ຮອງນາຍົກ ຕິດຕາມຜົນເສຍຫາຍຈາກໄພນ້ຳຖ້ວມ ຢູ່ແຂວງຫຼວງພະບາງ

344 11 ກ.ຍ. 2018 ຂ່າວໜ້າ​ໜຶ່ງ

    ພາຍ­ຫຼັງ​ສຳ­ເລັດ​ການ­ເຄື່ອນ­ໄຫວ​ຕິດ­ຕາມ ແລະ ແກ້​ໄຂ​ໄພ­ພິ­ບັດ​ນ້ຳ​ຖ້ວມ​ຢູ່​ແຂວງ​ຈຳ­ປາ​ສັກ ແລະ ແຂວງ​ອັດ​ຕະ​ປື ວັນ​ທີ 9 ກັນ­ຍາ 2018 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ຄະ­ນະ ກໍ່​ໄດ້​ສືບ­ຕໍ່​ຕິດ­ຕາມ ແລະ ແກ້​ໄຂ​ໄພ­ພິ­ບັດ​ທີ່​ເກີດ​ຂຶ້ນ​ຢູ່​ແຂວງ​ຫຼວງ​ພະ​ບາງ ໂດຍ​ມີ​ທ່ານ ຄຳ​ຂັນ ຈັນ­ທະ​ວີ​ສຸກ ເຈົ້າ­ແຂວງ​ຫຼວງ​ພະ​ບາງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ໃຫ້­ການ​ຕ້ອນ­ຮັບ.

    ທ່ານ​ຮອງ​ນາ­ຍົກ ພ້ອມ​ຄະ­ນະ ໄດ້​ເດີນ­ທາງ​ໄປ​ເບິ່ງ​ສະ­ພາບ​ນ້ຳ​ຖ້ວມ​ຢູ່​ບ້ານ​ນາ​ຕານ ນະ­ຄອນ­ຫຼວງ​ພະ​ບາງ ເຊິ່ງ​ອຳ­ນາດ​ການ​ປົກ­ຄອງ​ບ້ານ​ນາ​ຕານ​ໄດ້​ລາຍ​ງານ​ວ່າ: ວັນ​ທີ 29 ສິງ­ຫາ 2018 ໄດ້​ເກີດ​ມີ​ເຫດ­ການ​ນ້ຳ​ໄຫຼ­ຊຸ​ທັ່ງ​ໃສ່​ເຮືອນ ແລະ ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ ເຮັດ​ໃຫ້​ເຮືອນ​ໄດ້​ຮັບ​ຜົນ​ກະ­ທົບ 40 ຫຼັງ ໃນ​ນີ້ ມີ​ເຮືອນ 8 ຫຼັງ​ໄດ້​ຮັບ​ຜົນ​ກະ­ທົບ​ໜັກ ເນື້ອ­ທີ່​ນາ ແລະ ເນື້ອ­ທີ່​ປູກ​ພືດ​ເສຍ​ຫາຍ 10 ກວ່າ​ເຮັກ­ຕາ ນອກ​ນີ້​ຍັງ​ມີ​ສັດ­ລ້ຽງ ພາ­ຫະ­ນະ ແລະ ອຸ­ປະ­ກອນ​ທຳ​ການ​ຜະ­ລິດ ໄດ້​ຮັບ​ຜົນ​ເສຍ​ຫາຍ​ຈຳ­ນວນ​ຫຼວງ­ຫຼາຍ ຕໍ່​ເຫດ­ການ​ທີ່​ເກີດ​ຂຶ້ນ ອຳ­ນາດ​ການ​ປົກ­ຄອງ​ແຂວງ ເມືອງ ກໍ່​ຄື ອຳ­ນາດ​ການ​ປົກ​ບ້ານ​ນາ​ຕານ ໄດ້​ສຸມ​ກຳ­ລັງ​ເຂົ້າ​ໃນ​ການ​ຊ່ວຍ­ເຫຼືອ​ສຸກ​ເສີນ​ເບື້ອງ​ຕົ້ນ ໂດຍ​ໄດ້​ຍົກ­ຍ້າຍ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ໄປ​ຢູ່​ບ່ອນ​ປອດ​ໄພ ພ້ອມ​ນີ້ ຍັງ​ໄດ້​ສະ­ໜອງ​ເຂົ້າ­ສານ ເຄື່ອງ­ນຸ່ງ​ຫົ່ມ ຢາ​ປົວ​ພະ­ຍາດ ແລະ ອື່ນໆ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຕື່ມ​ອີກ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ເນັ້ນ​ໃຫ້​ອຳ­ນາດ​ການ​ປົກ­ຄອງ​ແຂວງ ນະ­ຄອນ ກໍ່​ຄື ອຳ­ນາດ​ການ​ປົກ­ຄອງ​ບ້ານ​ນາ​ຕານ ສືບ­ຕໍ່​ຕິດ­ຕາມ​ກ່ຽວ​ກັບ​ການ​ປ່ຽນ­ແປງ​ຂອງ​ສະ­ພາບ​ດິນ​ຟ້າ​ອາ­ກາດ​ຢ່າງ​ໃກ້­ຊິດ ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ເອົາ­ໃຈ­ໃສ່​ຊ່ວຍ­ເຫຼືອ​ຜູ້​ທີ່​ໄດ້​ຮັບ​ຜົນ​ກະ­ທົບ ໂດຍ​ສະ­ເພາະ ຜູ້​ເຖົ້າ ແລະ ເດັກ­ນ້ອຍ ສຳ​ຫຼວດ ແລະ ປະ​ເມີນ​ຄວາມ​ເສຍ​ຫາຍ​ທີ່​ເກີດ​ຂຶ້ນ ພ້ອມ​ທັງ​ເອົາ­ໃຈ­ໃສ່​ແຈ້ງ​ເຕືອນ​ຂໍ້​ມູນ​ຂ່າວ­ສານ​ໃຫ້​ປະ­ຊາ­ຊົນ​ໄດ້​ຮັບ​ຮູ້​ຢ່າງ​ທັນ​ການ ສຳ­ຄັນ​ຕ້ອງ​ມີ​ການ​ສ້າງ​ແຜນ​ເພື່ອ​ຮັບ​ມື​ກັບ​ໄພ­ພິ­ບັດ​ທີ່​ອາດ​ຈະ​ເກີດ​ຂຶ້ນ​ໃນ­ຕໍ່­ໜ້າ ເພື່ອ​ເຮັດ​ໃຫ້​ຜົນ​ກະ­ທົບ​ມີ​ໜ້ອຍ​ທີ່​ສຸດ ສືບ­ຕໍ່​ຮັກ­ສາ​ມູນ­ເຊື້ອ​ຄວາມ​ສາ­ມັກ­ຄີ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ເພື່ອ​ຟື້ນ​ຟູ​ໄພ­ພິ­ບັດ​ທີ່​ເກີດ​ຂຶ້ນ​ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ ໂອ­ກາດ​ນີ້ ທ່ານ​ຮອງ​ນາ­ຍົກ​ຍັງ​ໄດ້​ມອບ​ເງິນ 10 ລ້ານ​ກີບ ໃຫ້​ບ້ານ​ນາ​ຕານ ເພື່ອ​ນຳ­ໄປ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ​ພາຍ​ໃນ​ບ້ານ.

