ທີມຊາດລາວ ເກັບໂຕທີ່ປະເທດແອັດສະປາຍ ກຽມ AFF Suzuki Cup 2018

278 11 ກ.ຍ. 2018 ວົງຈອນກີລາ
ທີມຊາດລາວ ເກັບໂຕທີ່ປະເທດແອັດສະປາຍ ກຽມ AFF Suzuki Cup 2018

    ຄະ­ນະ​ນຳ​ຄູ​ເຝິກ ແລະ ນັກ­ກີ­ລາ​ບານ­ເຕະ​ທີມ​ຊາດ​ລາວ ໄດ້​ອອກ​ເດີນ­ທາງ​ວັນ​ທີ 6 ກັນ­ຍາ 2018 ທີ່​ສະ­ໜາມ​ບິນ​ສາ­ກົນ​ວັດ​ໄຕ ໄປ​ເກັບ​ໂຕ​ເຝິກ­ຊ້ອມ ແລະ ອຸ່ນ​ເຄື່ອງ 1 ນັດ ທີ່​ປະ­ເທດ​ແອັດ​ສະ​ປາຍ ນຳ​ໂດຍ​ທ່ານ ຄຳ​ແພງ ວົງ​ຂັນ­ຕີ ຫົວ­ໜ້າ​ຄະ­ນະ​ທ່ານ Mike Wong Mun Heng ຄູ​ເຝິກ​ໃຫຍ່​ທີມ​ຊາດ​ລາວ ແລະ ນັກ­ກີ­ລາ ຈຳ­ນວນ 22 ຄົນ ທັງ​ນີ້​ເພື່ອ​ເປັນ​ການ​ກະ­ກຽມ​ຄວາມ​ພ້ອມ ເຂົ້າ​ຮ່ວມ​ການ​ແຂ່ງ­ຂັນ AFF Suzuki Cup 2018.

    ສຳ­ລັບ​ການ​ການ​ເດີນ­ທາງ​ໄປ​ເກັບ​ໂຕ​ຂອງ​ທີມ​ຊາດ​ລາວ ທີ່​ເມືອງ​ບາ​ເຊ​ໂລ​ນາ ປະ­ເທດ​ແອັດ​ສະ​ປາຍ ຈະ​ມີ​ນັດ​ອຸ່ນ​ເຄື່ອງ 1 ນັດ ໃນ​ວັນ​ທີ 11 ກັນ­ຍາ 2018 ພົບ​ກັບ​ທີມ​ຊາດ​ສະ­ຫະ­ລັດ​ອາ​ຣັບ​ເອ​ມິ​ເຣດ (UAE) ຫຼັງ​ຈາກ​ນັ້ນ ຈະ​ໄດ້​ເດີນ­ທາງ​ຕໍ່​ເພື່ອ​ເຂົ້າ​ຮ່ວມ​ລາຍ­ການ​ແຂ່ງ­ຂັນ Bangabandhu Gold Cup 2018 ທີ່​ປະ­ເທດ​ບັງ​ກະ­ລາ​ເທດ ໃນ​ວັນ​ທີ 1-12 ຕຸ­ລາ 2018 ມີ 6 ປະ­ເທດ​ເຂົ້າ​ຮ່ວມ ໂດຍ​ແບ່ງ​ອອກ​ເປັນ 2 ກຸ່ມ ຄື: ກຸ່ມ A ເນ​ປານ ປາ​ເລ​ສ​ຕາຍ ແລະ ທາ​ຈິ​ກິດ​ສະ­ຖານ ກຸ່ມ B ບັງ​ກະ­ລາ​ເທດ ລາວ ຟີ​ລິບ​ປິນ ນອກ​ນັ້ນ ຈະ​ມີ​ເກມ​ອຸ່ນ​ເຄື່ອງ 1 ນັດ​ຢູ່​ລາວ ໃນ​ວັນ​ທີ 16 ຕຸ­ລາ 2018 ທີມ​ຊາດ​ລາວ ພົບ​ກັບ​ທີມ​ຊາດ​ມົງ​ໂກ​ລີ ທີ່​ສະ­ໜາມ​ກີ­ລາ​ແຫ່ງ​ຊາດ​ຫຼັກ 16.

    ສຳ­ລັບ​ການ​ແຂ່ງ­ຂັນ AFF Suzuki Cup 2018 ຢູ່​ຮ່ວມ​ກຸ່ມ A ປະ­ກອບ​ມີ: ຫວຽດ­ນາມ ມາ​ເລ​ເຊຍ ມຽນ​ມາ ກຳ­ປູ­ເຈຍ ແລະ ລາວ ສ່ວນ​ຕາ­ຕະ­ລາງ​ການ​ແຂ່ງ­ຂັນ​ວັນ​ທີ 8 ພະ­ຈິກ 2018 ທີມ​ຊາດ​ລາວ ພົບ​ທີມ​ຊາດ​ຫວຽດ­ນາມ ທີ່​ສະ­ໜາມ​ກີ­ລາ​ແຫ່ງ​ຊາດ​ຫຼັກ 16 ວັນ​ທີ 12 ພະ­ຈິກ 2018 ທີມ​ຊາດ​ມາ​ເລ​ເຊຍ ພົບ​ທີມ​ຊາດ​ລາວ ທີ່​ສະ­ໜາມ Bukit Jalil National Stadium ວັນ​ທີ 16 ພະ­ຈິກ 2018 ທີມ​ຊາດ​ລາວ ພົບ​ທີມ​ຊາດ​ມຽນ​ມາ ທີ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ວັນ​ທີ 20 ພະ­ຈິກ 2018 ທີມ​ຊາດ​ກຳ­ປູ­ເຈຍ ພົບ​ທີມ​ຊາດ​ລາວ ທີ່​ສະ­ໜາມ National Olympic Stadium ນະ­ຄອນ­ຫຼວງ​ພະ­ນົມ​ເປັນ.

ຂ່າວທີ່ກ່ຽວຂ້ອງ