ປະຖົມໜອງດາ ບໍ່ສາມາດເປີດການຮຽນ-ການສອນໄດ້ ຍ້ອນໄພນ້ຳຖ້ວມ

128 11 ກ.ຍ. 2018 ຂ່າວໜ້າ​ໜຶ່ງ
ປະຖົມໜອງດາ ບໍ່ສາມາດເປີດການຮຽນ-ການສອນໄດ້ ຍ້ອນໄພນ້ຳຖ້ວມ

    ເຖິງ​ວ່າ​ລະ­ດັບ​ນ້ຳ­ຂອງ​ຈະ​ຄ່ອຍ​ບົກ​ແຫ້ງ​ລົງ ແຕ່​ຍັງ​ມີ​ປະ­ຊາ­ຊົນ​ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ (ນວ) ຫຼາຍ​ກວ່າ 50 ຄອບ­ຄົວ ຍັງ​ຕິດ​ຄ້າງ​ຢູ່​ສູນ​ພັກ​ເຊົາ​ຊົ່ວ­ຄາວ ຍ້ອນ​ນ້ຳ​ຖ້ວມ ບໍ່​ສາ­ມາດ​ໄປ​ຢູ່​ເຮືອນ​ໄດ້ ແລະ ຍັງ​ລໍ­ຖ້າ​ນ້ຳ​ຫຼຸດ​ລົງ​ຕື່ມ​ອີກ ສະ­ພາບ​ນ້ຳ​ຖ້ວມ​ຄັ້ງ​ນີ້​ນອກ­ຈາກ​ຈະ​ສົ່ງ​ຜົນ​ກະ­ທົບ​ຕໍ່​ປະ­ຊາ­ຊົນ ເນື້ອ­ທີ່​ການ​ຜະ­ລິດ​ແລ້ວ ຍັງ​ກະ­ທົບ​ຕໍ່​ການ​ສຶກ​ສາ ເຮັດ​ໃຫ້​ນັກ­ຮຽນ​ປະ­ຖົມ​ບ້ານ​ໜອງ​ດາ ບໍ່​ທັນ​ໄດ້​ເຂົ້າ​ໂຮງ­ຮຽນ ຍ້ອນ​ປັດ­ຈຸ­ບັນ​ຂັ້ນ​ເທິງ​ໄດ້​ເອົາ​ໂຮງ­ຮຽນ​ປະ­ຖົມ​ບ້ານ​ໜອງ​ດາ ເປັນ​ບ່ອນ​ພັກ​ເຊົາ​ຊົ່ວ­ຄາວ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ມາ​ອາ­ໄສ​ຢູ່.

    ທ່ານ ສຸ­ລິ­ຍາ ສຸ­ພັນ​ທະ​ວົງ ຮອງ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ເມືອງ​ສີ​ໂຄດ​ຕະ­ບອງ ໃຫ້​ສຳ­ພາດ​ວັນ​ທີ 10 ກັນ­ຍາ 2018 ວ່າ: ປັດ­ຈຸ­ບັນ​ຍັງ​ມີ​ປະ­ຊາ­ຊົນ​ຫຼາຍ​ກວ່າ 50 ຄອບ­ຄົວ ອາ­ໄສ​ຢູ່​ສູນ​ພັກ​ເຊົາ​ຊົ່ວ­ຄາວ ຄື: ສູນ​ພັກ​ເຊົາ​ໂຮງ­ຮຽນ​ປະ­ຖົມ​ສົມ­ບູນ​ບ້ານ​ໜອງ​ດາ 37 ຄອບ­ຄົວ ຫ້ອງ­ການ​ບ້ານ​ໂນນ​ຂີ້­ເຫຼັກ 13 ຄອບ­ຄົວ ໂຮງ­ຮຽນ​ປະ­ຖົມ​ສົມ­ບູນ​ບ້ານ​ຕາດ​ທອງ 3 ຄອບ­ຄົວ ເຊິ່ງ​ບັນ­ດາ​ຄອບ­ຄົວ​ທີ່​ຍັງ​ເຫຼືອ​ນີ້ ແມ່ນ​ປະ­ຊາ­ຊົນ​ຢູ່​ບ້ານ​ໜອງ​ດາ ບ້ານ​ໂນນ​ຂີ້­ເຫຼັກ ແລະ ບ້ານ​ຕາດ​ທອງ ທີ່​ໄດ້​ຮັບ​ຜົນ​ກະ­ທົບ​ນ້ຳ­ຂອງ​ຍື່ງ​ຖ້ວມ ແລະ ໄດ້​ຍົກ­ຍ້າຍ​ມາ​ຢູ່​ສູນ​ພັກ​ເຊົາ​ຊົ່ວ­ຄາວ​ແຕ່​ວັນ​ທີ 19 ສິງ­ຫາ 2018 ເປັນ­ຕົ້ນ​ມາ ໂດຍ​ເບື້ອງ​ຕົ້ນ​ກໍ່​ມີ​ຫຼາຍ​ຄອບ­ຄົວ ແຕ່​ພາຍ­ຫຼັງ​ນ້ຳ​ແຫ້ງ ຫຼາຍ​ຄອບ­ຄົວ​ກໍ່​ໄດ້​ທະ­ຍອຍ​ກັບ​ໄປ​ຢູ່​ເຮືອນ​ຂອງ​ຕົນ​ເອງ ແຕ່​ກໍ່​ຍັງ​ມີ​ບາງ​ຄອບ­ຄົວ​ບໍ່​ທັນ​ສາ­ມາດ​ກັບ​ໄປ​ຢູ່​ເຮືອນ​ໄດ້​ເທື່ອ ເຖິງ​ວ່າ​ລະ­ດັບ​ນ້ຳ­ຂອງ​ໄດ້​ແຫ້ງ​ລົງ ນັບ​ແຕ່​ວັນ​ທີ 9 ກັນ­ຍາ 2018 ເປັນ­ຕົ້ນ​ມາ.