    ຈາກ​ນັ້ນ ທ່ານ​ຮອງ​ນາ­ຍົກ ພ້ອມ​ດ້ວຍ​ຄະ­ນະ ກໍ່​ໄດ້​ເດີນ­ທາງ​ໄປ​ເບິ່ງ​ສະ­ພາບ​ຄວາມ​ເສຍ​ຫາຍ​ຂອງ​ສົ້ນ​ຂົວ​ນ້ຳ​ເຊືອງ ທີ່​ມີ​ການ​ຊຸດ​ໂຕ​ລົງ ເຮັດ​ໃຫ້­ການ​ສັນ­ຈອນ​ໄປ-ມາ​ມີ​ຄວາມ​ຫຍຸ້ງ ຕໍ່​ບັນ­ຫາ​ດັ່ງ­ກ່າວ ທ່ານ​ຮອງ​ນາ­ຍົກ​ໄດ້​ຊີ້​ນຳ​ໃຫ້​ຂະ­ແໜງ­ການ​ກ່ຽວ­ຂ້ອງ ກວດ­ກາ​ຄືນ​ຄວາມ​ເສຍ​ຫາຍ ແລະ ສາ­ເຫດ​ຂອງ​ການ​ຊຸດ​ໂຕ ເພື່ອ​ຊອກ​ຫາ​ວິ​ແກ້​ໄຂ​ໃຫ້​ສຳ­ເລັດ​ໂດຍ​ໄວ ປັດ­ຈຸ­ບັນ ຂົວ​ດັ່ງ­ກ່າວ​ໄດ້​ປິດ​ການ​ສັນ­ຈອນ ແລະ ໄດ້​ນຳ​ໃຊ້​ເຮືອ ເພື່ອ​ລຳ­ລຽງ​ຂົນ­ສົ່ງ​ພາ­ຫະ­ນະ ປະ­ຊາ­ຊົນ​ທີ່​ຈະ​ເດີນ­ທາງ​ໄປ-ມາ.

ຂ່າວທີ່ກ່ຽວຂ້ອງ