ຂ່າວຫຼ້າສຸດ

ເຈົ້າໜ້າທີ່ ມອບພະພຸດທະຮູບທີ່ຖືກລັກໄປ ຄືນໃຫ້ວັດສີໄຄທ່າ

509 11 ກ.ຍ. 2018 ຂ່າວໜ້າ​ໜຶ່ງ
ເຈົ້າໜ້າທີ່ ມອບພະພຸດທະຮູບທີ່ຖືກລັກໄປ ຄືນໃຫ້ວັດສີໄຄທ່າ

    ອີງ​ຕາມ​ການ​ລາຍ​ງານ​ຂໍ້​ມູນ​ຂອງ​ເຈົ້າ​ໜ້າ­ທີ່​ຕຳ­ຫຼວດ ປກສ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວ່າ: ວັນ​ທີ 29 ສິງ­ຫາ 2018 ໄດ້​ມີ​ກຸ່ມ​ຄົນ​ຮ້າຍ​ເຂົ້າ​ໄປ​ລັກ​ເອົາ​ພະ​ພຸດ​ທະ​ຮູບ ຈຳ­ນວນ 2 ອົງ ຢູ່​ວັດ​ບ້ານ​ສີ​ໄຄ​ທ່າ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ຈາກ​ນັ້ນ ຫຼາຍ​ວັນ​ຜ່ານ​ໄປ​ຈົນ​ມາ​ຮອດ​ວັນ​ທີ 31 ສິງ­ຫາ 2018 ໄດ້​ມີ​ປະ­ຊາ­ຊົນ​ບ້ານ​ຊຽງ​ຄວນ ເມືອງ​ຫາດ​ຊາຍ​ຟອງ ພົບ​ເຫັນ​ພະ​ພຸດ​ທະ​ຮູບ ຈຳ­ນວນ 2 ອົງ ໄດ້​ຊຸກ­ເຊື່ອງ​ໄວ້​ທີ່​ປາກ​ຫ້ວຍ​ປະ­ຕູ​ນ້ຳ​ເຂດ​ແດນ ລະ­ຫວ່າງ​ບ້ານ​ຖິ່ນ​ຕົມ ແລະ ບ້ານ​ຊຽງ​ຄວນ ຈາກ​ນັ້ນ ປະ­ຊາ­ຊົນ​ກໍ່​ໄດ້​ສະ­ເໜີ​ລາຍ​ງານ​ມາ​ຍັງ​ກອງ​ບັນ­ຊາ​ການ ປກສ ເມືອງ ເພື່ອ​ລົງ​ຕິດ­ຕາມ​ເກັບ​ກຳ​ຂໍ້​ມູນ​ເບື້ອງ​ຕົ້ນ ແລະ ໄດ້​ນຳ​ເອົາ​ພະ​ພຸດ​ທະ​ຮູບ 2 ອົງ ມາ​ມ້ຽນ​ໄວ້​ທີ່​ຫ້ອງ­ການ ປກສ ເມືອງ ເພື່ອ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ໄດ້​ສືບ­ສວນ​ສອບ​ສວນ​ຫາ​ຂໍ້​ມູນ​ທີ່­ແທ້​ຈິງ ແລະ ສາ­ເຫດ​ໃນ​ການ​ນຳ­ໄປ​ສູ່​ການ​ຕິດ­ຕາມ​ຊອກ​ຫາ​ຄົນ​ຮ້າຍ ທີ່​ໄດ້​ລັກ​ພະ​ພຸດ​ທະ​ຮູບ​ໄປ​ນັ້ນ ມາ​ດຳ­ເນີນ​ຄະ­ດີ​ຕາມ​ກົດ­ໝາຍ.

    ວັນ​ທີ 7 ກັນ­ຍາ 2018 ໂດຍ​ຜ່ານ​ການ​ສືບ­ສວນ​ສອບ​ສວນ​ຂອງ​ເຈົ້າ​ໜ້າ­ທີ່​ເຫັນ​ວ່າ​ພະ​ພຸດ​ທະ​ຮູບ 2 ອົງ​ທີ່​ພົບ​ເຫັນ​ນີ້ ໄດ້​ຖືກ​ຄົນ​ຮ້າຍ​ລັກ​ເອົາ​ມາ​ຈາກ​ວັດ​ສີ​ໄຄ​ທ່າ ເມືອງ​ສີ​ໂຄດ​ຕະ­ບອງ ແທ້​ຈິງ​ລັກ­ສະ­ນະ​ຂອງ​ພະ​ທັງ 2 ອົງ​ແມ່ນ​ຄື​ກັນ ຮູບ­ຊົງ​ລັກ­ສະ­ນະ​ເປັນ​ພະ​ປາງ​ລີ­ລາ ພື້ນ​ຜິວ​ເປັນ​ເນື້ອ​ທອງ­ເຫຼືອງ ຄວາມ​ສູງ​ແທກ​ແຕ່​ແທ່ນ​ພະ​ຢືນ​ຈົນ​ເຖິງ​ປາຍ​ຈອມ​ເກດ 1,70 ແມັດ ຄວາມ​ກວ້າງ 44 ຊັງ​ຕີ​ແມັດ ສ່ວນ​ນ້ຳ­ໜັກ​ແມ່ນ​ບໍ່​ໄດ້​ລະ­ບຸ ຈາກ​ນັ້ນ ກອງ​ບັນ­ຊາ​ການ ປກສ ເມືອງ​ຫາດ​ຊາຍ​ຟອງ ໄດ້​ຈັດ​ພິ­ທີ​ມອບ​ພະ​ພຸດ​ທະ​ຮູບ 2 ອົງ ຄືນ​ໃຫ້​ກັບ​ເຈົ້າ​ອະ­ທິ­ການ​ວັດ​ສີ​ໄຄ ເພື່ອ​ກັບ​ຄືນ​ໄປ​ສັກ­ກາ­ລະ​ບູ­ຊາ​ໄວ້​ທີ່​ເດີມ ກ່າວ​ມອບ​ໂດຍ​ທ່ານ ພັນ​ຕີ ວຽງ​ຄຳ ຈັນ­ທະ​ວົງ­ສາ ຫົວ­ໜ້າ​ພະ​ແນກ​ສັນ­ຕິ​ບານ ປກສ ເມືອງ​ຫາດ​ຊາຍ​ຟອງ ແລະ ກ່າວ​ຮັບ​ໂດຍ​ທ່ານ ພັນ​ໂທ ວົງ​ດາວ ມັງ​ໜໍ່​ເມກ ຫົວ­ໜ້າ ປກສ ກຸ່ມ​ສີ​ໄຄ ມີ​ພະ​ເຖ­ລາ­ນຸ­ເຖລະ ທ່ານ ສຸກ​ສະ­ຫວັນ ບຸດ​ຕະ​ວົງ ຮອງ​ເຈົ້າ­ເມືອງ​ຫາດ​ຊາຍ​ຟອງ ທ່ານ ພັນ​ໂທ ສົມ​ປະ­ສົງ ສັກ­ດາ​ວົງ ຮອງ​ຫົວ­ໜ້າ​ກອງ​ບັນ­ຊາ​ການ ປກສ ເມືອງ ພ້ອມ​ທັງ​ພາກ­ສ່ວນ​ກ່ຽວ­ຂ້ອງ ອຳ­ນາດ​ການ​ປົກ­ຄອງ ແລະ ເຖົ້າ​ແກ່​ແນວ​ໂຮມ​ບ້ານ​ສີ​ໄຄ​ທ່າ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