ຂ່າວຫຼ້າສຸດ

ອຸນຫະພູມໂລກຈະຮ້ອນຜິດປົກກະຕິໄປອີກ 5 ປີ

122 11 ກ.ຍ. 2018 ຫົວຂໍ້ຂ່າວອື່ນໆ

    ຜົນ­ງານ​ວິ­ໄຈ​ຂອງ​ທີມ​ວິ­ໄຈ​ຈາກ​ຝຣັ່ງ ນຳ​ໂດຍ​ຮອງ​ສາ​ສະ​ດາ​ຈານ ປລໍ​ຣີ​ອອງ ເຊວີ​ເລກ ນັກ​ວິ­ໄຈ​ຈາກ​ສູນ​ເພື່ອ​ການ​ວິ­ໄຈ​ທາງ​ວິ­ທະ­ຍາ­ສາດ​ແຫ່ງ​ຊາດ​ຂອງ​ປະ­ເທດ​ຝຣັ່ງ ເຜີຍ­ແຜ່​ຜ່ານ​ວາ­ລະ­ສານ​ວິ­ຊາ​ການ ເນ​ເຈີ ຄອມ​ມູ​ນິ​ເກ​ຊັນ ເມື່ອ​ໄວໆ​ນີ້ ລະ­ບຸ​ວ່າ ມີ​ຄວາມ​ເປັນ​ໄປ​ໄດ້​ສູງ​ຫຼາຍ​ທີ່​ທົ່ວ​ທັງ​ໂລກ ຈະ​ປະ​ເຊີນ​ກັບ​ຄວາມ​ຮ້ອນ​ສູງ​ຜິດ​ປົກ­ກະ­ຕິ​ຕໍ່​ເນື່ອງ ໃນ​ໄລ­ຍະ​ລະ­ຫວ່າງ​ປີ 2018 ເລື້ອຍ​ໄປ​ຈົນ​ເຖິງ ປີ 2022.

    ທ່ານ ດຣ. ເຊວີ​ເລກ ລະ­ບຸ​ວ່າ ເປົ້າ​ໝາຍ​ຂອງ​ທີມ​ວິ­ໄຈ​ຄັ້ງ​ນີ້ ເພື່ອ​ກວດ​ສອບ​ຂໍ້​ມູນ ແລະ ໃຊ້​ຂໍ້​ມູນ​ພູມ​ອາ­ກາດ​ດັ່ງ­ກ່າວ​ມາ ຄາດ​ການ​ເຖິງ​ສິ່ງ​ທີ່​ເອີ້ນ​ວ່າ: “ວິ­ວັດ­ທະ­ນາ​ການ​ດ້ວຍ​ຕົວ​ເອງ” ຂອງ​ພູມ​ອາ­ກາດ ຊຶ່ງ​ຖື​ເປັນ­ຄວາມ​ຫຼວງ­ຫຼາຍ​ຂອງ​ພູມ​ອາ­ກາດ​ທີ່​ເປັນ​ໄປ​ຕາມ​ທຳ​ມະ​ຊາດ ທີ່​ມີ​ທັງ “ໄລ­ຍະ​ອຸ່ນ” ແລະ “ໄລ­ຍະ​ເຢັນ”.

    ທັ້ງ​ນີ້ ທ່ານ ດຣ. ເຊວີ​ເລກ ນິ​ຍາມ​ວ່າ “ໄລ­ຍະ​ອຸ່ນ” ເປັນ​ປີ​ທີ່​ເມື່ອ​ນຳ​ເອົາ​ຄ່າ​ສະ­ເລ່ຍ​ຂອງ​ອຸນ­ຫະ­ພູມ​ໃນ​ທຸກ​ລະ­ດູ​ການ ມາ​ທຽບ​ກັບ​ຄ່າ​ສະ­ເລ່ຍ​ດຽວ​ກັນ​ຂອງ​ເມື່ອ​ປີ​ທີ່​ຜ່ານ​ມາ ຈະ​ພົບ​ວ່າ ຄ່າ​ສະ­ເລ່ຍ​ຂອງ​ອຸນ­ຫະ­ພູມ​ສູງ​ຂຶ້ນ ສະ­ພາບ​ອາ­ກາດ​ຮ້ອນ​ເອົ້າ​ຂອງ​ຍາມ​ຮ້ອນ​ໃນ​ປີ​ນີ້ ເຮັດ​ໃຫ້​ປີ 2018 ກາຍ­ເປັນ​ປີ​ທີ່​ມີ­ຄ່າ​ສະ­ເລ່ຍ​ອຸນ­ຫະ­ພູມ​ທັງ​ປີ ສູງ​ກວ່າ​ເມື່ອ​ປີ 2017 ໄປ​ແລ້ວ ຊຶ່ງ​ໝາຍ​ເຖິງ​ວ່າ​ປີ​ນີ້​ຈະ​ເລີ່ມ​ຕົ້ນ​ເປັນ​ປີ​ທຳ​ອິດ​ຂອງ “ໄລ­ຍະ​ອຸ່ນ” ນັ້ນ​ເອງ.

