ຂ່າວຫຼ້າສຸດ

ເປີດບໍລິການຮ້ານຄ້າ ຕັງຈະເລີນ ໂຮມສະໂຕ ສາຂາດອນໜູນ ເປັນທາງການ

307 11 ກ.ຍ. 2018 ຂ່າວໜ້າ​ໜຶ່ງ
ເປີດບໍລິການຮ້ານຄ້າ ຕັງຈະເລີນ ໂຮມສະໂຕ ສາຂາດອນໜູນ ເປັນທາງການ

    ພິ­ທີ​ເປີດ​ບໍ­ລິ­ການ​ຮ້ານ​ຄ້າ ຕັງ​ຈະ­ເລີນ ໂຮມ​ສະ​ໂຕ (TCR HOME STORE) ສາ­ຂາ​ດອນ​ໜູນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ເປັນ​ທາງ​ການ ໄດ້​ຈັດ​ຂຶ້ນ​ວັນ​ທີ 9 ກັນ­ຍາ 2018 ຢູ່​ຮ້ານ​ຄ້າ​ດັ່ງ­ກ່າວ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ພ້ອມ​ດ້ວຍ​ບັນ­ດາ​ຫົວ­ໜ້າ​ພະ­ແນກ­ການ ຄະ­ນະ​ບໍ­ລິ­ຫານ​ກຸ່ມ​ບໍ­ລິ­ສັດ ຕັງ​ຈະ­ເລີນ ຈຳ­ກັດ ແລະ ແຂກ​ຖືກ​ເຊີນ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ.

    ທ່ານ ຮົວ ແສງ​ອາ​ລຸນ ປະ­ທານ​ກຸ່ມ​ບໍ­ລິ­ສັດ ຕັງ​ຈະ­ເລີນ ຈຳ­ກັດ ກ່າວ​ວ່າ: ດ້ວຍ​ຈຸດ­ປະ­ສົງ​ໃນ​ການ​ຢາກ​ເປັນ​ສ່ວນ​ໜຶ່ງ​ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ເວົ້າ​ລວມ ເວົ້າ​ສະ­ເພາະ ການ​ພັດ­ທະ­ນາ​ເສດ­ຖະ­ກິດ​ຂອງ ນວ ເປັນ​ສ່ວນ​ໜຶ່ງ​ໃນ​ການ​ຫຼຸດ­ຜ່ອນ​ຄວາມ​ແອ​ອັດ​ຂອງ​ການ​ຄົມ­ມະ­ນາ­ຄົມ​ເຂົ້າ-ອອກ​ຕົວ​ເມືອງ ແລະ ສ້າງ​ຄວາມ​ສະ­ດວກ​ສະ­ບາຍ​ໃຫ້​ລູກ​ຄ້າ​ຫຼາຍ​ຂຶ້ນ ພວກ​ເຮົາ​ຈຶ່ງ​ຕັ້ງ­ໃຈ​ສູງ​ລົງ­ທຶນ​ກໍ່­ສ້າງ TCR HOME STORE ແຫ່ງ​ນີ້​ຂຶ້ນ ເປັນ​ສູນ​ບໍ­ລິ­ການ-ຈຳ­ໜ່າຍ​ອຸ­ປະ­ກອນ​ວັດ​ສະ​ດຸ​ກໍ່­ສ້າງ ເຄື່ອງ­ຮັບ​ໃຊ້​ຄົວ​ເຮືອນ ເຄື່ອງ​ຈັກ ແລະ ເຄື່ອງ​ໄຟ­ຟ້າ ທີ່​ເປັນ​ຜະ­ລິດ​ຕະ​ພັນ​ຄຸ­ນະ­ພາບ​ມາດ­ຕະ­ຖານ​ສາ­ກົນ ເພື່ອ​ບໍ­ລິ­ການ​ໃຫ້​ປະ­ຊາ­ຊົນ​ໃນ ນວ ກໍ່​ຄື ເຂດ​ອື່ນໆ ມີ​ທາງ​ເລືອກ​ໃໝ່ ມີ​ສິນ­ຄ້າ​ຢ່າງ​ພຽງ­ພໍ ສະ­ຖານ­ທີ່​ກວ້າງ­ຂວາງ ແລະ ບ່ອນ​ຈອດ​ລົດ​ສະ­ດວກ​ສະ­ບາຍ TCR HOME STORE ສ້າງ­ຕັ້ງ​ປີ 1980 ແລະ ໄດ້​ເຕີບ​ໂຕ​ມາ​ຢ່າງ​ຕໍ່​ເນື່ອງ​ໃນ​ຫຼາຍ​ດ້ານ ໂດຍ​ສະ­ເພາະ ທຸ­ລະ​ກິດ​ບໍ­ລິ­ການ​ຮ້ານ​ຄ້າ ແລະ ມື້­ນີ້​ພວກ​ເຮົາ​ພ້ອມ​ແລ້ວ​ທີ່​ຈະ​ຕອບ​ສະ­ໜອງ​ໃຫ້​ແກ່​ລູກ​ຄ້າ ແລະ ຮອງ​ຮັບ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ໂດຍ​ລວມ​ທີ່​ວ່ອງ­ໄວ​ຂອງ ນວ ເພື່ອ​ຮອງ​ຮັບ​ທຸກ​ຄວາມ​ຕ້ອງ­ການ ແລະ ຄວາມ­ສຸກ​ຂອງ​ທຸກ​ຄົນ ໃຫ້​ສົມ​ກັບ​ຄຳ​ຂວັນ​ທີ່​ວ່າ “ສະ­ດວກ ຄົບ​ຖ້ວນ ບໍ­ລິ­ການ​ປະ​ທັບ​ໃຈ”.

