ສ ເກົາຫຼີ ຕິດຕາມ​ຢ່າງ​ເຂັ້ມ​ງວດ​ກັບ​ຜູ້​ທີ່​ສຳ​ພັດ​ກັບ​ຄົນ​ເຈັບ​ທີ່​ຕິດ MERS

    ເພື່ອ​ສະກັດ​ກັ້ນ​ຕໍ່​ການ​ແພ່​ລາມ ຂອງ​ໄວ​​ຣັສ ທີ່​ມີ​ອາການພະຍາດ​ທາງ​ເດີນ​ຫາຍໃຈ​ສາຍ​ພັນ​ຕາເວັນ​ອອກ​ກາງ  (MERS - CoV) ນັ້ນ​ລັດຖະບານ ສ ເກົາຫຼີ​ໄດ້​ຕົກລົງ​ນຳ​ໃຊ້​ມາດ​ຕະການ​ຕ່າງໆ ເຊັ່ນ “ຕິດຕາມ​ຢ່າງ​ຕັ້ງໜ້າ” ແລະ​ ຈັດ​ໃຫ້​ພະນັກງານ​ຮັບຜິດຊອບ​ສະເພາະ ເພື່ອ​ເພີ່ມ​ທະວີ ການ​ຄວບ​ຄຸມ​ຕໍ່​ບັນດາ​ຜູ້​ທີ່​ສຳ​ພັດ​ກັບ​ຄົນ​ເຈັບ​ທີ່​ຕິດ MERS ເປັນ​ປະຈຳ​ໃນ​ແຕ່​ລະ​ວັນ.

    ທ່ານ ປາກ ນຶງ​ຮູ ລັດຖະມົນຕີ​ສາທາລະນະ​ສຸກ ແລະ​ ສະຫວັດດີ​ການ ຂອງ ສ ເກົາຫຼີ ໄດ້​ປະກາດ​ແຜນການ​ເພີ່ມ​ທະວີ​ການ​ຕິດຕາມ​ດັ່ງກ່າວ ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ເມື່ອ​ວັນ​ທີ 9 ກັນຍາ​ນີ້ ກ່ຽວ​ກັບ​ຜົນ​ຂອງ​ການ​ປະຊຸມ​ສຸກ​ເສີນ​ຂອງ​ລັດຖະບານ ພາຍ​ໃຕ້​ການ​ເປັນ​ປະທານ​ຂອງ ນາຍົກລັດຖະມົນຕີ ລີ ນັກ​ຢອນ.

    ທ່ານ ປາກ ນຶງ​ຮູ ເວົ້າ​ວ່າ ສຳລັບ​ຜູ້​ທີ່​ສຳ​ພັດ​ກັບ​ຄົນ​ເຈັບ ແຕ່​ຄວາມ​ຖີ່​ຂອງ​ການ​ສຳ​ພັດ ບໍ່​ສູງ ເຊັ່ນ​ຄົນ​ທີ່​ເດີນທາງ​ຮ່ວມ​ຖ້ຽວ​ບິນ ແມ່ນ​ລັດຖະບານ​ຈະ​ຈັດ​ໃຫ້​ພະນັກງານ​ຕິດຕາມ​ເປັນ​ການ​ສະເພາະ ເພື່ອ​ໃຫ້​ກຳນົດ​ໃຫ້​ຮູ້​ເປັນ​ການ​ໄວ ວ່າ​ຕິດພະຍາດ​ຫຼື​ບໍ່.

    ເມື່ອ​ວັນ​ທີ 8 ກັນຍາ ຜູ້​ຊາຍ​ຊາວ ສ ເກົາຫຼີ ຄົນ​ໜຶ່ງ ອາຍຸ 61 ປີ ໄດ້​ຖືກ​ກວດ​ພົບ​ວ່າ ຕິດ​ໄວ​​ຣັສ MERS-CoV ຫຼັງ​ຈາກ​ການ​ໄປ​ເຮັດ​ວຽກ ເປັນ​ເວລາ​ດົນ​ຢູ່​ໃນ​ກູ​ເວດ. ນີ້​ເປັນ​ຄົນ​ເຈັບ ລາຍ​ທຳ​ອິດ​ຢູ່​ໃນ ສ ເກ​​ົ​ຟາ​ຫຼີ ຫຼັງ​ຈາກ​ພະຍາດ​ດັ່ງກ່າວ ເກີດ​ການ​ລະບາດ​ເມື່ອ​ເດືອນ​ກໍລະກົດ ປີ 2015 ເປັນຕົ້ນ​ມາ ຊຶ່ງ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 38 ຄົນ. ບັນດາ​ອົງ​ກາ​ທີ່​ກ່ຽວຂ້ອງ​ຂອງ ສ ເກົາຫຼີ ພວມ​ດຳເນີນ​ການ​ກວດກາ​ຕິດຕາມ​ຢ່າງ​ຖີ່​ຖ້ວນ ຕິດຕາມ ແລະ​ແຍກ​ບໍລິເວນ ສຳລັບ​ຜູ້​ທີ່​ສຳ​ພັດ ກັບ​ຄົນ​ເຈັບ.

    MERS-CoV ເປັນ​ພະຍາດ​ຕິດເຊື້ອ​ໃນ​ປອດ ທີ່​ເກີດ​ຈາກ​ໄວ​​ຣັສ coronavirus. ພະຍາດ​ດັ່ງກ່າວ​ປະກົດ​ຂຶ້ນ​ເປັນ​ເທື່ອ​ທຳ​ອິດ ຢູ່​ໃນ​ອາ​ຣາ​ບີ ຊາ​ອຸ​ດິດ ເມື່ອ​ປີ 2012 ເຮັດ​ໃຫ້​ມີ​ຜູ້​ຕິດ ພະຍາດ​ກວ່າ 1.600 ກໍລະນີ ໂດຍ​ມີ​ອັດຕາ​ສ່ວນ​ການ​ເສຍ​ຊີວິດ​ທີ່ 36%. MERS-CoV ມີ​ຄວາມ​ຄ້າຍຄື​ກັບ​ອາການ​ອັກເສບ​ລະບົບ​ຫາຍໃຈ​ຮຸນ​ແຮງ (SARS) ຊຶ່ງ​ຍັງ​ບໍ່​ມີ​ວັກ​ແຊງ​ປ້ອງ​ກັນ. ໄວ​​ຣັສ​ທີ່​ອັນຕະລາຍ​ນີ້ ສາມາດ​ຕິດຕໍ່​ໄດ້​ຈາກ​ສັດ​ສູ່​ຄົນ ຫຼື​ລະຫວ່າງ​ຄົນ​ກັບ​ຄົນ ຍ້ອນ​ການ​ສຳ​ພັດ.