ຂ່າວຫຼ້າສຸດ

ສ້າງເສັ້ນທາງລົດໄຟ ລາວ-ຈີນ ໃຫ້ເປັນເສັ້ນທາງປອດໃສຂາວສະອາດ

193 13 ກ.ຍ. 2018 ຂ່າວໜ້າ​ໜຶ່ງ

    ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ການ​ກໍ່­ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ຮັບ­ປະ­ກັນ​ໄດ້​ຄວາມ​ປອດ​ໃສ​ຂາວ​ສະ­ອາດ ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ປະ­ທານ​ອົງ­ການ​ກວດ­ກາ​ລັດ­ຖະ­ບານ ແລະ ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ໄດ້​ແຕ່ງ­ຕັ້ງ​ພະ­ນັກ­ງານ​ການ​ນຳ​ຜູ້​ເຮັດ​ວຽກ​ງານ​ຕິດ­ຕາມ​ກວດ­ກາ ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ທາງ​ລົດ­ໄຟ​ລາວ-ຈີນ ເຂົ້າ​ຮ່ວມ​ສຳ​ມະ​ນາ​ກ່ຽວ​ກັບ​ການ​ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ໃຫ້​ເປັນ​ເສັ້ນ­ທາງ​ປອດ​ໃສ​ຂາວ​ສະ­ອາດ​ທີ່ ສປ ຈີນ ໃນ​ວັນ​ທີ 9-16 ກັນ­ຍາ 2018 ນຳ​ໂດຍ​ທ່ານ ຄຳ​ສຸກ ບຸນ​ຍະ​ວົງ ຮອງ​ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ຮອງ​ປະ­ທານ​ອົງ­ການ​ກວດ­ກາ​ລັດ­ຖະ­ບານ ແລະ ຮອງ​ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ພ້ອມ​ດ້ວຍ​ຄະ­ນະ 50 ທ່ານ ເປັນ​ປະ­ທານ​ຮ່ວມ​ຂອງ​ທ່ານ ຫຼິງ​ຈີ່ ຄະ­ນະ​ກຳ­ມະ­ການ​ກວດ­ກາ​ລະ­ບຽບ​ວິ­ໄນ​ສູນ​ກາງ​ພັກ ກຳ­ມະ­ການ​ກວດ​ສອບ​ແຫຼ່ງ​ລັດ ມີ​ບັນ­ດາ​ຫົວ­ໜ້າ​ອົງ­ການ​ກວດ­ກາ​ການ​ຮ່ວມ​ມື​ກັບ​ສາ­ກົນ ຫົວ­ໜ້າ​ຄະ­ນະ​ບໍ­ລິ­ສັດ​ກໍ່­ສ້າງ​ທາງ​ລົດ­ໄຟ​ຈີນ ເລ­ຂາ​ພັກ​ມະ­ຫາ­ວິ­ທະ­ຍາ­ໄລ​ຄົມ­ມະ­ນາ­ຄົມ​ປັກ​ກິ່ງ ຫົວ­ໜ້າ​ອົງ­ການ​ກວດ​ສອບ​ບໍ­ລິ­ສັດ​ລົດ­ໄຟ​ຈີນ ປະ­ທານ​ສະ­ພາ​ບໍ­ລິ­ສັດ ລົດ­ໄຟ​ຈີນ​ລະ­ຫວ່າງ​ປະ­ເທດ ຈຳ­ກັດ ແລະ ອາ­ຈານ​ຂອງ ສປ ຈີນ.

