­ລັງ­ງານ​ສະ­ອາດ​ທີ່​ໝັ້ນ­ຄົງ ລ້ວນ​ແຕ່​ມີ​ຂໍ້​ດ້ອຍ ເຊັ່ນ​ວ່າ: ກັງ​ຫັນ​ລົມ​ຈະ​ເຮັດ​ວຽກ​ໄດ້​ກໍ່​ຕໍ່​ເມື່ອ​ມີ​ລົມ​ພັດ​ເທົ່າ​ນັ້ນ ແຜງ​ພະ­ລັງ­ງານ​ແສງ​ຕາ­ເວັນ ຈະ​ຜະ­ລິດ​ພະ­ລັງ­ງານ​ເມື່ອ​ມີ​ແສງ​ແດດ ນອກ­ຈາກ​ນີ້ ແຜງ​ໂຊ​ລ່າ​ເຊວ ທີ່​ດີ​ທີ່​ສຸດ ແລະ ແພງ​ທີ່​ສຸດ ມີ​ປະ­ສິດ­ທິ­ພາບ​ພຽງ​ແຕ່ 20% ເທົ່າ​ນັ້ນ.

    ທ່ານ​ສາດ­ສະ­ດາ­ຈານ ດັນ ເຫວີ່ຍ ຫວາງ (Dun wel Wang) ແຫ່ງ​ວິ­ທະ­ຍາ­ໄລ ບອສ​ຕັນ (Boston College) ກ່າວ​ວ່າ ນອກ­ຈາກ​ນີ້ ຍັງ​ມີ​ບັນ­ຫາ​ກ່ຽວ​ກັບ​ການ​ເກັບ​ກັກ​ພະ­ລັງ­ງານ​ທີ່​ຜະ­ລິດ​ໄດ້​ໃນ​ໄລ­ຍະ​ຍາວ​ອີກ​ດ້ວຍ.

    ທ່ານ​ສາດ­ສະ­ດາ­ຈານ ຫວາງ ກ່າວ​ອີ​ກວ່າ: ມີ​ວິ­ທີ​ດຽວ​ທີ່​ເຮັດ​ໄດ້​ຄື: ການ​ເຊື່ອມ​ຕໍ່​ແຜງ​ພະ­ລັງ­ງານ​ແສງ​ຕາ­ເວັນ​ເຂົ້າ​ກັບ​ແບດ​ເຕີ​ຣີ່ ແຕ່​ຫາກ​ຕ້ອງ­ການ​ຜະ­ລິດ​ໄຟ­ຟ້າ​ໃຫ້​ຄົນ​ທົ່ວ​ປະ­ເທດ​ໃຊ້ ຫຼື ຄົນ​ທັງ​ໂລກ​ໃຊ້​ຍັງ​ບໍ່​ມີ​ແບດ​ເຕີ​ຣີ່​ທີ່​ສາ­ມາດ​ຮອງ​ຮັບ​ວຽກ​ນີ້​ໄດ້​ໃນ​ປັດ­ຈຸ­ບັນ.

    ຜູ້​ສື່​ຂ່າວ​ທ່ານ​ໜຶ່ງ​ລາຍ​ງານ​ວ່າ ທຳ​ມະ​ຊາດ​ໄດ້​ສ້າງ​ໂຊ​ລ່າ​ເຊວ​ຂຶ້ນ​ມາ ພ້ອມ​ກັບ​ວິ­ທີ​ການ​ຈັດ​ເກັບ​ພະ­ລັງ­ງານ​ທີ່​ໄດ້ ໂດຍ​ໃບ​ໄມ້​ທຸກ​ໃບ​ໃຊ້​ຂະ​ບວນ​ການ​ສັງ​ເຄາະ​ແສງ ເພື່ອ​ໃຊ້​ປະ­ໂຫຍດ​ຈາກ​ແສງ​ແດດ ໂດຍ​ປ່ຽນ​ແສງ​ແດດ​ໃຫ້​ເປັນ​ພະ­ລັງ­ງານ​ເຄ ກ່ອນ​ຈະ​ນຳ­ໄປ​ໃຊ້ ຫຼື ເກັບ​ໄວ້​ໃຊ້​ໃນ​ພາຍ­ຫຼັງ.

