ຂ່າວຫຼ້າສຸດ

ລະດັບນ້ຳງື່ມຫຼຸດລົງ ປະຊາຊົນຈຳນວນໜຶ່ງກັບເຂົ້າໄປຢູ່ເຮືອນຂອງຕົນ ໄດ້ເປັນປົກກະຕິ

396 13 ກ.ຍ. 2018 ຂ່າວໜ້າ​ໜຶ່ງ
ລະດັບນ້ຳງື່ມຫຼຸດລົງ ປະຊາຊົນຈຳນວນໜຶ່ງກັບເຂົ້າໄປຢູ່ເຮືອນຂອງຕົນ ໄດ້ເປັນປົກກະຕິ

    ນັບ​ແຕ່​ວັນ​ທີ 19 ສິງ­ຫາ 2018 ເປັນ­ຕົ້ນ​ມາ ລະ­ດັບ​ນ້ຳ​ງື່ມ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ໄດ້​ໄຫຼ​ເຂົ້າ​ຖ້ວມ​ເນື້ອ­ທີ່​ທຳ​ການ​ຜະ­ລິດ ບ້ານ​ເຮືອນ​ປະ­ຊາ­ຊົນ​ທີ່­ຢູ່​ລຽບ​ແຄມ​ແມ່­ນ້ຳ​ງື່ມ ເສັ້ນ­ທາງ​ຫຼາຍ​ເສັ້ນ​ບໍ່​ສາ­ມາດ​ສັນ­ຈອນ​ໄປ​ມາ​ໄດ້.

    ຕາມ​ການ​ລາຍ​ງານ​ຂອງ​ທ່ານ ພູ​ວອນ ພົງ​ລາດ​ແກ້ວ ຫົວ­ໜ້າ​ຫ້ອງ​ວ່າ­ການ ເມືອງ​ນາ​ຊາຍ​ທອງ ຄະ­ນະ​ກຳ­ມະ­ການ​ຕ້ານ​ຖ້ວມ​ຂັ້ນ​ເມືອງ ໃນ​ວັນ​ທີ 12 ກັນ­ຍາ 2018 ວ່າ: ພາຍ­ຫຼັງ​ທີ່​ລະ­ດັບ​ນ້ຳ​ງື່ມ​ເພີ່ມ​ຂຶ້ນ ໄດ້​ໄຫຼ​ເຂົ້າ​ຖ້ວມ​ບ້ານ​ປະ­ຊາ­ຊົນ​ຈຳ­ນວນ 9 ບ້ານ ມີ  524 ຄອບ­ຄົວ ໃນ​ນີ້ ບ້ານ​ແສນ​ດິນ​ຖ້ວມ​ໜັກ​ກວ່າ​ໝູ່ ມີ 309 ຄອບ­ຄົວ ປະ­ຊາ­ຊົນ​ຖືກ​ຍົກ­ຍ້າຍ 30 ຄອບ­ຄົວ ຖ້ວມ​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ​ຈຳ­ນວນ 24 ບ້ານ ເນື້ອ­ທີ່ 3.017 ເຮັກ­ຕາ ເນື້ອ­ທີ່​ນາ 2.088 ເຮັກ­ຕາ ພືດ​ຜັກ 26 ເຮັກ­ຕາ ພືດ​ລົ້ມ​ລຸກ 609 ເຮັກ­ຕາ ໄມ້​ໃຫ້​ໝາກ 66 ເຮັກ­ຕາ ໜອງ​ປາ 206 ເຮັກ­ຕາ ທົ່ງ​ຫຍ້າ 22 ເຮັກ­ຕາ ສັດ­ລ້ຽງ​ໄດ້​ຮັບ​ຜົນ​ກະ­ທົບ 11 ບ້ານ ຟາມ​ສັດ​ຖືກ​ຜົນ​ກະ­ທົບ 7 ບ້ານ ມີ 30 ຟາມ ຄອງ­ເໝືອງ​ຖືກ​ຖ້ວມ 26.472 ແມັດ ເສັ້ນ­ທາງ​ເປ​ເພ່ (ທາງ​ດິນ​ແດງ) 31.400 ແມັດ.

    ປັດ­ຈຸ­ບັນ​ລະ­ດັບ​ນ້ຳ​ຄ່ອຍ​ຫຼຸດ​ລົງ​ຕາມ​ລຳ­ດັບ​ຢູ່​ໃນ​ລະ­ດັບ 11,18 ແມັດ ເສັ້ນ­ທາງ​ບາງ​ເສັ້ນ​ສາ­ມາດ​ສັນ­ຈອນ​ໄປ​ມາ​ໄດ້ ແລະ ບາງ​ເສັ້ນ​ລົດ­ຈັກ​ຍັງ​ບໍ່​ສາ­ມາດ​ສັນ­ຈອນ​ໄປ​ມາ​ໄດ້ ພາຍ­ຫຼັງ​ທີ່​ນ້ຳ​ຫຼຸດ​ລົງ ຫ້ອງ­ການ​ສາ­ທາ­ລະ­ນະ​ສຸກ​ກໍ່​ໄດ້​ໄປ​ກວດ­ກາ​ດ້ານ​ສຸ​ຂະ​ອະ­ນາ­ໄມ ແລ້ວ​ຈິ່ງ​ໃຫ້​ປະ­ຊາ­ຊົນ​ເຂົ້າ​ໄປ​ຢູ່​ເຮືອນ​ຂອງ​ຕົນ​ໄດ້ ຫຼັງ​ຈາກ​ສະ­ພາບ​ນ້ຳ​ຫຼຸດ​ລົງ​ເປັນ​ປົກ­ກະ­ຕິ ຂະ­ແໜງ­ການ​ກ່ຽວ­ຂ້ອງ ຈະ​ໄດ້​ເອົາ­ໃຈ­ໃສ່​ຟື້ນ​ຟູ​ບັນ­ດາ​ພື້ນ­ຖານ​ໂຄງ​ລ່າງ ເປັນ­ຕົ້ນ​ແມ່ນ​ສ້ອມ­ແປງ​ເສັ້ນ­ທາງ ເນື້ອ­ທີ່​ທຳ​ການ​ຜະ­ລິດ ສະ­ໜອງ ແນວ​ພັນ​ພືດ ສັດ ກວດ​ສຸ­ຂະ­ພາບ​ຂອງ​ປະ­ຊາ­ຊົນ ແລະ ອື່ນໆ ເຖິງ​ແມ່ນ​ວ່າ​ສະ­ພາບ​ນ້ຳ​ຈະ​ຫຼຸດ​ລົງ​ກໍ່​ຕາມ ແຕ່​ປະ­ຊາ­ຊົນ​ກໍ່​ຍັງ​ຕ້ອງ­ການ​ຊ່ວຍ­ເຫຼືອ ເປັນ­ຕົ້ນ​ແມ່ນ​ນ້ຳ​ດື່ມ ສະ­ນັ້ນ ພາກ­ສ່ວນ​ບຸກ­ຄົນ​ໃດ​ມີ​ເງື່ອນ­ໄຂ​ສາ­ມາດ​ໃຫ້­ການ​ຊ່ວຍ­ເຫຼືອ​ໄດ້.

ຂ່າວທີ່ກ່ຽວຂ້ອງ