    ການ​ຈັດ​ສຳ​ມະ​ນາ​ຄັ້ງ​ນີ້ ເພື່ອ​ຮັບ­ປະ­ກັນ​ໃຫ້­ການ​ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ໃຫ້​ມີ​ຄຸ­ນະ­ພາບ ມີ​ຄວາມ​ໂປ່ງ​ໃສ ແລະ ນຳ​ເອົາ​ຜົນ​ປະ­ໂຫຍດ​ຕົວ​ຈິງ​ມາ​ໃຫ້​ແກ່​ປະ­ຊາ­ຊົນ​ສອງ​ປະ­ເທດ​ລາວ-ຈີນ ເພື່ອ​ຈັດ​ຕັ້ງ​ຜັນ​ຂະ­ຫຍາຍ​ຈິດ­ໃຈ​ການ​ຊີ້​ນຳ​ຂອງ​ການ​ນຳ​ສູງ​ສຸດ​ຂອງ​ສອງ​ປະ­ເທດ ດ້ວຍ​ຄວາມ​ຮັບ­ຜິດ­ຊອບ​ສູງ ການ​ສຳ​ມະ​ນາ​ໄດ້​ຮັບ​ຟັງ​ບັນ­ຍາຍ​ຈາກ​ອາ­ຈານ ທີ່​ມີ​ປະ­ສົບ​ການ ເປັນ­ຕົ້ນ ຜົນ­ສຳ­ເລັດ​ຂອງ​ການ​ປົກ­ຄອງ​ພັກ​ຢ່າງ­ຮອບ­ດ້ານ ແລະ ເຂັ້ມ​ງວດ ລວມ​ເຖິງ​ຈິດ­ໃຈ​ກອງ​ປະ­ຊຸມ​ໃຫຍ່​ທົ່ວ​ປະ­ເທດ​ຂອງ​ຄະ­ນະ​ກວດ­ກາ ລະ­ບຽບ​ວິ­ໄນ​ສູນ​ກາງ​ພັກ​ກອມ​ມູ​ນິດ​ຈີນ ຄັ້ງ​ທີ 18 ປະ­ສົບ​ການ​ພັດ­ທະ­ນາ ແລະ ຜົນ­ສຳ­ເລັດ​ການ​ປະ­ຕິ​ຮູບ​ເປີດ​ກວ້າງ​ການ​ປະ­ຕິ​ຮູບ​ປະ­ເທດ​ຈີນ​ເປັນ​ເວ­ລາ 40 ປີ ການ​ພັດ­ທະ­ນາ​ຢ່າງ​ໄວ­ວາ​ຂອງ​ລົດ­ໄຟ​ຈີນ ຂໍ້​ລິ​ເລີ່ມ​ໜຶ່ງ​ແລວ​ທາງ ໜຶ່ງ​ເສັ້ນ­ທາງ ຜົນ​ກະ­ທົບ​ຂອງ​ທາງ​ລົດ­ໄຟ​ລາວ-ຈີນ​ຕໍ່​ເສດ­ຖະ­ກິດ-ສັງ­ຄົມ ວິ­ສະ­ວະ­ກຳ​ລົດ­ໄຟ​ຄວາມ​ໄວ​ສູງ ແລະ ສະ­ພາບ​ການ​ກໍ່­ສ້າງ​ຄວາມ​ໂປ່ງ​ໃສ​ຂາວ​ສະ­ອາດ ການ​ຄຸ້ມ​ຄອງ​ພັກ​ຢ່າງ​ເຂັ້ມ​ງວດ​ໃນ​ທຸກ​ດ້ານ​ຂອງ​ພັກ​ກອມ​ມູ​ນິດ​ຈີນ ແລະ ສະ­ພາບ​ການ​ຕ້ານ​ການ​ສໍ້​ລາດ​ບັງ​ຫຼວງ ການ​ຮ່ວມ​ມື​ລະ­ຫວ່າງ​ປະ­ເທດ ເພື່ອ​ຕ້ານ​ການ​ສໍ້​ລາດ​ບັງ​ຫຼວງ ວິ­ສະ­ວະ­ກຳ​ລົດ­ໄຟ​ລາວ-ຈີນ ແລະ ສະ­ພາບ​ການ​ກໍ່­ສ້າງ​ຄວາມ​ໂປ່ງ​ໃສ​ຂາວ​ສະ­ອາດ ນອກ­ຈາກ​ນີ້ ຄະ­ນະ​ນັກ​ເຝິກ­ອົບ­ຮົມ​ຍັງ​ຈະ​ໄດ້​ຢ້ຽມ​ຊົມ​ຮຽນ​ຮູ້​ຢູ່​ສະ­ໜາມ​ກໍ່­ສ້າງ​ລົດ­ໄຟ​ຄວາມ​ໄວ​ສູງ ດ້ວຍ​ເຄື່ອງ​ເຈາະ​ທັນ​ສະ­ໄໝ ຢ້ຽມ​ຊົມ​ສະ­ຖາ­ນີ​ປັກ​ກິ່ງ​ສາຍ​ເໜືອ ແລະ ສະ­ຖາ­ນີ​ທຽນ​ຈິນ ເຂົ້າ​ຊົມ​ຊ່ວງ​ລົດ­ໄຟ​ຟ້າ​ປັກ​ກິ່ງ ກົມ​ລົດ­ໄຟ​ປັກ​ກິ່ງ​ອີກ​ດ້ວຍ.

ຂ່າວທີ່ກ່ຽວຂ້ອງ