ພະຍາດ​ອະຫິ​ວາ​ໝູ ລະບາດ​ຢູ່​ໃນ​ຍີ່ປຸ່ນ

271 11 ກ.ຍ. 2018 ຂ່າວຕ່າງປະເທດ
ພະຍາດ​ອະຫິ​ວາ​ໝູ ລະບາດ​ຢູ່​ໃນ​ຍີ່ປຸ່ນ

    ກະຊວງ​ກະສິກຳ​ຂອງ​ຍີ່ປຸ່ນ ຢັ້ງຢືນ​ເມື່ອ​ວັນ​ທີ  ກັນຍາ​ນີ້​ວ່າ ໄດ້​ເກີດ​ການ​ລະບາດ ຂອງ​ພະຍາດ​ອະຫິ​ວາ​ໝູ ຢູ່​ໃນ​ປະເທດ​ນີ້ ພ້ອມ​ກັນ​ນັ້ນ​ກໍ​ໃຫ້​ງົດ​ການ​ສົ່ງ​ອອກ​ຊີ້ນ​ໝູ​ລ້ຽງ ແລະ​ຊີ້ນ​ໝູ​ປ່າ.

    ພະຍາດ​ດັ່ງກ່າວ ຖືກ​ກວດ​ພົບ​ດ້ວຍ​ການ​ຕິດພະຍາດ​ລາຍ​ທຳ​ອິດ ຢູ່​ໃນ​ນະຄອນ​ກີ​ຟູ ໃນ​ແຂວງ​ກີ​ຟູ (ພາກ​ກາງ​ຍີ່ປຸ່ນ) ຊຶ່ງ​ມີ​ຄວາມ​ແຕກ​ຕ່າງ​ກັບ​ພະຍາດ​ອະຫິ​ວາ​ສາຍ​ພັນ​ອາ​ຟະ​ຣິກ​ກາ ທີ່​ເກີດ​ການ​ແພ່​ລາມ​ຢູ່​ໃນ​ຈີນ.

    ກະຊວງ​ກະສິກຳ​ຍີ່ປຸ່ນ ຢືນຢັນ​ວ່າ ພະຍາດ​ດັ່ງກ່າວ ເກີດ​ຂຶ້ນ​ຢູ່​ໃນ​ໝູ​ລ້ຽງ ແລະ​ໝູ​ປ່າ​ເທົ່າ​ນັ້ນ ໂດຍ​ທີ່​ບໍ່​ແພ່​ລາມ​ໄປ​ຍັງ​ຄົນ.

    ອຳນາດ​ການ​ປົກຄອງ​ແຂວງ​ກີ​ຟູ ໃຫ້​ຮູ້​ວ່າ​ໝູ​ໂຕ​ໜຶ່ງ​ໄດ້​ເກີດ​ຕາຍ​ກະທັນຫັນ ຢູ່​ໃນ​ຟາມ​ແຫ່ງ​ໜຶ່ງ ໃນ​ແຂວງ​ນີ້ ເມື່ອ​ວັນ​ທີ 3 ກັນຍາ​ທີ່​ຜ່ານ​ມາ. ຜ່ານ​ການ​ກວດ​ຈາກ​ອຳນາດ​ການ​ປົກຄອງ​ສູນ​ກາງ ໄດ້​ປະກົດ​ມີ​ຜົນ​ເປັນ​ບວກ​ກັບ​ໄວ​​ຣັສ​ອະຫິ​ວາ​ໝູ. ຫຼັງ​ຈາກ​ນັ້ນ​ກໍ​ມີ​ໝູ​ອີກ​ປະມານ 80 ໂຕ ໄດ້​ຕາຍ​ໄປ ໃນ​ຂະນະ​ທີ່​ມີ​ໝູ​ຕື່ມ​ອີກ 610 ໂຕ ຖືກ​ນຳໄປ​ຂ້າ​ທຳລາຍ ເພື່ອ​ສະກັດ​ກັ້ນ​ການ​ແພ່​ລາມ​ຂອງ​ພະຍາດ.

    ພະຍາດ​ອະຫິ​ວາ​ໝູ ເປັນ​ພະຍາດ​ຕິດຕໍ່​ທີ່​ອັນຕະລາຍ​ຢູ່​ໃນ​ໝູ ໂດຍ​ມີ​ຈັງ​ວະ​ການ​ຕິດຕໍ່​ໄວ ແລະ​ມີ​ອັດຕາ​ສ່ວນ​ການ​ຕາຍ​ສູງ. ໄວ​​ຣັສ​ທີ່​ພາໃຫ້​ເກີດ​ພະຍາດ​ດັ່ງກ່າວ ຄົງ​ຢູ່​ດົນ​ໃນ​ສິ່ງແວດລ້ອມ ສາມາດ​ມີ​ຊີວິດ​ຫຼາຍ​ວັນ​ຢູ່​ໃນ​ຂີ້​ໝູ ແລະ​ ຄົງ​ຢູ່​ເປັນ​ເວລາ​ຫຼາຍ​ເດືອນ​ຫາ​ຫຼາຍ​ປີ ຢູ່​ໃນ​ຊີ້ນ​ແຊ່​ແຂງ. ແຕ່​ເຖິງ​ຢ່າງໃດ​ກໍ​ຕາມ ພະຍາດ​ດັ່ງກ່າວ ບໍ່​ແພ່​ລາມ​ໄປ​ສູ່​ຄົນ.

    ນີ້​ເປັນ​ເທື່ອ​​ທຳ​ອິດ ທີ່​ກວດ​ພົບ​ກໍລະນີ​ຕິດພະຍາດ​ດັ່ງກ່າວ​ຢູ່​ໃນ​ຍີ່ປຸ່ນ ນັບ​ແຕ່​ພະຍາດ​ດັ່ງກ່າວ ເກີດ​ການ​ລະບາດ​ຢູ່​ໃນ​ແຂວງ ກູ​ມາ​ໂມ​ໂຕ ເມື່ອ​ປີ 1992 ເປັນຕົ້ນ​ມາ.

 

ຂ່າວທີ່ກ່ຽວຂ້ອງ