ເບິ່ງບ້ານເຂົາເອົາບົດຮຽນ 11/09/2018

168 11 ກ.ຍ. 2018 ຫົວຂໍ້ຂ່າວອື່ນໆ

    ບົດ​ຄວາມ​ປະ­ຈຳ​ວັນ​ນີ້ ຈະ​ໃຫ້​ທ່ານ​ຜູ້​ອ່ານ​ຮູ້​ກ່ຽວ​ກັບ​ນະ​ວັດ­ຕະ​ກຳ ຍີ່­ປຸ່ນ ເພື່ອ​ຊ່ວຍ​ກອບ​ກູ້​ຜູ້​ຕົກ​ລາງ​ລົດ­ໄຟ ເລື່ອງ ສ ເກົາ­ຫຼີ ຮ້ານ​ຂາຍ­ເຄື່ອງ​ດື່ມ ແລະ ອາ­ຫານ​ທີ່​ມີ​ສ່ວນ​ປະ­ສົບ​ຂອງ​ກາ­ເຟ​ອິນ ແລະ ເລື່ອງ​ຄະ­ດີ​ນັກ​ຖ່າຍ​ທຳ​ຕ່າງ­ປະ­ເທດ​ຢູ່ ກຳ­ປູ­ເຈຍ.

    ທີ່ ຍີ່­ປຸ່ນ: ມີ​ຂ່າວ​ອອກ​ມາ​ໃນ​ທ້າຍ​ເດືອນ​ກໍ­ລະ­ກົດ​ປີ​ນີ້​ວ່າ ທາງ​ບໍ­ລິ­ສັດ ປາ​ນາ​ໂຊ​ນິກ (Panasonic Corp) ຂອງ​ຍີ່­ປຸ່ນ ໄດ້​ຄິດ​ຄົ້ນ​ລະ­ບົບ​ກ້ອງ​ບັນ­ທຶກ​ພາບ​ໂອ​ໂຕ​ມະ​ຕິກ ເພື່ອ​ຈັບ​ພາບ​ຄົນ​ຕົກ​ລາງ​ລົດ­ໄຟ ໃຫ້​ໄດ້​ໃນ​ຊົ່ວ​ພິບ​ຕາ​ດຽວ ແລ້ວ​ລາຍ​ງານ​ສູ່​ຫ້ອງ­ການ​ຄວບ​ຄຸມ​ການ​ເດີນ​ລົດ­ໄຟ ດ້ວຍ​ວິ­ທີ​ນັ້ນ​ຜູ້​ເຄາະ​ຮ້າຍ ກໍ່​ຈະ​ໄດ້​ຮັບ​ການ​ຊ່ວຍ­ເຫຼືອ​ຢ່າງ​ທັນ​ການ ບັນ­ຫາ​ຄົນ​ບັງ­ເອີນ​ຕົກ­ລົງ​ລາງ​ລົດ­ໄຟ​ຢູ່ ຍີ່­ປຸ່ນ ສ ເກົາ­ຫຼີ ແລະ ປະ­ເທດ​ອື່ນໆ ໄດ້​ກາຍ­ເປັນ​ຂ່າວ​ເສົ້າ​ນັບ​ມື້​ຖີ່​ຂຶ້ນ ເນື່ອງ​ຈາ​ກວ່າ ໃນ​ປັດ­ຈຸ­ບັນ​ນີ້ ຈຳ­ນວນ​ຄົນ​ໂດຍ­ສານ​ທາງ​ລົດ­ໄຟ​ນັ້ນ​ໄດ້​ເພີ່ມ​ຂຶ້ນ ແລະ ເປັນ​ການ​ໂດຍ­ສານ​ໃນ​ຊົ່ວ­ໂມງ​ຮີບ​ດ່ວນ ເຊິ່ງ​ໃຜໆ​ກໍ່​ຢູ່​ໃນ​ອາ­ການ​ຟ້າວ​ຝັ່ງ ນອກ­ຈາກ​ນັ້ນ ການ​ມົວ­ເມົາ​ນຳ​ໜ້າ​ຈໍ​ໂທລະ­ສັບ​ມື​ຖື ກໍ່​ເປັນ​ເຫດ­ຜົນ​ສຳ­ຄັນ​ໜຶ່ງ ທີ່​ເຮັດ​ໃຫ້​ມີ​ອຸ­ບັດ​ຕິ​ເຫດ​ຕົກ​ລາງ​ລົດ­ໄຟ ຂ່າວ​ບອກ​ວ່າ ກ້ອງ​ຊະ­ນິດ​ນີ້ ໄດ້​ຮັບ​ການ​ຕິດ​ຕັ້ງ​ເພື່ອ​ໃຊ້​ງານ​ເປັນ​ທີ່​ຮຽບ​ຮ້ອຍ​ແລ້ວ.

