ຂ່າວຫຼ້າສຸດ

ທ່ານ ບຸນທອງ ຈິດມະນີ ຕິດຕາມສະພາບນ້ຳຖ້ວມ ໃຫ້ກຳລັງໃຈປະຊາຊົນຢູ່ເມືອງທຸລະຄົມ

118 11 ກ.ຍ. 2018 ຂ່າວໜ້າ​ໜຶ່ງ

    ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ແລະ ອົງ­ການ​ກວດ­ກາ​ລັດ­ຖະ­ບານ ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ພ້ອມ​ຄະ­ນະ ລົງ​ຕິດ­ຕາມ​ລະ­ດັບ​ນ້ຳ​ງື່ມ ແລະ ຢ້ຽມ­ຢາມ​ໃຫ້​ກຳ­ລັງ​ໃຈ​ຜູ້​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ຢູ່​ລຽບ​ຕາມ​ສອງ​ຝັ່ງ​ນ້ຳ​ງື່ມ ເມືອງ​ທຸ­ລະ­ຄົມ ແຂວງ​ວຽງ​ຈັນ ໃນ​ວັນ​ທີ 8 ກັນ­ຍາ 2018 ຜ່ານ​ມາ ໂດຍ​ເລີ່ມ​ເດີນ­ທາງ​ດ້ວຍ​ເຮືອ​ຈາກ​ທ່າ­ເຮືອ​ບ້ານ​ທ່າ​ງ່ອນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ-ບ້ານ​ເກິນ ເມືອງ​ທຸ­ລະ­ຄົມ ເພື່ອ​ຕິດ­ຕາມ​ເບິ່ງ​ລະ­ດັບ​ນ້ຳ ຜູ້​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ ເນື້ອ­ທີ່​ການ​ຜະ­ລິດ ສັດ­ລ້ຽງ ທຸ­ລະ​ກິດ ຮ້ານ​ອາ­ຫານ ແລະ ສະ­ຖານ­ທີ່​ທ່ອງ​ທ່ຽວ​ທີ່​ຕັ້ງ​ລຽບ​ຢູ່​ຕາມ​ສອງ​ຝັ່ງ​ນ້ຳ​ງື່ມ.

    ທ່ານ​ຮອງ​ນາ­ຍົກ ແລະ ຄະ­ນະ ໄດ້​ລົງ​ໄປ​ພົບ​ປະ​ໃຫ້​ກຳ­ລັງ​ໃຈ​ປະ­ຊາ­ຊົນ​ບ້ານ​ລິ່ງ​ຊັນ ເມືອງ​ທຸ­ລະ­ຄົມ ເຊິ່ງ​ບ້ານ​ດັ່ງ­ກ່າວ​ເປັນ​ບ້ານ​ໜຶ່ງ​ຕັ້ງ​ຢູ່​ລຽບ​ແຄມ​ແມ່­ນ້ຳ​ງື່ມ ມີ​ປະ­ຊາ­ກອນ 1.495 ຄົນ 292 ຄອບ­ຄົວ ໃນ​ນີ້ ໄດ້​ຮັບ​ຜົນ​ກະ­ທົບ 227 ຄອບ­ຄົວ 1.227 ຄົນ ເນື້ອ­ທີ່​ນາ­ປີ 650 ກວ່າ​ເຮັກ­ຕາ ໄຮ່ 15 ເຮັກ­ຕາ ສວນ​ກ້ວຍ 415 ເຮັກ­ຕາ ສາ­ລີ​ຫວານ 50 ເຮັກ­ຕາ ສາ­ລີ​ແຂງ 558 ກວ່າ​ເຮັກ­ຕາ ໜອງ​ປາ 9 ໜອງ ສວນ​ຫຍ້າ ແລະ ຄັງ​ລ້ຽງ­ສັດ 55 ກວ່າ​ເຮັກ­ຕາ ແລະ ສວນ​ຄົວ​ອີກ​ຈຳ­ນວນ​ໜຶ່ງ ຈາກ​ນັ້ນ ກໍ່​ໄດ້​ເດີນ­ທາງ​ເຂົ້າ​ຮ່ວມ​ຮັບ​ຟັງ​ການ​ລາຍ​ງານ​ຜົນ​ກະ­ທົບ​ຈາກ​ນ້ຳ​ຖ້ວມ ຢູ່​ຫ້ອງ​ວ່າ­ການ​ປົກ­ຄອງ​ເມືອງ​ທຸ­ລະ­ຄົມ ຈາກ​ອຳ­ນາດ​ການ​ປົກ­ຄອງ​ແຂວງ ແລະ ອຳ­ນາດ​ການ​ປົກ­ຄອງ​ເມືອງ ເຊິ່ງ​ເມືອງ​ທຸ­ລະ­ຄົມ​ເປັນ​ເມືອງ​ໜຶ່ງ​ທີ່​ໄດ້​ຮັບ​ຜົນ​ກະ­ທົບ​ໜັກ ໂດຍ​ສະ­ເພາະ ຢູ່​ລຽບ​ຕາມ​ແຄມ​ນ້ຳ​ງື່ມ ໄດ້​ຮັບ​ຜົນ​ກະ­ທົບ 16 ບ້ານ 2.927 ຄອບ­ຄົວ 13.758 ຄົນ ເນື້ອ­ທີ່​ນາ­ປີ 1.750 ເຮັກ­ຕາ ໂຮງ­ຮຽນ 12 ແຫ່ງ ເນື້ອ­ທີ່​ທຳ​ການ​ຜະ­ລິດ ຄັງ​ລ້ຽງ­ສັດ ສວນ​ຫຍ້າ ແລະ ສັດ­ລ້ຽງ ໄດ້​ຮັບ​ຜົນ​ກະ­ທົບ​ຫຼາຍ​ສົມ­ຄວນ.

