ຂ່າວຫຼ້າສຸດ

ໄຊທານີ ໄດ້ຮັບຜົນກະທົບຈາກໄພນ້ຳຖ້ວມ 64 ບ້ານ

104 13 ກ.ຍ. 2018 ຂ່າວໜ້າ​ໜຶ່ງ
ໄຊທານີ ໄດ້ຮັບຜົນກະທົບຈາກໄພນ້ຳຖ້ວມ 64 ບ້ານ

    ຈາກ​ສະ­ພາບ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ບວກ​ກັບ​ການ​ປ່ອຍ​ນ້ຳ​ຈາກ​ເຂື່ອນ​ຕ່າງໆ ເຮັດ​ໃຫ້​ປະ­ລິ­ມານ​ນ້ຳ​ງື່ມ​ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ໄຫຼ​ເຂົ້າ​ຖ້ວມ​ບ້ານ​ເຮືອນ​ປະ­ຊາ­ຊົນ​ທີ່­ຢູ່​ລຽບ​ແຄມ​ນ້ຳ ໂດຍ​ສະ­ເພາະ​ແມ່ນ​ປະ­ຊາ­ຊົນ​ເຂດ​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເຮັດ​ໃຫ້​ພື້ນ­ຖານ​ໂຄງ​ລ່າງ ຄົມ­ມະ­ນາ­ຄົມ ຂົງ­ເຂດ​ບໍ­ລິ­ການ ການ​ສຶກ​ສາ ແລະ ພື້ນ​ທີ່​ການ​ຜະ­ລິດ​ກະ­ສິ­ກຳ​ໄດ້​ຮັບ​ຜົນ​ກະ­ທົບ​ຢ່າງ​ຫຼວງ­ຫຼາຍ ເຊິ່ງ​ລວມ​ມູນ​ຄ່າ​ເສຍ​ຫາຍ​ເບື້ອງ​ຕົ້ນ​ປະ­ມານ 27,4 ຕື້​ກວ່າ​ກີບ.

    ທ່ານ ວັນ­ເພັງ ອິນ​ທະ​ວົງ ຮອງ​ເຈົ້າ­ເມືອງ​ໄຊ​ທາ­ນີ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ເມືອງ ໃຫ້​ສຳ­ພາດ​ວັນ​ທີ 12 ກັນ­ຍາ 2018 ທີ່​ປົກ­ຄອງ​ເມືອງ​ໄຊ​ທາ­ນີ ວ່າ: ມາ​ຮອດ​ປັດ­ຈຸ­ບັນ ບ້ານ​ທີ່​ຖືກ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ທົ່ວ​ເມືອງ​ມີ​ທັງ​ໝົດ 64 ບ້ານ ໃນ​ນັ້ນ ສະ­ເພາະ​ບ້ານ​ຖືກ​ຜົນ​ກະ­ທົບ​ເນື້ອ­ທີ່​ການ​ຜະ­ລິດ​ມີ 21 ບ້ານ ສ່ວນ​ບ້ານ​ຖືກ​ຍົກ­ຍ້າຍ​ລວມ​ທັງ​ນ້ຳ​ຖ້ວມ​ເນື້ອ­ທີ່​ການ​ຜະ­ລິດ​ມີ 43 ບ້ານ ມີ​ທັງ​ໝົດ 936 ຄອບ­ຄົວ ໃນ​ນີ້ ຜົນ​ກະ­ທົບ​ຕໍ່​ເນື້ອ­ທີ່​ນາ​ເສຍ​ຫາຍ 3.455 ເຮັກ­ຕາ ຊົນ­ລະ­ປະ­ທານ 14 ແຫ່ງ ພືດ​ຜັກ 450,4 ເຮັກ­ຕາ ພືດ​ອຸດ­ສາ­ຫະ­ກຳ 369,8 ເຮັກ­ຕາ ສ່ວນ​ໝາກ​ໄມ້​ໃຫ້​ໝາກ 5,5 ເຮັກ­ຕາ ສວນ​ໄມ້​ອຸດ­ສາ­ຫະ­ກຳ 7,5 ເຮັກ­ຕາ ຟາມ​ໝູ 5 ຟາມ ຟາມ​ກຸ້ງ 2 ເຮັກ­ຕາ ໜອງ​ປາ 57,5 ເຮັກ­ຕາ ແລະ ຟາມ​ຫອຍ 1 ຟາມ ສັດ­ລ້ຽງ​ຕາຍ 63 ໂຕ ຂົວ​ຖືກ​ນ້ຳ​ຖ້ວມ 2 ແຫ່ງ ເສັ້ນ­ທາງ 22 ເສັ້ນ​ຍາວ 39,9 ກິ­ໂລ­ແມັດ ເຂດ​ບໍ­ລິ­ຫານ​ຮ້ານ​ຄ້າ 63 ຮ້ານ ຣີ​ສອດ 7 ແຫ່ງ ຮ້ານ​ກິນ​ດື່ມ 13 ແຫ່ງ ໂຮງ­ງານ 11 ແຫ່ງ ໂຮງ­ຮຽນ 13 ແຫ່ງ ແລະ ອື່ນໆ.

