ເກີດ​ອຸບັດເຫດ​ເຮືອບິນ​ຕົກ​ຢູ່​ໃນ​ເນ​ປານ ແລະ ຊູ​ດານ​ໃຕ້

261 11 ກ.ຍ. 2018 ຂ່າວຕ່າງປະເທດ
ເກີດ​ອຸບັດເຫດ​ເຮືອບິນ​ຕົກ​ຢູ່​ໃນ​ເນ​ປານ ແລະ ຊູ​ດານ​ໃຕ້

     ຂ່າວສານ​ກຽວ​ໂດ ຂອງ​ຍີ່ປຸ່ນ ລາຍ​ງານ​ເມື່ອ​ວັນ​ທີ 8 ກັນຍາ​ວ່າ ມີ​ຜູ້​ເສຍ​ຊີວິດ 6 ຄົນ (ໃນ​ນັ້ນ​ເປັນ​ຊາວ​ຍີ່ປຸ່ນ 1 ຄົນ) ແລະ ​ບາດເຈັບ​ອີກ 1 ຄົນ ຢູ່​ໃນ​ເຫດການ​ເຮືອບິນ​ເອ​ລີ​ກອບ​ແຕ​ລຳ​ໜຶ່ງ ປະສົບ​ເຫດ​ຕົກ ຢູ່​ໃນ​ເຂດ​ຊານເມືອງ​ນະຄອນຫຼວງ ກັດ​ມັນ​ດຸ ຂອງ​ເນ​ປານ.

    ຂ່າວ​ແຈ້ງວ່າ ໃນ​ຂະນະ​ທີ່​ບິນ​ຈາກ​ເມືອງ ກໍ​ຄາ ໄປ​ຍັງ​ກັດ​ມັນ​ດຸ ເຮືອບິນ​ດັ່ງກ່າວ ຊຶ່ງ​ບັນທຸກ ຜູ້ໂດຍສານ​ລວມ 7 ຄົນ ໄດ້​ບິນ​ໄປ​ເກາະ​ເອົາ​ຕົ້ນໄມ້ ແລະ​ຕົກລົງ​ໃນ​ເຂດ​ໂນນ​ພູ​ຢູ່​ໃນ​ປ່າ ຫ່າງ​ຈາກ​ນະຄອນຫຼວງ​ກັດ​ມັນ​ດຸ ປະມານ 50​ ກມ. ໃນ​ອຸບັດເຫດ​ເທື່ອ​ນີ້ ມີ​ຜູ້​ເອົາ​ຊີວິດ​ລອດ​ມາ​ໄດ້ ພຽງ 1 ຄົນ ຊຶ່ງ​ເປັນ​ແມ່ຍິງ ແຕ່​ກໍ​ໄດ້​ຮັບ​ບາດເຈັບ​ໜັກ.

    ຕໍ່​ມາ ເຈົ້າ​ໜ້າທີ່​ຂອງ​ຊູ​ດານ​ໃຕ້ ຢັ້ງຢືນ​ໃນ​ວັນ​ທີ 9 ກັນຍາ​ນີ້​ວ່າ ມີ​ຜູ້​ເສຍ​ຊີວິດ 19 ຄົນ  (ໃນ​ນີ້​ລວມ​ທັງ​ນັກ​ບິນ​ທີ່​ບັງຄັບ​ເຮືອບິນ ແລະ ນັກ​ບິນ​ສຳຮອງ ລວມ​ຢູ່​ນຳ) ແລະ ມີ​ພຽງ 4 ຄົນ​ຖືກ​ຄົ້ນ​ພົບ ວ່າ​ຍັງ​ມີ​ຊີວິດ ຢູ່​ໃນ​ອຸບັດເຫດ​ເຮືອບິນ​ຕົກ​ຢູ່​ໃນ​ເຂດ ພາກ​ກາງ​ຊູ​ດານ​ໃຕ້.

    ເຈົ້າ​ໜ້າທີ່​ໃນ​ທ້ອງຖິ່ນ​ໃຫ້​ຮູ້​ວ່າ ເຮືອບິນ​ການ​ຄ້າ​ດັ່ງກ່າວ ບັນທຸກ​ຜູ້ໂດຍສານ 23 ຄົນ ໄດ້​ປະສົບ​ເຫດ​ຕົກລົງ​ໃນ​ແມ່ນ້ຳ ຢູ່​ໃນ​ເມືອງ ຢີ​ຣອນ ໃນ​ຂະນະ​ທີ່​ພວມ​ບິນ​ລົງ​ຈອດ ທ່າມກາງ​ອາກາດ ມີ​ໝອກ​ຕົກ​ຫຼາຍ. ໃນ​ຈຳນວນ​ຜູ້​ທີ່​ເອົາ​ຊີວິດ​ລອດ​ມາ​ໄດ້ 4 ຄົນ​ນັ້ນ ມີ​ເດັກນ້ອຍ​ລວມ​ຢູ່​ນຳ 2 ຄົນ ແລະ​ຊາວ​ອີ​ຕາ​ລີ 1 ຄົນ ຊຶ່ງ​ຢູ່​ໃນ​ອາການ​ບາດເຈັບ​ສາຫັດ.

 

ຂ່າວທີ່ກ່ຽວຂ້ອງ