    ທີ່ ສ.ເກົາ­ຫຼີ: ຂ່າວ​ຕ່າງ­ປະ­ເທດ​ໃນ​ວັນ​ທີ 30 ເດືອນ​ສິງ­ຫາ​ປີ​ນີ້ (ໜັງ­ສື­ພິມ​ວຽງ​ຈັນ​ທາມ) ໄດ້​ເວົ້າ​ເຖິງ​ຄຳ​ສັ່ງ​ຫ້າມ​ຂາຍ­ເຄື່ອງ​ດື່ມ ແລະ ອາ­ຫານ​ທຸກ​ປະ­ເພດ​ທີ່​ມີ​ສ່ວນ​ປະ­ສົມ​ຂອງ​ກາ­ເຟ​ອິນ​ຕາມ​ໂຮງ­ຮຽນ​ປະ­ຖົມ ມັດ­ທະ­ຍົມ​ຕົ້ນ ແລະ ປາຍ ຢູ່ ສ ເກົາ­ຫຼີ ນັບ​ແຕ່​ວັນ​ທີ 14 ເດືອນ​ກັນ­ຍາ ປີ 2018 ນີ້​ເປັນ­ຕົ້ນ​ໄປ ຄຳ​ສັ່ງ​ນີ້​ມາ​ຈາກ​ກະ­ຊວງ​ອາ­ຫານ ແລະ ຄວາມ​ປອດ​ໄພ​ດ້ານ​ການ​ຢາ ທີ່​ໄດ້​ປັບ­ປຸງ​ກົດ­ໝາຍ​ກ່ຽວ­ຂ້ອງ ຂ່າວ​ບອກ​ວ່າ ມາ​ຮອດ​ເວ­ລາ​ນີ້ ໂຮງ­ຮຽນ​ຕ່າງໆ​ໄດ້​ເລີ່ມ​ເກືອດ​ຫ້າມ​ການ​ຂາຍ­ເຄື່ອງ​ດື່ມ​ປະ­ເພດ​ໂຊ­ດາ ນ້ຳ­ໝາກ​ໄມ້ ແລະ ຜະ­ລິດ​ຕະ​ພັນ​ຈາກ​ນົມ ທີ່​ມີ​ສ່ວນ​ປະ­ສົມ​ສານ​ກາ­ເຟ​ອິນ​ແລ້ວ ໃນ​ເມື່ອ​ກ່ອນ​ນັ້ນ ຢູ່​ຕາມ​ໂຮງ­ຮຽນ​ຕ່າງໆ​ໄດ້​ອະ­ນຸ­ຍາດ​ໃຫ້​ຂາຍ​ກາ­ເຟ ດ້ວຍ​ເຄື່ອງ​ຈັກ​ບີບ​ເອົາ ແລະ ຕາມ​ຮ້ານ​ກາ­ເຟ​ສຳ­ລັບ​ບຸກ­ຄົນ​ໃນ​ເກນ​ອາ­ຍຸ ຜູ້​ໃຫຍ່ ແລະ ຄູ-ອາ­ຈານ ແຕ່​ດຽວ­ນີ້ ໄດ້​ຍົກ­ເລີກ​ໝົດ ການ​ໄດ້​ຮັບ​ທາດ​ເກ​ຟີ​ອິນ​ໃນ​ລະ­ດັບ​ສູງ ຈະ​ເຮັດ​ໃຫ້​ເກີດ​ພະ­ຍາດ​ນອນ​ບໍ່​ຫຼັບ ຫົວ­ໃຈ​ເຕັ້ນ​ບໍ່​ເປັນ​ປົກ­ກະ­ຕິ ຕື່ນ​ຕົກ­ໃຈ​ໄວ ແລະ ເປັນ​ອັນ­ຕະ­ລາຍ​ຮ້າຍ​ແຮງ​ສຳ­ລັບ​ເດັກ ທີ່​ພວມ​ພັດ­ທະ­ນາ​ທາງ​ຮ່າງ­ກາຍ ແລະ ຈິດ­ໃຈ.