    ປັດ­ຈຸ­ບັນ ໂຮງ­ຮຽນ​ປະ­ຖົມ​ບ້ານ​ໜອງ​ດາ ຍັງ​ບໍ່​ທັນ​ໄດ້​ເປີດ​ການ​ຮຽນ-ການ​ສອນ ສົກ­ຮຽນ 2018-2019 ຍ້ອນ​ບໍ່​ມີ​ສະ­ຖານ­ທີ່​ຮຽນ ແລະ ຍັງ​ລໍ­ຖ້າ​ນ້ຳ​ບົກ​ແຫ້ງ ເພື່ອ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ກັບ​ຄືນ​ໄປ​ຢູ່​ເຮືອນ​ຕົນ ຈຶ່ງ​ຈະ​ໃຫ້​ນັກ­ຮຽນ​ຊັ້ນ ປ1-ປ5 ຈຳ­ນວນ 120 ຄົນ​ມາ​ເຂົ້າ​ຮຽນ​ໄດ້​ປົກ­ກະ­ຕິ ປັດ­ຈຸ­ບັນ​ແມ່ນ​ກຳ­ລັງ​ຕິດ­ຕາມ​ຢູ່ ແລະ ບໍ່​ຮູ້​ວ່າ​ສະ­ພາບ​ຈະ​ເປັນ​ແນວ­ໃດ ຖ້າ​ແກ່­ຍາວ​ໄປ​ອີກ ແນ່­ນອນ​ຈະ​ມີ​ຜົນ​ກະ­ທົບ​ຕໍ່​ການ​ຮຽນ-ການ​ສອນ ເພາະ​ໂຮງ­ຮຽນ​ອື່ນ​ໄດ້​ເປີດ​ແຕ່​ວັນ​ທີ 3 ກັນ­ຍາ 2018 ສ່ວນ​ວິ­ທີ​ແກ້​ໄຂ​ໃນ­ຕໍ່­ໜ້າ ຖ້າ​ຫາກ​ການ​ພັກ​ເຊົາ​ຊົ່ວ­ຄາວ​ຂອງ​ປະ­ຊາ­ຊົນ​ແກ່­ຍາວ​ເວ­ລາ​ໄປ​ຫຼາຍ​ວັນ ທາງ​ໂຮງ­ຮຽນ​ຈະ​ໃຊ້​ວິ­ທີ​ໃໝ່ ເອົາ​ນັກ­ຮຽນ​ໄປ​ເຂົ້າ​ຢູ່​ໂຮງ­ຮຽນ​ບ້ານ​ໃກ້​ຄຽງ ສະ­ເໜີ​ໃຫ້​ຂັ້ນ​ເທິງ​ຍົກ­ຍ້າຍ​ປະ­ຊາ­ຊົນ​ທີ່​ມາ​ພັກ​ເຊົາ​ຊົ່ວ­ຄາວ​ໄປ​ຢູ່​ບ່ອນ​ອື່ນ ແລະ ເປີດ​ສອນ​ນັກ­ຮຽນ​ຮອດ​ວັນ​ເສົາ ທັງ​ນີ້ ເພື່ອ​ໃຫ້​ນັກ­ຮຽນ​ໄດ້​ຮຽນ​ທັນ​ເວ­ລາ ແລະ ບໍ່​ໃຫ້​ມີ​ຜົນ​ກະ­ທົບ​ຕໍ່​ນັກ­ຮຽນ ໂດຍ​ສະ­ເພາະ ຊັ້ນ ປ5 ທີ່​ຈະ​ມີ​ການ​ເສັງ​ຈົບ​ຊັ້ນ.

ຂ່າວທີ່ກ່ຽວຂ້ອງ