    ໂຄງ­ການ​ກໍ່­ສ້າງ​ນີ້​ແມ່ນ​ໄລ­ຍະ 1 ຂອງ​ການ​ລົງ­ທຶນ ເຊິ່ງ​ສຳ­ເລັດ​ແລ້ວ​ໂດຍ​ພື້ນ­ຖານ ແລະ ທ້າຍ​ປີ 2018 ພວກ​ເຮົາ​ຈະ​ສືບ­ຕໍ່​ໂຄງ­ການ​ໄລ­ຍະ 2 ຄື: ສູນ​ການ​ຄ້າ (Friendship Supermart) ຂາຍ­ເຄື່ອງ​ອຸ­ປະ­ໂພກ-ບໍ­ລິ­ໂພກ ເຄື່ອງ­ໃຊ້​ໃນ​ຄົວ​ເຮືອນ ແລະ ສູນ​ອາ­ຫານ​ຮັບ​ໃຊ້​ປະ­ຊາ­ຊົນ ກຸ່ມ​ບໍ­ລິ­ສັດ ຕັງ​ຈະ­ເລີນ ຈຳ­ກັດ ມີ​ຫຼາຍ​ກິດ­ຈະ­ການ​ປະ­ກອບ­ສ່ວນ​ໃຫ້​ແກ່​ສັງ­ຄົມ ແລະ ສາ­ມາດ​ສ້າງ​ວຽກ​ເຮັດ​ງານ​ທຳ​ໃຫ້​ຄົນ​ລາວ​ຫຼາຍ​ກວ່າ 2.000 ຄົນ TCR HOME STORE ສາ­ຂາ​ດອນ​ໜູນ ກໍ່​ເປັນ​ສ່ວນ​ໜຶ່ງ​ຂອງ​ກຸ່ມ​ບໍ­ລິ­ສັດ ຕັງ​ຈະ­ເລີນ ຈຳ­ກັດ ແລະ ເປັນ​ສາ­ຂາ​ທີ 2 ຖັດ​ຈາກ​ສາ­ຂາ​ປາກ​ເຊ ເຊິ່ງ​ໄດ້​ດຳ­ເນີນ​ການ​ເປີດ​ທົດ​ລອງ​ມາ​ແລ້ວ​ໄລ­ຍະ​ໜຶ່ງ ພ້ອມ​ທັງ​ໄດ້​ມີ​ການ​ປັບ­ປຸງ ແລະ ແກ້​ໄຂ​ໃຫ້​ມີ​ຄວາມ​ສອດ­ຄ່ອງ​ມາ​ແລ້ວ ມາ​ຮອດ​ມື້­ນີ້​ຈຶ່ງ​ຮັບ­ປະ­ກັນ​ວ່າ ໂຄງ­ການ​ນີ້​ສາ­ມາດ​ເປີດ​ບໍ­ລິ­ການ​ໄດ້​ຢ່າງ​ເປັນ​ທາງ​ການ.

ຂ່າວທີ່ກ່ຽວຂ້ອງ