    ທີ່ ກຳ­ປູ­ເຈຍ: ຂ່າວ​ວຽງ​ຈັນ​ທາມ ໃນ​ວັນ​ທີ 27 ເດືອນ​ສິງ­ຫາ​ຜ່ານ​ມາ ໄດ້​ເວົ້າ​ກ່ຽວ​ກັບ​ສານ​ກຳ­ປູ­ເຈຍ ໄດ້​ທົບ​ທວນ­ຄືນ​ເນື້ອ​ໃນ​ການ­ເຄື່ອນ­ໄຫວ​ຂອງ​ທ້າວ ເຈມ ຣິກ​ເຄັດ​ສັນ ນັກ​ຖ່າຍ­ຮູບ​ຟີມ­ຮູບ­ເງົາ​ຂອງ ອົດ​ສະ​ຕຣາ​ລີ ທີ່​ຖືກ​ຈັບ​ກຸມ​ໃນ​ເດືອນ​ມິ­ຖຸ­ນາ ປີ 2017 ໃນ​ຂໍ້​ຫາ​ເຄື່ອນ​ໄຫວ​ເປັນ​ນັກ​ສືບ​ສອດ­ແນມ ເຊິ່ງ​ມີ​ໂທດ​ຈຳ​ຄຸກ​ສູງ​ສຸດ 10 ປີ ນັບ​ແຕ່​ເວ­ລາ​ນັ້ນ​ເປັນ­ຕົ້ນ​ມາ ການ​ສືບ­ສວນ-ສອບ​ສວນ ໄດ້​ດຳ­ເນີນ​ມາ​ຢ່າງ​ຕໍ່​ເນື່ອງ ໃນ​ການ​ທົບ​ທວນ­ຄືນ​ຄະ­ດີ​ນັ້ນ ທັງ​ທະ­ນາຍ­ຄວາມ​ປະ­ຈຳ​ຕົວ​ຂອງ​ນັກ​ຖ່າຍ​ຟີມ­ຮູບ­ເງົາ ແລະ ສານ​ກຳ­ປູ­ເຈຍ​ໄດ້​ຄົ້ນ​ປະ­ຫວັດ​ການ­ເຄື່ອນ­ໄຫວ​ການ​ຖ່າຍ​ທຳ​ຂອງ​ທ້າວ ເຈມ ນັບ​ແຕ່​ຊຸມ​ປີ 1970 ເປັນ­ຕົ້ນ​ມາ ທີ່​ສະ­ແດງ​ໃຫ້​ເຫັນ​ວ່າ ຜູ້­ກ່ຽວ​ແມ່ນ​ນັກ​ຖ່າຍ​ທຳ​ທີ່​ເຮັດ​ອາ­ຊີບ​ນີ້​ແທ້ ການ­ເຄື່ອນ­ໄຫວ​ຖ່າຍ​ທຳ​ຢູ່ ກຳ­ປູ­ເຈຍ ແມ່ນ​ການ­ເຄື່ອນ­ໄຫວ​ຕາມ​ໜ້າ­ທີ່​ຂອງ​ນັກ​ຂ່າວ-ນັກ​ໜັງ­ສື­ພິມ​ໂດຍ​ອາ­ຊີບ​ແທ້ ບໍ່​ໄດ້​ເຄື່ອນ​ໄຫວ​ເປັນ​ນັກ​ສືບ​ສອດ­ແນມ​ແຕ່​ປະ­ການ​ໃດ​ເລີຍ ນັກ​ຖ່າຍ​ທຳ​ຮູບ­ເງົາ​ຄົນ​ນີ້ ຖືກ​ຈັບ​ຍ້ອນ​ໄດ້​ໃຊ້​ໂດຼນ ຖ່າຍ​ທຳ​ການ­ເຄື່ອນ­ໄຫວ​ໂຮມ​ຊຸມ­ນຸມ​ຂອງ​ພັກ​ຝ່າຍ​ຄ້ານ ກຳ­ປູ­ເຈຍ ໃນ​ປີ 2017.

ຂ່າວທີ່ກ່ຽວຂ້ອງ