ແຈກ ມາ ປະກາດ​ຖອນ​ອອກ​ໄປ​ຈາກ​ກຸ່ມ​ບໍລິສັດ ອາລີ​ບາ​ບາ

246 11 ກ.ຍ. 2018 ຂ່າວຕ່າງປະເທດ
ແຈກ ມາ ປະກາດ​ຖອນ​ອອກ​ໄປ​ຈາກ​ກຸ່ມ​ບໍລິສັດ ອາລີ​ບາ​ບາ

   ແຈກ ມາ (Jack Ma) ຊຶ່ງ​ເປັນ​ມະຫາ​ເສດຖີ ຜູ້​ກໍ່​ຕັ້ງ​ກຸ່ມ​ບໍລິສັດ​ອາລີ​ບາ​ບາ  (Alibaba) ປະກາດ​ວ່າ​ຈະ​ອອກ​ໄປ​ຈາກ ກຸ່ມ​ບໍລິສັດ​ການ​ຄ້າ​ເອ​ເລັກ​ໂຕຣ​ນິກ​ນີ້ (ຂອງ​ຈີນ) ໃນ​ວັນ​ທີ 10 ກັນຍາ​ນີ້ ເພື່ອ​ໃຊ້​ເວລາ​ທັງ​ໝົດ​ໃຫ້​ແກ່​ຄວາມ​ຫວັງ​ດ້ານ​ການ​ກຸສົນ​ທີ່​ສຸມ​ໃສ່​ດ້ານ​ການ​ສຶກ​ສາ.

    ກ່ອນ​ທີ່​ຈະ​ສ້າງຕັ້ງ Alibaba ຂຶ້ນ​ມາ​ໃນ​ປີ 1999 ແລະ ສ້າງຕັ້ງ​ກຸ່ມ​ບໍລິສັດ​ການ​ຄ້າ​ເອ​ເລັກ​ໂຕຣ​ນິກ ທີ່​ມີ​ມູນ​ຄ່າ​ຫຼາຍ​ຕື້​ໂດ​ລາ​ສະຫະລັດ​ນັ້ນ ແຈກ ມາ ເປັນ​ຄູ​ສອນ​ພາສາ​ອັງກິດ. ມູນ​ຄ່າ​ຫຸ້ນ​ຂອງ Alibaba ໄລ່​ຮອດ​ເວລາ​ປິດ​ການ​ຊື້​ຂາຍ​ໃນ​ວັນ​ທີ 7 ກັນຍາ​ນີ້ ຢູ່​ທີ່ 420,8 ຕື້​ໂດ​ລາ​ສະຫະລັດ.

    ແຈກ ມາ ກ່າວ​ຕໍ່​ຜູ້​ສື່​ຂ່າວ​ຂອງ​ໜັງສືພິມ The New York Times ວ່າ​ເຂົາ​ມີ​ແຜນການ​ອອກ​ໄປ​ຈາກ​ອາລີ​ບາ​ບາ ໂດຍ​ໃຫ້​ທັດສະນະ​ວ່າ ການ​ຕັດສິນ​ນີ້​ເປັນ “ການ​ເລີ່ມ​ຕົ້ນ​ຂອງ​ໄລຍະ​ໜຶ່ງ” ແທນ​ທີ່​ຈະ​ເປັນ​ການ​ສິ້ນ​ສຸດ.

    ຫຼ້າ​ສຸດ Alibaba ແຈ້ງ​ໃຫ້​ຮູ້​ໃນ​ວັນ​ທີ 10 ກັນຍາ​ນີ້​ວ່າ ດາ​ນຽນ ຊາງ (Daniel Zhang) ຜູ້ອຳນວຍການ​ຝ່າຍ​ບໍລິຫານ​ຂອງ Alibaba ຈະ​ເປັນ​ຜູ້​ສືບ​ທອດ​ໜ້າທີ່​ຂອງ ແຈກ ມາ ໃນ​ການ​ເປັນ ປະທານ​ສະພາ​ຄຸ້ມ​ຄອງ​ບໍລິຫານ ເລີ່ມ​ແຕ່​ວັນ​ທີ 10 ກັນຍາ 2019 ເປັນຕົ້ນ​ໄປ. ໃນ​ຂະນະ​ດຽວ​ກັນ ແຈກ ມາ ຈະ​ສືບຕໍ່​ຢູ່​ໃນ​ຕຳແໜ່ງ​ປະທານ​ຝ່າຍ​ບໍລິຫານ​ຂອງ Alibaba ໄປ​ອີກ 12 ເດືອນ ເພື່ອ​ປະຕິບັດ​ຂັ້ນ​ຕອນ​ຂ້າມ​ຜ່ານ​ໃນ​ການ​ໂອນ​ຕຳແໜ່ງ​ປະທານ​ໃຫ້​ແກ່​ທ່ານ ຊາງ ໄດ້​ເປັນ ຢ່າງ​ດີ.

   ແຈກ ມາ ມີອາຍຸ 54 ປີພໍດີໃນວັນທີ 10 ກັນຍານີ້. ປັດຈຸບັນນີ້ ແຈກ ມາ ມີຊັບສິນເປັນມູນຄ່າ 36,6 ຕື້ໂດລາສະຫະລັດ ຕາມການຕິດໄລ່ຂອງ Forbes.

 

ຂ່າວທີ່ກ່ຽວຂ້ອງ