    ຂະ​ບວນ​ການ​ສັງ​ເຄາະ​ແສງ ຕາມ​ທຳ​ມະ​ຊາດ​ນີ້​ຊ້າ​ເກີນ​ໄປ​ສຳ­ລັບ​ໂລກ​ທີ່​ຫິວ​ໂຫຍ​ພະ­ລັງ­ງານ ແຕ່​ສາດ­ສະ­ດາ­ຈານ ຫວາງ ກ່າວ​ວ່າ ຕົວ​ເລັ່ງ​ປະ­ຕິ­ກິ­ລິ­ຍາ​ແບບ​ໃໝ່​ທີ່​ທີມ​ງານ​ກຳ­ລັງ​ພັດ­ທະ­ນາ ຈະ​ຊ່ວຍ​ເພິ່ມ​ປະ­ສິດ­ທິ­ພາບ​ຂອງ​ຂະ​ບວນ​ການ​ສັງ​ເຄາະ​ແສງ​ທຽມ ແລະ ຊ່ວຍ​ໃຫ້​ເຮົາ​ໃຊ້​ປະ­ໂຫຍດ​ຈາກ​ພະ­ລັງ­ງານ​ຈາກ​ແສງ​ຕາ­ເວັນ​ໄດ້​ດີ​ຫຼາຍ​ຂຶ້ນ ດ້ວຍ​ການ​ແຍກ​ນ້ຳ​ອອກ​ເປັນ​ອົກ​ຊິ​ແຊນ ແລະ ຮີ​ໂດ​ແຊນ ຊຶ່ງ​ຢ່າງ​ຫຼັງ​ນີ້​ນຳ­ໄປ​ໃຊ້​ໃນ​ເຊວ​ເຊື້ອ​ເພີງ​ເພື່ອ​ຜະ­ລິດ​ພະ­ລັງ­ງານ.

    ສາດ­ສະ­ດາ­ຈານ ຫວາງ ກ່າວ​ວ່າ ຕົວ​ເລັ່ງ​ປະ­ຕິ­ກິ­ລິ­ຍາ​ທີ່​ທີມ​ງານ​ຄົ້ນ​ພົບ ຖື​ເປັນ​ຕົວ​ເລັ່ງ​ປະ­ຕິ­ກິ­ລິ­ຍາ​ທີ່​ດີ​ທີ່​ສຸດ​ຕົວ​ໜຶ່ງ ທີ່​ສາ­ມາດ​ລອກ​ຮຽນ​ແບບ​ຂະ​ບວນ​ການ​ສັງ​ເຄາະ​ແສງ​ໄດ້​ດ້ວຍ ການ​ເຮັດ​ໃຫ້­ການ​ແຍກ​ເອ​ເລັກ​ໂຕຣນ ຈາກ​ນ້ຳ​ງ່າຍ​ຂຶ້ນ ໃນ​ຂັ້ນ​ຕອນ​ຜະ­ລິດ​ອົກ​ຊິ​ແຊນ ແລະ ເອ​ເລັກ​ໂຕຣນ​ທີ່​ແຍກ​ໄດ້ ສາ­ມາດ​ນຳ­ໄປ​ໃຊ້​ໃນ​ການ​ເຮັດ​ໃຫ້​ນ້ຳ​ຜະ­ລິດ ຮີ​ໂດຣ​ແຊນ ຫຼື ຫຼຸດ ແກ໊​ສ​ກາກ​ບອນ​ດີ​ອົກ​ຊິດ.

   ທີມ​ນັກ​ວິ­ໄຈ ຊີ້​ແຈງ​ວ່າ ຍັງ​ຈຳ­ເປັນ​ຕ້ອງ​ມີ​ການ​ສຶກ​ສາ​ວິ­ໄຈ​ເພິ່ມ​ເຕີມ ແຕ່​ພວກ​ເຂົາ​ຫວັງ​ວ່າ​ຕົວ​ເລັ່ງ​ປະ­ຕິ­ກິ­ລິ­ຍາ​ຕົວ​ໃໝ່​ທີ່​ພັດ­ທະ­ນາ​ຢູ່​ນີ້ ອາດ​ນຳ­ໄປ​ໃຊ້​ໄດ້​ໃນ​ລະ­ດັບ​ອຸດ­ສາ­ຫະ­ກຳ ຊຶ່ງ​ຊ່ວຍ​ຫຼຸດ​ການ​ເພິ່ງ​ພາ​ພະ­ລັງ­ງານ​ຈາກ​ຖ່ານ​ຫິນ ແລະ ນ້ຳ­ມັນ​ລົງ.

ຂ່າວທີ່ກ່ຽວຂ້ອງ