    ງານ​ວິ­ໄຈ​ດັ່ງ­ກ່າວ​ນີ້ ເຮັດ​ຂຶ້ນ​ກ່ອນ​ໜ້າ­ທີ່​ຈະ​ເກິດ​ພາ­ວະ​ຄື່ນ​ຄວາມ​ຮ້ອນ​ປົກ​ຄຸມ​ໄປ​ທົ່ວ​ເອີ​ຣົບ ແລະ ອີກ​ຫຼາຍໆ​ສ່ວນ​ຂອງ​ໂລກ ສາ­ມາດ​ທຳ­ນາຍ​ໄວ້​ຢ່າງ​ຖືກ­ຕ້ອງ​ວ່າ ເປັນ​ໄປ​ໄດ້​ປີ​ນີ້​ຈະ​ມີ​ອຸນ­ຫະ­ພູມ​ຮ້ອນ​ຜິດ​ປົກ­ກະ­ຕິ​ຂຶ້ນ ໂດຍ​ການ​ນຳ​ເອົາ​ຂໍ້​ມູນ​ພູມ​ອາ­ກາດ​ຕະ­ຫຼອດ​ທັງ​ສະ­ຕະ­ວັດ​ກ່ອນ​ໜ້າ​ນີ້ ມາ​ກວດ​ສອບ​ແລ້ວ​ນຳ​ຂໍ້​ມູນ​ທີ່​ໄດ້​ໄປ​ໃຊ້​ສ້າງ​ແບບ​ຈຳ­ລອງ ແລ້ວ​ກວດ​ສອບ​ຫາ​ພາ­ວະ​ການ​ປ່ຽນ­ແປງ​ຂອງ​ພູມ​ອາ­ກາດ​ທີ່​ໃກ້​ຄຽງ​ກັບ​ທີ່​ເກິດ​ຂຶ້ນ​ໃນ​ໄລ­ຍະ​ເວ­ລາ​ປັດ­ຈຸ­ບັນ ການ​ກວດ​ສອບ​ປຽບ­ທຽບ​ດັ່ງ­ກ່າວ ເຮັດ​ໃຫ້​ໜ່ວຍ​ງານ​ວິ­ໄຈ​ສາ­ມາດ​ສະ­ຫຼຸບ​ການ​ຄາດ​ການ​ພູມ​ອາ­ກາດ​ໃນ​ອະ­ນາ­ຄົດ​ໄດ້​ດ້ວຍ ຄວາມ​ໜ້າ​ເຊື່ອ​ຖື​ຈັດ​ຢູ່​ໃນ​ລະ­ດັບ “ດີ” ຕາມ​ຄຳ​ຢືນ­ຢັນ​ຂອງ​ທ່ານ ດຣ. ເຊວີ​ເລກ.

    ນອກ­ຈາກ​ຈະ​ພົບ​ວ່າ​ໂລກ​ໃນ​ອີກ 4 ປີ​ຂ້າງ​ໜ້າ ຈະ​ມີ​ອຸນ­ຫະ­ພູມ​ຮ້ອນ​ສູງ​ຜິດ​ປົກ­ກະ­ຕິ​ແລ້ວ ໜ່ວຍ​ງານ​ວິ­ໄຈ​ຍັງ​ພົບ​ດ້ວຍ​ວ່າ ໃນ​ໄລ­ຍະ​ເວ­ລາ​ດຽວ​ກັນ ພາ­ວະ​ເຫດ­ການ​ທີ່​ເກີດ​ຄວາມ​ເຢັນ​ມີ​ໂອ­ກາດ​ເກິດ​ຂຶ້ນ​ໜ້ອຍ​ລົງ​ອີກ​ດ້ວຍ.

    ໂດຍ​ເຖິງ​ແມ່ນ​ຈະ​ມີ​ຄວາມ​ເປັນ​ໄປ​ໄດ້ ແຕ່​ໂອ­ກາດ​ທີ່​ຈະ​ເກິດ​ສະ­ຖາ­ນະ​ການ​ເຢັນ​ຫຼາຍ​ນັ້ນ ມີ​ທ່າ​ອ່ຽງ​ຕ່ຳ​ຫຼາຍ​ອີກ​ດ້ວຍ.

ຂ່າວທີ່ກ່ຽວຂ້ອງ