ຂ່າວຫຼ້າສຸດ

ອັງກິດ​ຍົກເລີກ​ແຜນການ​ຖອນ​ທະຫານ​ອອກ​ຈາກ​ເຢຍ​ລະ​ມັນ

201 11 ກ.ຍ. 2018 ຂ່າວຕ່າງປະເທດ
ອັງກິດ​ຍົກເລີກ​ແຜນການ​ຖອນ​ທະຫານ​ອອກ​ຈາກ​ເຢຍ​ລະ​ມັນ

    ສື່ສານ​ໃນ​ອັງກິດ ລາຍ​ງານ​ເມື່ອ​ວັນ​ທີ 9 ກັນຍາ​ນີ້​ວ່າ ທ່ານ ເກ​ວິນ ວິນ​ລຽມ​ສັນ ລັດຖະມົນຕີ ປ້ອງ​ກັນ​ປະເທດ​ອັງກິດ ໄດ້​ຊີ້​ນຳ​ໃຫ້​ເຈົ້າ​ໜ້າທີ່​ອັງກິດ​ຫຼາຍ​ຮ້ອຍ​ຄົນ ສືບຕໍ່​ຢູ່​ໃນ​ເຢຍ​ລະ​ມັນ​ຕໍ່​ໄປ ທ່າມກາງ​ທີ່​ກ່ອນ​ໜ້າ​ນັ້ນ ໄດ້​ມີ​ແຜນການ​ຖອນ​ທະຫານ​ໄປ​ແລ້ວ.

   ໜັງສືພິມ Sunday Times ໃຫ້​ຮູ້​ວ່າ ໃນ​ເບື້ອງ​ຕົ້ນ ອັງກິດ​ມີ​ແຜນການ​ຖອນ​ທະຫານ ຂອງ​ຕົນ​ທັງ​ໝົດ​ອອກ​ຈາກ​ເຢຍ​ລະ​ມັນ ກ່ອນ​ປີ 2020. ເຖິງ​ຢ່າງໃດ​ກໍ​ຕາມ ທ່ານ ເກ​ວິນ ວິນ​ລຽມ​ສັນ ໄດ້​ສະເໜີ​ໃຫ້​ພົນທະຫານ​ອັງກິດ 200 ຄົນ ພ້ອມ​ດ້ວຍ​ຄອບຄົວ​ຂອງ​ພວກ​ເຂົາ ໃຫ້​ສືບຕໍ່​ຢູ່​ໃນ ເຢຍ​ລະ​ມັນ ຕໍ່​ໄປ ຫຼັງ​ກຳນົດ​ເວລາ​ດັ່ງກ່າວ. ບັນດາ​ພົນທະຫານ​ອັງກິດ ທີ່​ບໍ່​ໄດ້​ກັບ​ຄືນ​ປະເທດ​ນັ້ນ ຕ່າງ​ກໍ​ເປັນ​ທະຫານ​ຊ່າງ​ແສງ.

     ຄຽງ​ຄູ່​ກັນ​ນັ້ນ ອັງກິດ​ກໍ​ຈະ​ຍັງ​ຄົງ​ຮັກສາ​ຖານ​ທັບ ເຊນ​ເນ​ລາ​ເກີ ຢູ່​ໃນ​ເຂດ​ທິດຕາເວັນຕົກ ສ່ຽງ​ເໜືອ​ເຢຍ​ລະ​ມັນ ເອົາ​ໄວ້​ເພື່ອ​ຮັບ​ໃຊ້​ການ​ຝຶກ​ງານ​ໃນ​ການ​ສູ້​ຮົບ​ຂອງ​ລົດ​ຖັງ ແລະ​ການ​ຝຶກ​ຊ້ອມ ຂະໜາດ​ໃຫຍ່. ໃນ​ຂະນະ​ດຽວ​ກັນ ອັງກິດ​ກໍ​ຍັງ​ຄົງ​ຮັກສາ​ພື້ນຖານ​ແຫ່ງ​ໜຶ່ງ ທີ່​ຈັດ​ສັນ​ໃຫ້​ແກ​ລົດ ຫຸ້ມ​ເກາະ ຢູ່​ໃນ​ນະຄອນ ມົນ​ເຈງ​ລັດ​ແບກ ເອົາ​ໄວ້​ອີກ​ດ້ວຍ.

    ໃນ​ຂະນະ​ດຽວ​ກັນ ກອງທັບ​ຂອງ ສ ອາ​ເມ​ຣິ​ກາ ກໍ​ໄດ້​ແຈ້ງ​ອອກ​ມາ​ເມື່ອ​ວັນ​ທີ 7 ກັນຍາ ທີ່​ຜ່ານ​ມາ​ວ່າ ຈະ​ຜັນ​ຂະຫຍາຍ​ທະຫານ​ເພີ່ມ​ເຕີມ 1.500 ຄົນ ໄປ​ຍັງ​ເຢຍ​ລະ​ມັນ ໂດຍ​ບໍ່​ເອົາ​ຫົວຊາ ຕໍ່​ການ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ຈົ່ມ​ວ່າ​ເຢຍ​ລະ​ມັນ​ໃຊ້​ຈ່າຍ​ໜ້ອຍ​ເກີນ​ໄປ ໃຫ້​ແກ່​ວຽກ​ງານ​ປ້ອງ​ກັນ​ຊາດ. ແຈ້ງ​ການ​ດັ່ງກ່າວ​ລະບຸ​ວ່າ ພວກ​ທະຫານ​ຂອງ ສ ອາ​ເມ​ຣິ​ກາ ທີ່​ໄດ້​ຮັບ​ການ​ເພີ່ມ​ເຕີມ​ນັ້ນ ຈະ​ໄປ​ເຖິງ​ເຢຍ​ລະ​ມັນ ໃນ​ເດືອນ​ກັນຍາ ປີ 2020 ເພື່ອ​ເຂົ້າ​ຮ່ວມ​ໃນ​ໜ້າທີ່ ຮ່ວມ​ກັບ​ທະຫານ​ຂອງ ສ ອາ​ເມ​ຣິ​ກາ 33.000 ກວ່າ​ຄົນ ທີ່​ໄດ້​ປະຈຳການ​ຢູ່​ໃນ​ເຢຍ​ລະ​ມັນ ມາ​ກ່ອນ​ແລ້ວ.

 

ຂ່າວທີ່ກ່ຽວຂ້ອງ