    ຕໍ່​ກັບ​ສະ­ພາບ​ການ​ດັ່ງ­ກ່າວ ໄລ­ຍະ​ຜ່ານ​ມາ ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ເມືອງ​ກໍ່​ໄດ້​ສຸມ​ໃສ່​ແກ້​ໄຂ ແລະ ໃຫ້­ການ​ຊ່ວຍ­ເຫຼືອ​ປະ­ຊາ­ຊົນ ເປັນ­ຕົ້ນ​ແມ່ນ​ການ​ຍົກ­ຍ້າຍ​ປະ­ຊາ­ຊົນ​ໄປ​ຢູ່​ບ່ອນ​ທີ່​ປອດ​ໄພ​ໃນ 35 ຈຸດ ອອກ​ແຈ້ງ​ການ​ລະ­ດົມ​ທຶນ​ຊ່ວຍ­ເຫຼືອ​ປະ­ຊາ­ຊົນ​ທຸກ​ພາກ­ສ່ວນ​ໃນ​ສັງ­ຄົມ ແລະ ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ຕິດ­ຕາມ​ດ້ານ​ສຸ​ຂະ​ອະ­ນາ­ໄມ ພ້ອມ​ນັ້ນ ພາຍ­ຫຼັງ​ນ້ຳ​ຫຼຸດ​ລົງ​ກັບ​ສູ່​ສະ­ພາບ​ປົກ­ກະ­ຕິ (ປັດ­ຈຸ­ບັນ​ນ້ຳ​ໄດ້​ຫຼຸດ​ລົງ​ໃນ​ລະ­ດັບ 13 ແມັດ) ຍັງ​ໄດ້​ຂຶ້ນ​ແຜນ​ສະ­ເໜີ​ຂັ້ນ​ເທິງ ເພື່ອ​ຂໍ​ທຶນ​ຊ່ວຍ­ເຫຼືອ​ຟື້ນ​ຟູນ​ການ​ເສຍ​ຫາຍ​ທັງ​ໄລ­ຍະ​ສັ້ນ ແລະ ຍາວ​ນານ​ຢ່າງ​ຮີບ​ດ່ວນ ເຊັ່ນ: ການ​ປົວ­ແປງ​ອາ­ຄານ​ໂຮງ­ຮຽນ​ທີ່​ຖືກ​ຜົນ​ກະ­ທົບ ໃຫ້​ສາ­ມາດ​ເປີດ​ຮຽນ​ທັນ​ລະ­ຫວ່າງ​ກາງ​ເດືອນ​ກັນ­ຍາ ຟື້ນ​ຟູ​ລະ­ບົບ​ໄຟ­ຟ້າ ສ້ອມ­ແປງ​ເສັ້ນ­ທາງ ຕອບ​ສະ­ໜອງ​ແນວ​ພັນ​ພືດ-ສັດ ປັບ­ປຸງ​ລະ­ບົບ​ຊົນ­ລະ­ປະ­ທານ ເພື່ອ​ກຽມ­ພ້ອມ​ໃຫ້​ແກ່​ການ​ຜະ­ລິດ​ລະ­ດູ­ແລ້ງ​ໃຫ້​ທັນ​ກັບ​ລະ­ດູ​ການ.

    ສຳ­ລັບ​ວັດ­ຖຸ​ສິ່ງ​ຂອງ​ຈຳ­ເປັນ ແລະ ຕ້ອງ­ການ​ຢາກ​ປະ­ກອບ­ສ່ວນ​ຊ່ວຍ­ເຫຼືອ​ແກ່​ປະ­ຊາ­ຊົນ​ທີ່​ຖືກ​ຜົນ​ກະ­ທົບ ເຊັ່ນ: ເຂົ້າ­ສານ ອາ­ຫານ​ແຫ້ງ ນ້ຳ​ດື່ມ ນ້ຳ​ໃຊ້ ຢາ​ປົວ​ພະ­ຍາດ ແນວ​ພັນ​ພືດ-ສັດ ແລະ ອື່ນໆ.

ຂ່າວທີ່ກ່ຽວຂ້ອງ