ສ້າງຄວາມເຂັ້ມແຂງວຽກງານຕ້ານການຄ້າມະນຸດ

505 13 ກ.ຍ. 2018 ຂ່າວໜ້າ​ໜຶ່ງ

    ສູນ​ກາງ​ສະ­ຫະ­ພັນ​ກຳ­ມະ­ບານ​ລາວ ຮ່ວມ​ກັບ​ສະ­ຫະ­ພັນ​ກຳ­ມະ­ບານ​ແຂວງ​ໄຊ​ສົມ­ບູນ ຈັດ​ກອງ​ປະ­ຊຸມ​ສ້າງ​ຄວາມ​ເຂັ້ມ­ແຂງ​ໃຫ້​ພະ­ນັກ­ງານ​ກຳ­ມະ­ບານ 6 ແຂວງ​ພາກ​ກາງ ກ່ຽວ​ກັບ​ວຽກ​ງານ​ການ​ຕ້ານ​ການ​ຄ້າ​ມະ­ນຸດ ຂຶ້ນ​ວັນ​ທີ 10-12 ກັນ­ຍາ 2018 ໂດຍ​ເປັນ​ປະ­ທານ​ຂອງ​ທ່ານ ສີ​ມູນ ອຸ່ນ​ລາ­ສີ ຮອງ​ປະ­ທານ​ສູນ​ກາງ​ສະ­ຫະ­ພັນ​ກຳ­ມະ­ບານ​ລາວ ມີ​ທ່ານ ເນັ່ງ​ຢ່າງ ໃຈ​ຫວັງ​ໝັ້ນ ປະ­ທານ​ສະ­ຫະ­ພັນ​ກຳ­ມະ­ບານ​ແຂວງ​ໄຊ​ສົມ­ບູນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ​ມະ​ນາ​ຄັ້ງ​ນີ້ ໄດ້​ຮັບ​ຟັງ​ສະ­ພາບ​ການ­ເຄື່ອນ­ໄຫວ​ສະ­ກັດ​ກັ້ນ​ຕ້ານ​ການ​ຄ້າ​ມະ­ນຸດ​ຢູ່​ໃນ​ໂລກ ແລະ ຢູ່​ລາວ ການ​ດຳ­ເນີນ​ຄະ­ດີ​ຕໍ່​ຜູ້​ກະ­ທຳ​ຜິດ ແລະ ຊ່ວຍ­ເຫຼືອ​ຜູ້​ຖືກ​ເຄາະ​ຮ້າຍ​ຂອງ​ການ​ຄ້າ​ມະ­ນຸດ ປົກ​ປ້ອງ​ແຮງ​ງານ​ເຄື່ອນ​ຍ້າຍ ແລະ ການ​ເຄື່ອນ​ຍ້າຍ​ທີ່​ປອດ​ໄພ ຕິດ​ພັນ​ກັບ​ການ​ຄ້າ​ມະ­ນຸດ ບັນ­ດາ​ນິ­ຕິ​ກຳ​ລຸ່ມ​ກົດ­ໝາຍ​ວ່າ​ດ້ວຍ​ການ​ຄ້າ​ມະ­ນຸດ ດຳ­ລັດ ຄຳ​ສັ່ງ ຄຳ​ແນະ­ນຳ ແລະ ບັນ­ດາ​ຂໍ້​ຕົກ­ລົງ​ຂອງ​ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ຕ້ານ​ການ​ຄ້າ​ມະ­ນຸດ​ແຫ່ງ​ຊາດ ສິດ​ຂອງ​ພົນ­ລະ­ເມືອງ ກຳ­ມະ­ກອນ ແລະ ຜູ້​ຖືກ​ເຄາະ​ຮ້າຍ​ຈາກ​ການ​ຄ້າ​ມະ­ນຸດ ຜົນ​ປະ­ໂຫຍດ ແລະ ການ​ປົກ​ປ້ອງ​ຜົນ​ປະ­ໂຫຍດ​ຂອງ​ຜູ້​ອອກ­ແຮງ​ງານ ການ​ປັບ­ປຸງ​ສາຍ​ພົວ­ພັນ​ແຮງ​ງານ ຖື​ເອົາ​ການ​ສ້າງ­ສັນ​ຍາ​ແຮງ​ງານ​ລວມ​ໝູ່​ເປັນ​ຫຼັກ­ການ ດຳ­ລັດ​ວ່າ​ດ້ວຍ​ການ​ແກ້​ໄຂ​ຂໍ້​ຂັດ​ແຍ່ງ​ແຮງ​ງານ ແລະ ແບບ​ແຜນ­ການ­ເຄື່ອນ­ໄຫວ​ຂອງ​ກຳ­ມະ­ບານ​ແຂວງ​ຕໍ່​ວຽກ​ງານ​ການ​ຄ້າ​ມະ­ນຸດ.

    ທ່ານ ສີ​ມູນ ອຸ່ນ​ລາ­ສີ ກ່າວ​ວ່າ: ການ​ຄ້າ​ມະ­ນຸດ ແມ່ນ​ອາ​ຊະ​ຍາ​ກຳ​ຂ້າມ​ຊາດ​ທີ່​ຮ້າຍ​ແຮງ ເປັນ​ການ​ລະ­ເມີດ​ສິດ­ທິ​ຄວາມ​ເປັນ​ມະ­ນຸດ​ຂອງ​ບຸກ­ຄົນ ເປັນ​ປາ­ກົດ­ການ​ຫຍໍ້­ທໍ້ ແລະ ສົ່ງ​ຜົນ​ສະ­ທ້ອນ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເພື່ອ​ເປັນ​ການ​ໂຄ­ສະ­ນາ​ເຜີຍ­ແຜ່​ກ່ຽວ​ກັບ​ການ​ຄ້າ​ມະ­ນຸດ​ໃຫ້​ສະ​ມະ​ຊິກ​ກຳ­ມະ­ບານ​ຮັບ​ຮູ້ ແລະ ເຂົ້າ­ໃຈ​ຢ່າງ​ເລິກ­ເຊິ່ງ​ກ່ຽວ​ກັບ​ລະ­ບຽບ​ການ​ຕ່າງໆ ເພື່ອ​ເປັນ​ການ​ຕ້ານ ແລະ ສະ­ກັດ​ກັ້ນ ຕິດ­ຕາມ​ກວດ­ກາ ປົກ​ປ້ອງ​ສິດ ແລະ ຜົນ​ປະ­ໂຫຍດ​ອັນ​ຊອບ​ທຳ​ຂອງ​ສະ­ມາ­ຊິກ​ກຳ­ມະ­ບານ ແລະ ຊາວ​ຜູ້​ອອກ­ແຮງ​ງານ ເພື່ອ​ບໍ່​ໃຫ້​ຊາວ​ຜູ້​ອອກ­ແຮງ​ງານ​ຕົກ​ເປັນ​ເຫຍື່ອ ຫຼື ຖືກ​ເຄາະ​ຮ້າຍ​ຈາກ​ການ​ຄ້າ​ມະ­ນຸດ ເຮັດ​ໃຫ້​ບັນ­ຫາ​ທີ່​ເກີດ​ຈາກ​ການ­ເຄື່ອນ­ໄຫວ​ດ້ານ​ແຮງ​ງານ​ໄດ້​ຮັບ​ການ​ປ້ອງ​ກັນ ແລະ ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