    ໂອ­ກາດ​ນີ້ ທ່ານ​ຮອງ​ນາ­ຍົກ ກໍ່​ໄດ້​ຊີ້​ນຳ​ໃຫ້​ຄະ­ນະ​ນຳ​ອົງ­ການ​ປົກ­ຄອງ​ແຂວງ ເມືອງ ພາຍ­ຫຼັງ​ນ້ຳ​ຫຼຸດ​ລົງ​ສູ່​ສະ­ພາບ​ປົກ­ກະ­ຕິ​ແລ້ວ ໃຫ້​ພ້ອມ​ກັນ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ການ​ຜະ­ລິດ​ກະ­ສິ­ກຳ ພື້ນ­ຖານ​ໂຄງ​ລ່າງ ລວມ​ທັງ​ຊົນ­ລະ­ປະ­ທານ​ໃຫ້​ກັບ​ຄືນ​ສະ­ພາບ​ປົກ­ກະ­ຕິ ໂດຍ​ມີ​ການ​ສຳ​ຫຼວດ ແລະ ກຳ­ນົດ​ເປັນ​ແຜນ­ການ​ລະ­ອຽດ ສັນ​ຫາ​ແນວ​ພັນ​ພືດ​ມາ​ໃຫ້​ປະ­ຊາ­ຊົນ​ປູກ​ທົດ​ແທນ​ພືດ​ປະ­ຈຳ​ລະ­ດູ​ທີ່​ເສຍ​ຫາຍ​ໄປ ຟື້ນ​ຟູ​ໂຮງ­ຮຽນ​ເພື່ອ​ໃຫ້​ນັກ­ຮຽນ​ໄດ້​ເຂົ້າ​ໂຮງ​ເປັນ​ປົກ­ກະ­ຕິ​ໂດຍ​ໄວ ຂະ­ແໜງ​ສາ­ທາ­ລະ­ນະ​ສຸກ ຕ້ອງ​ໄດ້​ຕິດ­ຕາມ​ບັນ­ດາ​ພະ­ຍາດ​ທີ່​ຈະ​ຕາມ​ມາ​ພາຍ­ຫຼັງ​ນ້ຳ​ຖ້ວມ ແລະ ໃຫ້​ຄວາມ​ຮູ້​ສຸ​ຂະ​ອະ­ນາ­ໄມ​ແກ່​ປະ­ຊາ­ຊົນ​ແຕ່​ຫົວ­ທີ ເອົາ­ໃຈ­ໃສ່​ຕິດ­ຕາມ​ລະ­ດັບ​ນ້ຳ​ໃນ​ແຕ່​ລະ​ມື້ ແລະ ປ້ອງ​ກັນ​ເວນ­ຍາມ​ເປັນ​ປົກ­ກະ­ຕິ ເພື່ອ​ປ້ອງ​ກັນ​ການ​ສວຍ​ໃຊ້​ໂອ­ກາດ​ຂອງ​ກຸ່ມ​ຄົນ​ບໍ່​ດີ ເພື່ອ​ໃຫ້​ກຳ­ລັງ​ໃຈ​ແກ່​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ທ່ານ​ຮອງ​ນາ­ຍົກ ຍັງ​ໄດ້​ມອບ​ເງິນ 200 ລ້ານ​ກີບ ໃຫ້​ເມືອງ​ທຸ­ລະ­ຄົມ ເພື່ອ​ນຳ­ໄປ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ຄັ້ງ​ນີ້ ຈາກ​ນັ້ນ ກໍ່​ໄດ້​ເດີນ­ທາງ​ໄປ​ເບິ່ງ​ການ​ບໍ­ລິ­ຫານ​ຈັດ­ການ​ນ້ຳ​ເຂື່ອນ​ໄຟ­ຟ້າ​ນ້ຳ​ງື່ມ 1 ເຊິ່ງ​ມາ​ຮອດ​ວັນ​ທີ 8 ກັນ­ຍາ 2018 ກໍ່​ໄດ້​ຫຼຸດ​ປະ­ຕູ​ການ​ປ່ອຍ​ນ້ຳ​ລົງ​ມາ​ຢູ່​ທີ່ 2 ແມັດ.

ຂ່າວທີ່ກ່ຽວຂ້ອງ